沖繩 鯨 • 鯊日記(01) – 味遊 那霸市

沖繩那霸市 ～ 弁慶壽司

沖繩那霸市的 弁慶壽司(立ち喰い寿司弁慶)是一間家庭式經營的壽司店，價格親民性價比高，雖然歷史相對較短，但在日本本土評價中口碑很好，被視為一間質素不錯的壽司店，大部分的壽司食材也非常新鮮，是高價海鮮和沖繩燒肉以外的好選擇。

沖繩 鯨 • 鯊日記 – 序

今次已經是第四次來沖繩，主要目標是一次過去埋以往未玩過的節目，包括出海睇鯨魚，潛水睇鎚頭鯊和去與那國海底城，順道去埋上次未去過的 系滿和瀨長島，一共去9日。

「沖繩 鯨 • 鯊日記」9天行程，詳細行程可點擊到相關文。

日數	行程路線	日程重點
Day 01	香港→那霸	上午乘機直飛那霸，下午在那霸市行街，試地道美食 弁慶壽司、暖暮拉麵和 沖繩燒肉ぶち 久茂地店。
Day 02	那霸	早上跟團出海睇鯨魚；下午租電動三輪車自駕5小時，遊系滿市場和 瀨長島。
Day 03	那霸→與那國島	早上遊 泊港漁市場，中午乘飛機往 與那國島，準備明天潛水。
Day 04	與那國島	與那國島潛水睇鎚頭鯊。
Day 05	與那國島	與那國島潛水睇鎚頭鯊。
Day 06	與那國島	與那國島潛水睇鎚頭鯊和與那國海底城。
Day 07	與那國島	與那國島潛水睇鎚頭鯊。
Day 08	與那國島→石垣島	乘巴士在與那國島一日遊，黃昏乘飛機去 石垣島，晚餐食石垣牛燒肉。
Day 09	石垣島→香港	早上漫遊石垣市，下午乘飛機經那霸市回香港。

沖繩 鯨 • 鯊日記– Day 01

行程：香港(天晴) → 那霸(天晴)

今日乘晨早07:25 HK Express飛機往沖繩，要04:30到機場，正式半夜三更交通選擇只有的士或Uber之類，因為想慳錢，所以決定坐尾班巴士入機場，在機場呆坐一晚等上機。HK Express的Check in是全自助形式，很快便寄完行李入到禁區。

01:30去到Plaza Premium Lounge，用埋EveryMile卡的免費Quota，飲飲食食幾個鐘好快過。

半夜三更只有不足10人，好清靜。

有5個鐘時間，慢慢飲些酒食些小食，估唔到夜媽媽還有燒賣腸粉春卷芋圓，好正喎。

唔記得幾多年未試過這麼清靜的機場候機室了，應該接近20年。燒賣和腸粉都保持水準，白粥加點豬肉鬆好啱食。

食完玩一陣手機又小睡一會，很快又天光，候機室亦湧入大量旅客，開始嘈雜。

朝早06:00開始供應 XO醬魚蛋粉，呢碗粉真係高質，河粉又滑魚蛋又彈牙又好味，XO醬真材實料啖啖瑤柱，好食過不少麵店。

芝麻湖芋圓 – 這自己溝的甜品都幾正。食足一晚真係爽。

HK Express航機準時07:25 - 10:55飛到 沖繩那覇，飛行時間2hr30min。

<<那覇>>

那覇空港駅 – 出機場之後行去坐單軌電車出市區。

沖繩都市單軌電車 – 由「那霸空港 」去「安里」單程車費¥320，車程18min。

趕得切11:50的單軌電車。

那霸休伊特渡假飯店(ヒューイットリゾート那覇) – 今日住呢間，位於安里站附近，行3分鐘便到國際通街尾。明天會搬去附近較平的酒店。

酒店門口有電動三輪車租，明天便租幾個鐘自己四圍兜風。

雙人房(包括早餐)每晚¥12372 – 派了高層房，景觀開揚，面積十分大，瞓四個人都得。

原本打算游陣水，可惜天台泳池維修又冇預先通知，否則可能唔住呢間。早點出去行街，轉個彎便是国際通。

琉球オリオンホテル 那覇国際通り(Orion Hotel NAHA) – 位於國際通街尾，明晚搬來這裡。

國際通 四處也見到這些 風獅爺，也常見於沖繩建築物的屋頂、門口或村莊入口，作用是驅除惡靈和帶來平安好運。

国際通 – 那覇市最旺的街道，有大量食店和禮品店，今日的遊客唔算太多。

人氣餐廳「琉球の牛 那覇国際通り」便在左邊的玻璃大廈樓上，以前食過算很高質，只係沒有炭爐。

那霸國際通商店街 – 內有大量小販、小食、居酒屋和禮品店，第一牧志公設市場也在街內。

當世界各地旅客海量湧到東京、大阪，福岡等地時，那霸市依然顯得相對冷清。

這小店賣的沖繩菠蘿好香甜多汁的，以前賣¥80一串，現在已經¥230，升得勁過股票。

國際通商店街有很多橫街小巷以前未行過，今次可以慢慢行，原來小巷的商店殘舊好多，看樣子最少30年沒有翻新過。

弁慶壽司 – 國際通商店街內的家庭式壽司店，主打中低價壽司，沒有期望地入去試試。

小店只有六個座位，比一般的壽司店更細。

菊水の辛口本釀造(¥700) – 品質高的本釀造，入口醇厚酒氣芬芳，價錢和便利店差不多。

散點壽司七件 吞拿魚赤身(まぐろ)(¥140)；斑鰶魚(こはだ)(¥140)；烤鰻魚(うなぎ)(¥140)；扇貝(ホタテ)(¥140)；比目魚裙邊(えんがわ)(¥140)；海膽(ウニ)( ¥180)；三文魚籽(イクラ)(¥180) – 意外地全部都新鮮好好味，海膽和三文魚籽正常普通，其餘可以說是高質，不單只魚生鮮美，飯團也充滿飯香，這麼平的價錢是滿分的。

因為咁高質所以追加多6件壽司。

三文魚(サーモン)(每件¥140) – 味道合格的，不過沒有吞拿魚和比目魚咁好食；扇貝(ホタテ)(每件¥140) – 因為太抵食所以再追加，同等質素在元氣最少每件HK$20。

烤鰻魚(うなぎ)(每件¥140) – 高質的鰻魚，如果唔係要留肚的話一定要多幾件。

海洋丼伴味噌湯( ¥2000) – 小太熊試試了這一份，又係全部魚生都鮮甜味美，但估唔到海膽有臭味，要立即吐，完全影響了對這店的印象，但結論是如果留在那霸好多日，仍然值得再來的。

二人埋單共¥4600。

味の店 ぼんぼん – 國際通商店街內的 鰻魚專賣店，今日無故不定休，唯有下次再試。

ポーたま牧志市場店 – 意外發現了這2014年開業的 沖繩人氣必吃名物 餐肉蛋飯糰專賣店，排了好多人，最衰還要食拉麵，個胃冇咁大，下次一定要試

暖暮拉麵 那霸牧志店 – 福岡的知名豚骨拉麵連鎖店「暖暮」在沖繩的分店，人氣極高又要排長龍。小太熊去咁多次福岡又唔食，係要來到沖繩至食。

排了廿幾分鐘終於有位，坐低之後自己在售賣機買麵票。坐低後見煮麵的廚師全是南亞外勞，怎會食到正宗日本拉麵呀，睇見就唔想食，早知唔來。

溏心蛋叉燒拉麵(半熟煮玉子ラーメン)(¥1030) – 這碗拉麵只算普通，上至湯底麵質下至豚肉溏心蛋也是一般，一定冇下次。

乘單軌電車(¥250)由「美榮橋 」去「県庁前駅」，行去「H.I.S. LEALEAラウンジ沖縄」租了部電動三輪車明天下午出車， 再乘單軌電車(¥250)由「県庁前駅 」去「安里」，回酒店休息。

夜晚再去 国際通繼續行街和晚餐。

ぶち 久茂地店 – 是一家開業於2018年的燒肉居酒屋，主要供應沖繩県產的和牛，在日本本土的評價普遍較高，唔訂枱一定冇位。

店內雖然有大量抽風系統，但炭火燒肉味依然很香。

大生啤The Premium Malt’s(プレミアムモルツ)(¥650)；烏龍茶(ウーロン茶)(¥220)

每位人頭費¥330，送了一碟椰菜。

厚切特等牛舌(厚切り特タン)(¥2180) – 加了少量鹽醃提升了牛舌的肉香，入口甘香肥美充滿炭火香，厚切加強了口感，很好食，但始終吃不回最頂級的牛舌，唯有繼續試。

和牛五花肉(和牛カルビ)(¥1780) – 最軟嫩的部位，入口即化甘美濃郁，外焦內嫩很好食。

阿古豬頸肉(あぐー豚トントロ)(¥680) – 豬肉味唔錯亦夠甘香，抵食。

牛五花肉(カルビ)(¥680) – 平嘢又真係流啲，肉有點筋但牛肉味也夠濃，抵食的。

加了碗 白飯(300)送牛肉，冇咁滯。

食完飯慢慢行返酒店，沿途買些小食。

Okimei紫薯撻雪糕(¥139) – 在沖繩縣的日子每次見到也一定買來食的雪糕，是Okimei和御菓子御殿合作出產的雪糕，以御菓子御殿的招牌紫薯撻作藍本製作，沖繩縣以外的地方冇得賣，即使最近沖繩的 與論島也沒有。紫薯味十分濃郁，口感和味道也是一流，連個撻皮也加進雪糕內，令味道更多層次，是最好食的杯裝雪糕。

森永100%牛奶(¥106) – 和傳統的日本牛奶一樣甘香濃郁，非常之好飲。

昨晚唔夠瞓，今晚早點休息。

 

 

補充資料 :

1.     香港快運(HK Express) 香港來回沖繩那霸市機票每位HK$1319，包括20kg大行李。

2.     持香港護照可以90天免簽証入境日本，入境前要上Visit Japan Web網站填寫海關申報表。

3.     Visa Card日元簽賬匯率￥100約兌HK$5.32。現金日元匯率￥100兌HK$5.9，在這價錢入了不少貨。文章列出的價錢已包括了所有稅項和服務費。

4.     藍十字保險2人9天價錢HK$392。

5.     沖繩都市單軌電車 單程票價依搭乘距離而定由¥250 ～ ¥390。另有24hr票¥1000 和48hr票¥1800。

6.     今次繼續用「Joytel」電話上網卡，運作正常，下次再用。10天卡HK$75。

 

---待續---