沖繩與那國島 ~ 鎚頭鯊(Hammerhead Shark)
沖繩縣是日本著名的南國島嶼群，而「與那國島」則是沖繩所屬的八重山群島最西端的小島，距離台灣只有約110km，比沖繩本島還要近。與那國島面積不大，是個適合自駕環島遊的小島。與那國島有獨特的地理位置和自然環境，每年12月至3月也有很多 鎚頭鯊聚集在島的西端水域，是全球少數可近距離觀賞 鎚頭鯊的地點之一，絕對不比南美洲的 加拉巴哥群島(Galápagos)遜色，吸引各地的潛水愛好者前來。此外，與那國島的海底還有神秘的海底城遺跡，陸上則有矮少的 與那國馬和沿岸的斷崖景觀及燈塔，組成了這奇特的日本最西瑞小島。交通方面，與那國島每天有多班航機分別往返沖繩本島和石垣島，每週也有兩班船往返石垣島。
沖繩 鯨 • 鯊日記– Day 04
行程：與那國島(陰晴不定)
<<與那國島>>
今朝07:00起身執行李，食了些麵包，便揹埋大行李去潛水店。今日潛三次水，在潛水店食午餐，下午要換另一間較遠的旅店。
與那國潛水服務 – 今日會出三團人，我們08:45開始第一潛。
第一潛的地點是 西崎灯台對出海上，今日大致天晴，不過水很濁，而且有水流。
<<與那國島1st
Dive>>
DM十分專業，一個帶頭搵鎚頭鯊，另一位DM跟尾睇住我們整隊6個人，相比其他地方一個帶6個安全認真得多，收貴些都值得。
White House – 潛下水底立即見到一塊純白色的軟珊瑚，有小丑魚在內生活，很特別的白珊瑚，潛了百多次水第一次見，上次來潛了4次也未遇過。
公主小丑魚(Clown
Anemone Fish)
沿着珊瑚礁游出去斷崖位置，尋找鎚頭鯊。
砲彈魚(Titan
Triggerfish)
裸躄魚(Sargassumfish)
大斑刺魨(Black-blotched
Porcupinefish)
鎚頭鯊(Hammerhead
Shark) – 距離其實不是太遠，但水確實非常濁，影像很朦，但算是清楚看見那鎚頭。
DM全程睇住時間，夠45min便立即上水，我的氣樽還剩90Bar，下次唔駛慳住吸氣了。
總結第一潛 ~ 3kg鉛帶 • 下潛時間45min • 遇上2條鎚頭鯊 • 最深水32m。
10:00回到碼頭，輪到另一隊人出發，我們回去浸個熱水浴換件乾衫之後休息40min，11:15準時再出船第二潛。
<<與那國島2nd
Dive>>
今次的水冇第一潛咁濁，但魚唔多。
巨型鰺魚(Giant
Trevally) – 只有幾條，以前通常見到都是一大羣。
鬼蝠魟(Manta
Ray) – 很大條的巨型魔鬼魚，跟著佢游了幾分鐘，好玩。
總結第二潛 ~ 3kg 鉛帶 • 下潛時間45min • 遇上1條Manta Ray • 最深水35m
回到潛水店立即有午餐食，這𥚃的午餐好好食架，而且日日唔同款日日都咁好食。
蘑菇螺片意粉 – 蘑菇意粉又腍又美味，螺片都煙韌又鮮甜，正；洋蔥牛肉湯 – 連湯都好好飲，湯內有少少牛肉都好夠肉味。
唔夠食可以叫加大的，隔離有個大肥佬客要了雙倍份量，不過很快又要潛，唔敢食太多啊。
<<與那國島3rd
Dive>>
這次只見到一條鯊魚，有點失望。
白鰭鯊(White-tip
Shark)總結第三潛 ~ 2kg鉛帶 • 下潛時間45min • 遇上1條白鰭鯊 • 最深水20m
今日下潛三次也沒有出現以往時不時出現的缺氧情況，心情定好多，覺得狀態唔差，正式係唔賭唔知時運到，唔潛唔知身體好。
以往下潛一般要用4kg以上鉛帶，在Galápagos潛水時穿上冬天厚Wetsuit更加要用6kg才能下沉，但不知為何今次同樣穿上冬天厚Wetsuit，但用3kg鉛帶已經過重。DM在第三潛時叫我們試用2kg，潛完之後佢建議我哋明天試用1kg，咁激？不過佢咁有經驗，信佢試吓啦。
每日散隊之後DM也會總結當日看到的魚，今日出了三團，沒有人遇到一大羣鎚頭鯊。
揹起大背囊行去新旅店，好遠呀，要行650m，仲要上斜路，小太熊貪平訂呢間，分明又想攞我老命。
鬼叫你係窮L咩，唯有揹起500兩大行李，日行650,000亳米斜路不換肩。
あびゃん与那国島ゲストハウス久部良 – 很簡陋的旅店，連續住4晚。
大廳有廚房、雪櫃、餐具和三張餐枱，住客可以使用。還有自助小賣部，自己攞完食物飲品自己放錢入錢箱便可以。
房沒有廁所和浴室，公共廁所和浴室尚算整潔，住客的質素不是太差。
房間全部是黑房，鞋要放在門口。
雙人房(不包括早餐)每晚¥11975
– 只有一張床，所有物品也放在地下，價錢和昨天一樣，難怪昨天那房咁難訂。
今晚很好運，找到一間餐廳有位，佢只做了兩枱散客便對其後進場的散客話沒有食材，唔做生意了。
肉人 – 與那國島唯一的日式燒肉餐廳，是岩手縣門崎丑牧場的直營店，評分很低，2年前食過一次覺得唔錯，但今次質素差了很多而且貴了差不多40%，下次唔食了。
餐廳有10張枱，但今晚的食材只夠做兩枱散客，其餘只能招待訂了枱的人客。
餐牌比較簡單，2年前西冷牛扒只係¥4000，今日要¥5500，貴了37.5%呀！唔叫呢味了。
大生啤(¥650)
; 凍烏龍茶(¥450)
– 杯茶勁唔抵，咁細杯賣咁貴，不過小太熊唔飲酒。
牛小排(カルビ)(¥1000)；牛肋間肉(ゲタカルビ)(¥1300)
– 賣相麻麻，食落都係一般，香港間牛角的肉好似好少少。
牛五花肉(上カルビ)(¥1600)；牛橫隔膜肉(牛ハラミ)(¥1800)
– 呢兩份唔錯，有油香有肉味，但肉質有點韌，整體上合格的，早知叫兩份唔要上面那碟。
用石油氣爐火燒始終和炭火有一大段距離，而且牛肉醃過很易燒燶，不過唔好咁多要求了，好過餐餐杯麵啦。
加多一碗 大白飯(¥450)，勁大碗，足夠兩個人食。
埋單共¥7250，又唔係好貴，這種質素我覺得Ok，不過小太熊有些不滿。
離開時見到門口貼多了張紙，寫着「由於食材短缺，我們只能接待已預訂的客人。沒有預約者將不能進入，非常抱歉。」
沖繩 鯨 • 鯊日記– Day 05
行程：與那國島(陰晴不定間中微雨及暴雨)
今日又係有三團，我們被安排10:00開始第一潛。
<<與那國島4th
Dive>>
天氣極不穩定，好彩水面不太大浪，大家排隊慢慢落水。
好開心呀，潛了一半時間便發現水底有廿幾條鎚頭鯊，好壯觀呀。
鎚頭鯊(Hammerhead Shark) – 大家立即潛到深處睇魚，DM們也望住我哋，有咩事可以立即幫忙。
真係勁開心，上次老遠去Galápagos便是為了睇呢一幕 鎚頭鯊羣，可惜見唔到，今次終於見到了。
好近啊，在身邊游過，真係見到佢哋鎚頭兩邊隻眼架。
總結第4潛 ~ 1kg鉛帶 • 下潛時間45min • 遇上約25條鎚頭鯊 • 最深水42m
好肚餓呀，今日未食早餐，要空肚食午餐。
免治牛肉沙律飯炒底 – 沙律新鮮牛肉有肉味，飯炒夠多蛋好好味，如果唔係仲要潛水一定食大碟；洋蔥蛋花湯 – 相信加了些肉骨㷛的湯，很香甜好飲。
<<與那國島5th
Dive>>
大家一起潛下20～25m，跟着DM一起游。
今次沒有早上那麽精彩，只遇上 1條鎚頭鯊，而且水太濁，在面前游過也不清楚。
上水時天色變得很黑，隨時落大雨。
總結第5潛 ~ 1kg鉛帶 • 下潛時間45min • 遇上 1條鎚頭鯊 • 最深水25m
<<與那國島6th
Dive>>
今次先在珊瑚區遊走。
月光蝶魚(Saddleback
Butterflyfish)
鎚頭鯊(Hammerhead Shark)
總結第6潛 ~ 1kg鉛帶 • 下潛時間45min • 遇上 1條鎚頭鯊 • 最深水20m
回到潛水店，看看大家今日的成績，DM從遠處觀看，我哋只係廿三條，隔離組見到50條呀，攪到小太熊勁唔開心，隔離組的黃婆婆就開心到不斷吟吟笑，佢就好啦。
回到旅館都17:30，冇節目了，今日搵唔到餐廳吃飯，決定在旅館早點食完晚餐休息。
石垣島牛奶(¥380)
– 這款牛奶和一般的日本牛奶一樣，甘香濃郁；罐頭吞拿魚(¥320) – 正常的吞拿魚味，和香港買的分別不大；壽司卷(¥460) – 剛才路過在大朝商店買的，估唔到好好食喎，啲飯好靚，下次可以再食。
辣椒味噌拉麵(¥290)
– 日本的碗麵真係高水準，又刺激又冶味麵質又彈牙，和英國的杯麵比較肯定係天堂和地獄的分別。
鹽味豚骨拉麵(¥290)
– 呢碗都係好食，仲附加一片脫水薄肉片，係窮L的美食。
補充資料 :
1. 持香港護照可以90天免簽証入境日本，入境前要上Visit
Japan Web網站填寫海關申報表。
2. Visa Card日元簽賬匯率￥100約兌HK$5.32。現金日元匯率￥100兌HK$5.9，在這價錢入了不少貨。文章列出的價錢已包括了所有稅項和服務費。
3. ｢與那國潛水服務｣是島上歷史最悠久的潛水店，幫襯了兩次共16潛，服務專業。水肺潛水 1潛¥11880 (不包括午餐)；2潛¥16500 (包括午餐)；3潛¥22000 (包括午餐)。租用全套裝備每日¥4950。
---待續---
沒有留言:
張貼留言