2026年10月1日

加拿大 • 瀛寰搜奇(10) – 溫哥華島 熊霸天下

加拿大溫哥華島 三文魚孵化場Quinsam River Hatchery – 野生黑熊捕食三文魚

加拿大溫哥華島(Vancouver Island)屬於北美洲熊類密度較高的地區之一,島上居住有不少野生黑熊和棕熊,熊出沒十分頻繁,由於島上的食物充足,一般情況下,牠們多半避開人類。溫哥華島的熊通常會在森林、溪谷、三文魚孵化場附近或食物容易取得的住宅邊緣地帶出沒。在三文魚洄游的秋季,遇到熊的機會率會更高,島上很多野外的自然步道和景點也屬於熊的活動範圍,所以在溫哥華島野外活動必須帶備防熊噴霧,看到熊時立即保持距離並面向着慢慢退後。雖然加拿大卑詩省近年仍有熊傷人的個案,但這類事件在整體熊活動中仍屬罕見,因此不是熊很多就一定危險。



加拿大 • 瀛寰搜奇 – Day 13

行程:溫哥華島(天晴)

繼續上一篇Day 13行程。


<<溫哥華島>>

早上在Quinsam River Hatchery的Spawning Channel睇三文魚睇了好耐,小太熊話悶,自己走了去四圍行,佢叫我一陣間在步道上搵佢,因為都有好多人在附近應該唔會有危險,所以便柚佢去。我睇魚睇到12:00左右,見天氣越來越好,便去搵返小太熊諗住一齊行遠啲搵黑熊。

沿着Quinsam Hatchery Trail行到這位置,特然遠遠見到小太熊,佢離遠打手勢叫我靜啲。我慢慢行埋去,見有十幾人站在約1m高的鐵絲網外一言不發不斷影相,有發現呀…


發現有一隻黑熊站在河流的水閘旁邊,佢好似喺度搵緊嘢食。


細心觀察,河流上真的有很多三文魚聚集游來游去,而且相當之肥美,相信這條河流是三文魚洄遊的必經之路,成為了野生黑熊的免費食堂。


呢隻野生黑熊睇佢個樣似係學緊捉魚,見佢大部份時間都係戇居居,偶然撲向三文魚但次次都失手。


見佢連續撲了10幾次都撲空,但佢冇氣餒,今次再來全力一擊,一式「熊霸天下」…誓要魚與熊掌一同兼得~


成功啦,熊仔捉到今日第一條三文魚,雖然過了早餐時間,就當係做168斷食減肥啦。


熊仔好開心,向着我們鐵絲網的位置行過來,越來越近,大家都好緊張~


黐線㗎,從來未有諗過可以同野生黑熊近距離得咁緊要,有啲擔心佢突然撲過嚟,鐵絲網都攔唔住。請勿跟熊太貼,最少保持2米距離…不過真係只有2m,雖然隔着鐵絲網,但感覺上都危險喎~


隻熊仔完全唔理我哋,我哋亦靜靜地影相拍片冇出聲冇騷擾佢,熊仔就將條魚放在地下慢慢享用。


連皮帶肉扯起晒,食到Bob Bob聲響,啲魚頭骨都好硬吓。


好快食完,佢一定好肚餓。食完之又看看四周再舔舔脷,旁邊的加拿大人都輕聲說Amazing。


其實現場只有十幾人,真係唔多,而且有些人勁冇好奇心,掂行掂過唔知發生咩事。

旁邊的加拿大叔叔話佢見過好多次野生黑熊,但從未試過如此近距離睇佢食魚,今日大家非常幸運。加拿大叔叔話這隻是熊BB,正在學捉魚,熊媽媽必定在附近,佢四圍行吓碰碰運氣。

熊仔原來未夠飽,食完便立即回到河上捉魚。又係和剛才一樣,捉了大半個鐘都捉唔到。

特然之間熊仔好似上咗身咁,全力往前撲殺。


一隻手仔打落河水,三文魚被打出水面,危險呀~


三文魚拼命掙扎擺動魚尾,身體橫空飛出,熊仔再睇準飛身一啖,哎呀~


又捉到一條三文魚,今次好大條,目測有接近2kg,今次有排食。


返去剛才的用餐區慢慢嘆,如果上一條是早餐,這條一定是午餐了。


熊仔一啖一啖三文魚刺身食得津津有味,最後剩下一條魚尾,真有衣食。

不知不覺原來已經14:20,睇了超過兩小時,親眼看見熊仔在河上捉了兩條三文魚食。這時加拿大叔叔又回來,佢話在前少少真係遇上另一隻熊,隔着條河和牠行了幾分鐘,佢好開心地俾相我哋睇,真係好近好清楚啊,於是我立即行去碰碰運氣。

回到早上去過的位置,但等了約半個鐘也沒有發現,黑熊應該已經行入森林,唯有返去再等,希望熊仔繼續捉魚。


回到剛才的位置睇,熊仔繼續努力捉魚之際,特然之間見對岸出現另一隻大黑熊,可能就係熊媽媽,不得了…

沒有鐵絲網隔開,只有一條河,熊媽媽不用2秒便可以撲過來食咗我,現在雙手揸了相機冇手攞防熊噴霧,只好立即靜靜地後退,回到安全位置。

熊媽媽沿着河流行了幾分鐘便再次走入對岸的森林。


掛住睇熊媽媽冷落了熊仔,原來佢已經又捉到三文魚,可以嘆下午茶了。


又用兩隻小熊掌撳住條魚,一啖一啖扯啲魚肉食。


食了一半便停下來,好似冥想緊…


特然大叫,露出一口尖利牙齒,俾佢咬一啖真係渣都冇,巧驚呀~熊仔冷靜冷靜。


不得了!熊仔居然用雙腳企起身,爭取時間影啲相便立即後退,哼着「安全第一砵砵命長久~


熊仔好似想爬網過來,大家嚇到雞飛狗走,防熊噴霧出動~


好彩熊仔冷靜返,大家只係on99地企後幾米,防熊噴霧不用出動。


熊仔甚有衣食,返去食埋果半條魚,今次連魚腸魚春頭骨腩都全清,簡直連魚肝油都俾佢飲埋。


最後食埋條魚尾仲抹抹嘴,好鬼得意。

以為佢食了三條魚會夠飽啦,點知未呀,佢又落河搵晚餐,今次好快就捉到,進步神速。

熊仔又咬住一條三文魚行上岸,貌甚得戚。


又返去佢的私熊用餐區開飯。


今次呢條魚的魚皮好靭,扯到好長都咬唔斷。


最後係食魚頭、魚骨和魚尾,又係𡁻到BlockBlock聲。


今次夠飽了,熊仔食完返媽媽度,我哋都散了,今日真係開心。

時間已經15:30,想天黑之前回到酒店,趕唔切去其他景點了。駕車160km回酒店,途經超級市場買些晩餐。

 

 

 

補充資料 :

1.     持有HKSAR護照進入加拿大不須要簽證,但入境前要先在網上申請ETA(Electronic Travel Authorization),費用CAD 7,每次入境最多可停留6個月。

2.     BC Ferries每日各有大約8班船往返温哥華Horseshoe Bay和温哥華島Nanaimo,單程票價CAD 85(私家車連司機),每個額外乘客加CAD 20,船程約1hr50min。這航線常常爆出,最好出發前2星期網上買票。

3.     溫哥華島的最佳觀賞黑熊季節在每年9月底至11月的三文魚洄游季節,此時黑熊為了冬眠準備會頻繁來到河邊捕食三文魚,在三文魚孵化場的步道或河岸邊最易碰到。聽講許多旅客在清晨和傍晚時段遇到,但我只在12:00-15:30見到,清晨和傍晚時段也看不到。

 

 

 

---待續---

「加拿大 • 瀛寰搜奇」18天路線和行程重點(詳細行程可點擊到相關文章)

日數

行程路線

日程重點

Day 01

美國 洛杉磯→加拿大Calgary

黃昏乘 美國西捷航空(Westjet)由 洛杉磯飛到 加拿大洛磯山脈的城市Calgary,晚上住機場酒店Park Inn by Radisson。

Day 02

Calgary→Banff National Park

早上在Calgary機場的Alamo租車,自駕去洛磯山脈9日8晚。下午14:00到達 班夫國家公園,遊覽Johnston Canyon和Bow Valley,再前往小鎮Banff,連續三晚住Holiday Lodge Bed and Breakfast。

Day 03

Banff National Park

全日遊覧Lake Louise,在湖畔山徑健行睇冰川,晚上在Banff的餐廳Chuck’s Steakhouse食牛扒。住Holiday Lodge Bed and Breakfast。

Day 04

Banff National Park

早上在Banff租單車,沿着Rocky Mountain Legacy Trial踩車到小鎮Canmore食午餐,然後回Banff還車,全程50km。住Holiday Lodge Bed and Breakfast。

Day 05

Banff National Park→Jasper National Park

駕車到賈斯伯國家公園小鎭Jasper住2晚。沿途遊覧Bow Lake、Peyto Lake、阿薩巴斯卡冰川(Athabasca Glacier)和Athabasca Falls。晚上住Tonquin Inn。

Day 06

Jasper National Park

全日遊覧Jasper National Park景點 瑪琳湖(Maligne Lake)、藥師湖(Medicine Lake)、Maligne Canyon和到Miette Hot Springs浸溫泉,晚上住Tonquin Inn。

Day 07

Jasper National Park →Yoho National Park

駕車到 幽鶴國家公園住2晚。早上遊Old Fort Point、Goats and Glaciers Viewpoint、Sunwapta Falls和Tangle Creek Falls,在Glacier View Lodge食自助午餐;下午到幽鶴國家公園 翡翠湖(Emerald Lake),入住Emerald Lake Lodge兩晚。

Day 08

Yoho National Park

全日遊覧班夫國家公園Moraine Lake,在湖畔山徑健行睇冰川。下午遊覧幽鶴國家公園Natural Bridge之後回到Emerald Lake Lodge休息。

Day 09

Yoho National Park→Banff National Park

駕車回到Banff住一晚,沿途遊覧Emerald Lake、Takakkaw Falls、Lower Spiral Tunnel Viewpoint、Bow Valley和到Hotel Canoe & Suites浸溫泉。晚上住The Dorothy Motel。

Day 10

Banff National Park→溫哥華

早上到Bow Valley搵熊仔,駕車回到Calgary機場Alamo還車,然後乘飛機往溫哥華;在溫哥華入住Auberge Vancouver Hotel兩晚。晚餐在「皇燕越南美食」吃越南菜。

Day 11

溫哥華

全日在溫哥華市遊覧。早上在Revolver Coffee食早餐,然後去 Maple Tree Square和Gastown Steam Clock。在海旁租單車3小時到Stanley Park踩一個圈。下午在Riley’s Fish & Steak食Happy Hour下午茶,再去Fanny Bay Oyster Bar & Shellfish Market食第二餐下午茶。晚上住Auberge Vancouver Hotel。

Day 12

溫哥華→溫哥華島

早上在SIXT租車4日,駕車到 溫哥華島玩4日3晚。下午參觀 溫哥華島三文魚孵化場Little Qualicum River Fish Hatchery。晚上住小鎮Nanaimo的旅館Buccaneer Inn。

Day 13

溫哥華島

晨早駕車到Nanoose Bay,在沙灘掘蜆、蠔和貴妃蚌。上午駕車到另一三文魚孵化場Quinsam River Hatchery,觀賞三文魚逆流而上的情景;中午在孵化場旁的三文魚河尋找黑熊食三文魚;晚上住Buccaneer Inn。

Day 14

溫哥華島

早上駕車往Gabriola Island ,在島上沙灘掘蜆、蠔和貴妃蚌,回到酒店立即煮來吃。中午往Big Qualicum Hatchery看三文魚和找尋黑熊。黃昏去Stamp River Provincial Park看三文魚和找尋黑熊;晚上住Buccaneer Inn。

Day 15

溫哥華島→溫哥華

早上去Big Qualicum Hatchery看三文魚和找尋黑熊;中午駕車回到溫哥華還車。晚上到米芝連餐廳The Lunch Lady食晚飯。住溫哥華市中心Paradox Vancouver。

Day 16

溫哥華

在酒店食早餐,休息至11:00退房。到海旁租單車6hr,環遊溫哥華市中心景點,包括Granville Island、Stanley Park、Granville Island Brewing飲啤酒和到Earnest Ice Cream食雪糕。還車後去唐人街米芝連餐廳 寶貝(Bao Bei)食晚飯。夜晚乘地鐵去機場。

Day 17

溫哥華→台北

乘長榮航空02:00飛機由溫哥華往 台灣桃園機場,台灣比溫哥華快15小時。

Day 18

台北→香港

05:35到台灣桃園機場,在Plaza Premium Lounge食早餐,乘08:15 - 10:05機回到香港。


8 則留言:

  1. 回覆
    1. 估唔到可以近到咁,好過俾幾千蚊跟Tour去睇。

      刪除
  2. 唔使比錢跟團,可以咁近距離睇到熊仔;真係好抵!

    回覆刪除
    回覆
    1. 今日好彩咋,唔知平時係咪咁易見到呢~不過現場都見到有當地人搵熊仔,應該都有機會見到的。

      刪除