澳洲 悠長假期(05) – 悉尼型格酒店W Sydney

澳洲悉尼五星級酒店W Sydney

W Sydney酒店位於悉尼Darling Harbour海旁，外觀採用前衛的波浪型設計，從遠處望見已經非常之特出。酒店的位置優越便利，大部分房間享有海景，而且步行已經可以到達悉尼歌劇院和魚巿場等著名景點，距離最近的Town Hall站只需10分鐘路程。酒店的29/F是無邊際泳池Wet Deck，游水時可以同時俯瞰Darling Harbour港灣，是酒店的一大賣點。總括來說，W Sydney擁有吸引的硬件，可惜酒店的管理失效，令很多住客也不滿意，今次住完之後發現網上的負評十分中肯，主要失分地方包括員工服務態度極之散慢，習慣講大話，做事不認真經常出錯令客人損失金錢和時間，公共地方經常過份擠迫，泳池管理差等等全是管理問題，相信以後也不會再用正常價錢入住其他地方的W Hotel。

澳洲 悠長假期 – Day 03

行程：悉尼(天晴)

繼續上一篇Day 03行程。

<<悉尼>>

下午15:00回到W Sydney，遲了少少，要快啲攞房，等太耐那些生蠔就唔新鮮。

進入地下大堂便見到很大個W燈飾。

Reception 在1/F，要穿過一條幻彩樓梯，設計有點科幻。

乘扶手電梯上1/F像進入時光隧道一樣。

Reception的設計也很時尚，不過其實隔離排了幾十人等Check in，而且職員做得相當慢，睇個勢要等最少半個鐘，不過其實都預咗，因為網上大量評論也是這樣說。

我和小太熊輪住排隊，大家可以各自四圍行吓。

Living Room – 是Reception旁邊的酒吧，坐擁絕佳的Darling Harbour海景，如果時間多其實都想坐低飲杯嘢。

再穿過時光隧道上多一層樓便是餐廳，明天會去食早餐。

等了45min終於排到我們，真超慢，即使有心理準備還是等到有點火，職員這時話我們訂的房被Upgrade了，起初都好開心，點知原來係揾笨～

乘電梯上樓上攞房，步出電梯時差點以為自己去錯了時鐘酒店。

15:00開始排隊，16:00才入到房，攪足1小時才攞到房真係重未試過，W的管理層其實唔死都冇用。

進入房間是一個海景大廳，左右兩邊各有一間海景睡房，好靚呀，但小太熊話「攪錯呀～我訂間房個廳大好多架，俾多一間睡房我有咩用呀，亂咁Upgrade，根本係呢間房租唔出～」

海景睡房其實都又大又靚，如果唔係小太熊咁嬲其實我都冇乜所謂。

因為小太熊太唔高興，所以便返去Reception要求換房，又再排隊等了15分鐘，覺得這間酒店有點不知所謂。

搵返同一個職員話要換返原本訂的房，佢立即找來一個較高級的蛋散，話原本訂了的那房間未執好，估計要19:00前準備好，佢話可以安排另一間類似的房間給我們，客廳只係細一點點，唔覺的。因為想快點解決，所以接受了這安排。

今次上到房後，立即很掛念剛才那高級蛋散的娘親，忍唔住衝口而出問候了佢老母，因為這間房和剛才的完全一樣，唯一分別是少了一間房，個廳同樣咁細，條粉皮講大話講到上晒腦。

又要返去Reception換房，叫條PK執好房便Message我們，我們先返房食啲嘢再去游陣水，唔再浪費時間。

回到房首先開餐，估唔到這生日飯食得咁L激氣。更估唔到這衰酒店去到Check out的一刻仍然要做賤嘢。

Jamiesons Run Grazier Chardonnay (AUD 6) – 下午在Liquorland買的平價澳洲白酒，雖然平過礦泉水，但其實都好飲。這款酒的口感柔和自然，味道清新充滿白桃和柑橘的水果香氣，非常適合搭配生蠔。在房內食海景晚飯仲舒服過出街食。

海膽(AUD 4.72) – 海膽的顏色鮮豔，味道非常新鮮，入口即化口感柔軟細膩，味道濃郁鮮甜而且完全沒有腥味，比西貢吃到的活海膽美味得多，性價比超高。唯一缺點是海膽肉太細片。

Pacific Oysters Coffin Bay (AUD 25.9/Doz) – 產自南澳洲Coffin Bay的生蠔，長期在寒冷且營養豐富的海域中成長，需要12～24個月才可收成，口感爽脆味濃層次豐富，帶有清新的鹹香和淡淡的鮮甜味，有輕微的礦物苦味，餘韻回甘帶甜，非常之新鮮好食，香港的生蠔即使幾貴也不能比較，完全唔入流。

Sydney Rock Oysters (AUD 21.9/Doz) – 產自澳洲東岸的原生岩蠔，生長速度緩慢，需要3～4年才能達到最細的市場規格，味道層次豐富，具有鮮明的海水鹹香、濃郁的鮮甜及豐富的礦物感，餘韻悠長，肉質柔軟滑嫩，比Pacific Oysters更細膩爽口，是世界頂級的生蠔，不單是澳洲最好食的生蠔，我覺得比以往在法國吃過的所有生蠔也更好食。

芝士焗龍蝦(AUD 28.5/半隻) – 芝士很香可惜龍蝦肉和預期一樣的彈牙淡口，談不上鮮甜，下次唔再買；芝士焗帶子(AUD 4.5/每隻) - 芝士加了薯容一齊焗好好味，帶子肉細到差點找不到，好彩尚算鮮甜美味。

食完飯下個節目是去酒吧飲Welcome Drink，Check in時送了一張Coupon，送2杯免費特飲。

去到Welcome Drink的酒吧，Bar Tender話16:00後不可以使用Coupon。話Coupon只可以在12:00~16:00用……我哋明天一早要Check out去藍山呀，飲你條命，唔L怪得這W大酒店這麽多負評，佢真係自己攞嚟，其實唔送Coupon便冇事，又要送但又要送得賤格樣衰。

29/30 Rooftop Bar – 位於酒店頂部的全海景酒吧，泳池正正在下一層，可以邊飲邊𥄫住人游水，不過今日的主要目的是自己游水不是𥄫人游水。

從上而下望，原來泳池有兩大隻水母圖案。

Wet Deck – 29樓的WET Deck露天恆溫無邊泳池，職員話今晚有Function，18:00開始Close了….. 屌，Check in時條粉皮又唔講，如果知道便游完水先至食飯，開始想寫信去W總公司投訴班白痴，太不知所謂了。

都差不多19:00，但Reception仍然未Message我換房，於是又走去1/F找佢哋晦氣。落到去Reception至知原來房已經執好，終於可以換返原本訂了那間房「Oasis Studio Harbour View」，要19:00至俾到房個客，個Staff仲完全覺得好正常冇任何問題，W集團應該冇得救了。

Oasis Studio Harbour View(包括早餐)每晚HK$3504 – 這雙人海景套房的客廳比剛才大最少一半，還有個開於式廚房，落地玻璃也濶多一半，開揚舒服得多。

睡房和剛才的一樣大，裝飾也是差不多。

衣帽間大過屋企間房。

浴室也是超大，有齊浴缸和淋浴間。

在房間休息夠之後，到現在唯一仍開放的室內泳池游一會兒水，其實這泳池也很開揚。

回到房間之後食宵夜，煮了一個 辛辣麵，下午在超級市場買的，AUD 8有5個。

澳洲芒果(每個AUD 2.9) – 又係超級市場買的，又大又甜又多汁好好味，而且價錢平，下次見到再買。

雖然這酒店的Staff不知所謂，但今次好彩沒有遇上其中一大負評～床單有污跡，這房間確實係唔錯，瞓得好舒服。

澳洲 悠長假期 – Day 04

行程：悉尼(天陰) → 藍山(Blue Mountain)(天晴)

今日會去 藍山國家公園住一晚，早上在酒店歎到夠鐘便Check out。

昨日天台泳池關閉，所以今日晨早06:30一天光便上來游水，不過朝早真係好凍呀，凍到震果隻，草草游了半個鐘便要離開，小太熊直程落唔到水。

BTWN Modern Australian – 07:00開始在這2/F餐廳食早餐，餐廳坐落於高速公路旁邊，行過的司機也會看見我們歎早餐，並露出羨慕的眼神。

早到早享受，坐到窗口位，07:15之後已經沒有窗口位揀。08:00開始更加要等半個鐘才能入場。

自助餐好多嘢食，麵包款式又多又好食。

水果的種類不少，有香港比較少食的熱情果，仲有冷壓果汁。

葡撻好正，好食過葡萄牙里斯本的多多。

今餐要盡量食多一點，因為往後的酒店全部唔包早餐，而且今日要晚上才有時間再食嘢。

每人包了一份雞蛋，小太熊要煎蛋，我食炒蛋。

08:30回房執行李，離開時見餐廳大排長龍，半個鐘都未必等到，難怪網上勁多人媽叉這酒店。

在Reception交還鎖匙退房，Staff查了一會兒電腦便說沒有欠款，費用已經全數付清，我們便離開，行500m往Town Hall Station。行到一半，小太熊的電話特然收到銀行Message，顯示信用卡被扣了AUD 469房價加AUD 200房間押金共AUD 669，即是酒店扣了兩次房租再扣多AUD 200房間押金。我們立即回酒店問，那Staff氣定神閒又查了一會兒電腦，說冇問題呀，收多了的共AUD 669可以立即Refund回信用卡。

因為信用卡要把澳元轉回港幣，這麼一出一入便饋了5%滙價，大約HK$200。小太熊好激氣，寫email去投訴，酒店才極度無恥地再退回AUD 30，根本唔夠Cover個滙價損失，賤到核爆，住了幾十年酒店都係第一次遇上這麼PK的酒店，真係唔知係Staff 賤還是管理層賤，相信係各自賤鬥賤。

 

 

 

補充資料 :

1.     持有HKSAR護照前往澳洲旅遊，要自行申請網上電子旅遊簽證(Electronic Travel Authority - ETA)，ETA有效期1年，持證者在這段期間能多次使用，但每次停留時間不能超過3個月，費用為AUD 20。Google Search有很多非澳洲官方網站也替人申請ETA，排得很前，收費高出多倍，小心。

2.     AUD 1 = HK$5.2

3.     澳洲電壓為220至240伏特，插座設計為三腳斜扁(八字型)，建議在港先買萬用插頭。

4.     尼悉11月的日照時間大約由05:45-19:30。

5.     悉尼市的公共交通工具都使用交通卡Opal Card，可以在機場的WH Smith Bookshops購買，出卡是免費的，每次Top up最少AUD 35，平日乘車用超過AUD 18.7便會封頂不再扣錢，星期五六日和假期的封頂價更加只係AUD 9.35，每星期的封頂價是係AUD 50。Opal Card可以在遠至Blue Mountain和Central Coast也可以使用。Opal Card可享轉乘優惠，只要刷卡後60分鐘內轉乘地鐵、火車、渡輪、巴士或輕鐵均可享AUD 2折扣；週末、公共假期和非繁忙時段可享30%的票價折扣。

6.     悉尼的公共交通可以在新南威爾士州的網站「Trip Planner」搜尋，巴士火車地鐵輕鐵班次也可以搜尋到，很好用。

 

 

---待續---