澳洲 悠長假期(24) – 塔斯曼尼亞 薰衣草 • 鮮果園

澳洲塔斯曼尼亞 薰衣草園Bridestowe Lavender Estate

Bridestowe Lavender Estate位於澳洲塔斯曼尼亞北部，是南半球最大薰衣草園，每年12月至1月是薰衣草盛開的季節，整片紫色花海美得可媲美北海道，被譽為澳洲版的普羅旺斯。園區內除了壯觀的薰衣草田，還有紀念品店和咖啡館，人氣的薰衣草雪糕更加是限量發售的必食甜品。Bridestowe Lavender Estate絕對是來塔斯馬尼亞必訪的景點之一。

澳洲 悠長假期 – Day 20

行程：Launceston, Tasmania(天晴)

<<Lilydale塔斯曼尼亞>>

今日以Launceston為基地，自駕一天去附近4個景點兜兜。08:00出車，駕車32km去薰衣草園Bridestowe Lavender Estate，中途經過一個小瀑布Lilydale Falls，落車行一會。

Lilydale Falls – 位於塔斯曼尼亞北部小鎮Lilydale，沿着原始森林步道行500m便到，瀑布高度只有10m，今日水量很大夠壯觀，值得順道一遊。

<<Nabowla塔斯曼尼亞>>

09:30去到Bridestowe Lavender Estate，入場費每位AUD 20，剛剛到時冇乜人，但人潮不斷湧到，一半都講國語的。

Bridestowe Lavender Estate – 真係勁似北海道富良野的薰衣草田啊，幸運今日天氣好好，如果似早兩日便可以唔來了。

入口處是紀念品商店，售賣各種薰衣草產品。

紀念品商店外是一整片薰衣草田，好靚呀，令人心情都開朗晒。

薰衣草熊仔好大隻，打個卡先，一陣間就要排長龍影相。

小太熊見到同類好開心，不過最衰佢哋唔係黃色的。

其他產品有薰衣草茶葉、薰衣草香水、薰衣草精油等等，如果唔係旅程仲有好長一定買好多。

Woodcroft Café – 薰衣草田中的咖啡店，環境非常舒適，小太熊話要食咗薰衣草雪糕先，佢話晏少少會賣晒架。

薰衣草雪糕(AUD 6.5) – 真係有薰衣草香味的，而且幾濃香味不是淡淡的，雪糕的牛奶味也很重，口感柔滑，好食過北海道的薰衣草軟雪糕。

原來香港仲有少少地位，七個指路牌都佔了一席位。

趁人少少出去打卡影相，陣陣微風吹來薰衣草香味，好清新。

一邊欣賞薰衣草一邊食薰衣草雪糕，係好好Feel的。

Woodcroft Café附近越來越多人，我們時間多，便行去最遠處人少的地方慢慢影相。

現場的薰衣草田雖然沒有法國普羅旺斯那麽大範圍，但影相的效果其實差不多。

小太熊自從買了Insta360，就去到每處都叫我跳起拍片，不過佢又每次返到屋企都唔處理啲片，拍埋咁多都唔知點算。

在薰衣草園玩夠之後，駕車25km往果園Hillwood Berries摘新鮮水果。

<<Hillwood塔斯曼尼亞>>

Hillwood Berries – 距離Launceston約30分鐘車程的水果農場，種植高品質的士多啤梨、黑莓和紅莓。農場面積超大，所有水果多在11月至5月期間收成。

農場入口是小餐廳，摘完水果可以坐下立即享用。

水果的價錢也寫在黑板，自己摘完之後在收銀處秤一秤，俾完錢便可以食。

首先在收銀處攞些膠兜，跟便由這起點開始，任摘唔嬲。今日只有紅莓和士多啤梨，其餘仲有黒莓和櫻桃，不過未熟唔可以摘。

紅莓(Raspberry) – 好開心呀，樹上真係長滿了紅莓，唔最大粒唔最紅的唔摘，放進膠兜的都要又甜又多汁。

眼見又真係粒粒都又甜又多汁，很快便摘滿一兜。

跟著去士多啤梨園，士多啤梨好大粒脹卜卜，見到都想食晒佢。

士多啤梨大到好似蘋果一樣，好誇張啊，摘晒佢。

話咁快就摘滿一兜，出去俾錢。

俾完錢便坐下來慢慢食。

在果園即摘即食，大口咬莓吃得滿手果汁，新鮮得過分！11月開始草莓、紅莓等結果，而12-1 月間則到巨型櫻桃當造。

紅莓 AUD 30/kg，這裡摘了AUD 10.2，好甜好多汁，甜過昨天Christmas Hills Raspberry Farm Café的紅莓好多。

士多啤梨AUD 10/kg，這裡摘了AUD 7，好平呀，粒粒都蘋果咁大，而且又甜又多汁，比很多日本士多啤梨更清甜多汁大粒，是澳洲最好食的士多啤梨。

紅莓乳酪雪糕(AUD 7) – 呢杯比較普通，味道很類似阿波蘿的乳酪雪糕，因為大家都係用冰水果加純乳酪雪糕攪出來。

食完之後駕車29km回到Launceston，去今日最後一個景點Cataract Gorge Reserve。

 

補充資料 :

1.     持有HKSAR護照前往澳洲旅遊，要自行申請網上電子旅遊簽證(Electronic Travel Authority - ETA)，ETA有效期1年，持證者在這段期間能多次使用，但每次停留時間不能超過3個月，費用為AUD 20。Google Search有很多非澳洲官方網站也替人申請ETA，排得很前，收費高出多倍，小心。

2.     AUD 1 = HK$5.2

3.     澳洲電壓為220至240伏特，插座設計為三腳斜扁(八字型)，建議在港先買萬用插頭。

4.     塔斯曼尼亞11月的日照時間大約由05:30-20:30。

5.     在塔斯曼尼亞自駕遊很多時也會進入國家公園，須要有門票才可以泊車和進入。今次買了2個月Tasmania Park Pass，票價AUD 93.15包括了一部車和最多8個人，可以網上買票。

6.     今次在YesDrive Car Rental租了「Group B -Toyota Corolla Hatchback」13日12晚，13:00出車至13:00還車，車租AUD 362，另加乜都包全保AUD 360，13天行車總共1751km，入油費用總共AUD 212，租車成本總共AUD 934。平均每1km成本AUD 0.53，大約HK$2.8，貴過在馬來西亞叫Grab。

 

 

---待續---

澳洲 悠長假期 33天路線和行程重點(詳細行程可點擊到相關文章)

日數	行程路線	日程重點
Day 01	香港→新加坡	香港機場KrisFlyer頭等候機室   • 新加坡航空波音777頭等客艙
Day 02	新加坡→悉尼	新加坡無招牌海鮮午餐•新加坡國際機場Terminal 3 – KrisFlyer頭等候機室The Private Room•新加坡航空A380 Suites Class雙人空中套房
Day 03	新加坡→悉尼	悉尼魚市場•悉尼市行街•Hotel W Sydney
Day 04	悉尼→藍山國家公園	藍山國家公園Sylvia Falls•Empress Falls•Wentworth Falls•Lincoln’s Rock睇日落
Day 05	藍山國家公園→悉尼	藍山國家公園Scenic World•Giant Stairway•Spooners Lookout•Three Sisters Walk•Echo Point Lookout
Day 06	悉尼	獵人谷美酒佳餚一天團Chef-Led Hunter Valley Gourmet Food and Wine Tour
Day 07	悉尼	The Bondi to Coogee Walk沿海散步3小時•Bondi Icebergs and Swimming CLUB游水•悉尼歌劇院•6HEAD Sydney晚餐
Day 08	悉尼→Central Coast	在Hawkesbury River租船屋(Houseboat) 5日4晚，在河上生活5日，每日駕船、釣魚和捉蟹。
Day 09	Central Coast	駕船、釣魚和捉蟹
Day 10	Central Coast	駕船、釣魚和捉蟹
Day 11	Central Coast	駕船、釣魚和捉蟹
Day 12	Central Coast→悉尼	早上在船上食完早餐之後回到起點還船，中午回到Sydney，在機場酒店住一晚。
Day 13	悉尼→Bruny Island, Tasmania	早機由悉尼飛往塔斯曼尼亞首都Hobart，在Hobart機場租車12天，首先駕車到Bruny Island，日落前到酒店Shepherds Hut Farmstay@3 Creeks Farm。
Day 14	Bruny Island	早上行2條自然徑Grass Point Track和Mavista Walk • 試食島上人氣小店Get Shucked Oysters • Bruny Island Cheese Company • Bruny Island Honey ; 下午行自然徑Cape Queen Elizabeth Track • 觀景台Truganini Lookout • 晚上在Penguin View Platform睇小企鵝
Day 15	Bruny Island	Alonnah Boat Club釣魚   • 酒莊Bruny Island Premium Wines午餐   • Cape Bruny Lighthouse • Bruny Island Chocolate Co ; 黃昏在Adventure Bay尋找白色袋鼠
Day 16	Bruny Island→Strahan	早上自駕9小時由Bruny Island到Strahan，沿途參觀幾個小景點。
Day 17	Strahan→Cradle Mountain	早上參加6小時船河Gordon River Sightseeing Cruise ; 下午駕車到Cradle Mountain，入住2晚特色酒店Cradle Highlander。
Day 18	Cradle Mountain	Cradle Mountain 9小時攻頂旅程 ; 黃昏在Peppers Cradle Mountain Lodge下午茶，在附近找野生動物。
Day 19	Cradle Mountain→Launceston	早上在Devils@Cradle看塔斯馬尼亞魔鬼 ; 自駕到Launceston，途經壁畫村Sheffield行街和在Christmas Hills Raspberry Farm食甜品，黃昏在Launceston市內行街。
Day 20	Launceston	薰衣草園Bridestowe Lavender Estate • 果園Hillwood Berries摘水果 ; Cataract Gorge Reserve • Launceston著名牛排餐廳Jailhouse Grill晚餐
Day 21	Launceston→Bicheno	早上駕車去Ross Village Bakery食帶子批 ; Melshell Oyster Shack食生蠔 • Lobster Shack Tasmania食龍蝦 • 景點Foreshore Walking Track • Bicheno Blowhole ; 晚上參加Bicheno Penguin Tours睇企鵝
Day 22	Bicheno→Sorell	酒杯灣(Wineglass Bay) • Sleepy Bay • Cape Tourville Lighthouse ; Devil’s Corner Cellar Door午餐 • The Fish Van食生蠔 • Iron Creek Bay Estate
Day 23	Sorell→Hobart	Blue Lagoon Oysters食生蠔•Barilla Bay Oyster Farm食生蠔•Salamanca Market•Hobart市內行街
Day 24	Hobart	Tasmania Seafood Seduction Cruise一日海鮮美酒團
Day 25	Hobart→Adelaide	早上到半日遊Richmond，中午還車後乘機往Adelaide。
Day 26	Adelaide→Barossa→Adelaide	8小時單車漫遊南澳洲葡萄園區Barossa ; 晚上在唐人街晚飯
Day 27	Adelaide→Melbourne	早機往Melbourne，下午參觀Brighton Beach彩色屋 ; Melbourne市內半日遊，Railway Club Hotel晚餐。
Day 28	Melbourne→烏魯魯(Uluṟu)	早機往Uluṟu，下午在Ayers Rock Resort四圍參觀 ; 在酒店的Uluru Lookout看日落和星空。
Day 29	烏魯魯(Uluṟu)	晨早乘巴士到Uluṟu Sunrise Viewing Area看日出 ; 日出後行Mala Walk (2km) + Uluṟu Base walk (11km)，乘巴士回酒店游水休息 ; 黃昏乘巴士去Sunset Point睇Uluṟu日落。
Day 30	烏魯魯(Uluṟu)	晨早乘巴士到Kata Tjuṯa Sand Dune看日出，日出後行3小時Valley of the Winds，黃昏乘巴士去Sunset Point睇Uluṟu日落。
Day 31	烏魯魯(Uluṟu)	晨早乘巴士到Kata Tjuṯa Sand Dune看日出，日出後行70min Walpa Gorge，中午乘巴士去行Liru walk和Cultural Centre，黃昏乘巴士去Sunset Point睇Uluṟu日落。
Day 32	烏魯魯(Uluṟu)→Brisbane	晨早到酒店的Uluṟu Lookout看日出，下午乘機往Brisbane，在機場過夜。
Day 32	Brisbane→Port Vila, 瓦努阿圖	晨早機飛往瓦努阿圖。