澳洲悉尼近效 ～ 中海岸的歴史基建Hawkesbury River Railroad
Bridge
澳洲中海岸(Central
Coast)位於悉尼以北約60km，是悉尼人的度假勝地，每逢週末也會很多人和家人朋友到 中海岸租船屋度假。中海岸的Ku-ring-gai
Chase National Park是澳洲第二古老的國家公園，滿佈岩石峭壁、河川和紅樹林，很適合自駕船屋慢慢探索。除了駕船，中海岸還有很多旅遊節目包括 蠔場體驗、果園採摘和農場體驗，絕對多姿多彩。
澳洲 悠長假期 – Day 09
行程：中海岸(Central Coast)(天晴)
<<中海岸(Central
Coast)>>
昨晚在Restaurant Peats Bite的私人浮標泊船過夜，今朝瞓到好宴才起身。
今日的行程預計會向下遊進發，沿途釣魚捕蟹，晚上在America Bay過夜。
今日天氣好到不得了，開船後經過 Milson Island。
Olga
Bay – 是一個古老的沙灘和紅樹林，環境超正，在這裡落錨煮早餐食。
幾隻 海鷹(Sea Eagles)飛來飛去，牠們的顏色和動態也好靚。
小太熊煮早餐，我唔做了，要做大爺。
早餐好好食，有齊火腿煎蛋牛油多士番茄和桃駁李。
原味出前一丁麻油麵，正呀。
食完早餐繼續開船，去到The Motorway Bridge時發現河上好多水母。
馬賽克水母(Jelly Blubber) – 近年在Hawkesbury River大量出現的水母，有輕微毒性，因此河上不宜游水。
Long
Island – 在這裡落錨釣魚捕蟹，但冇收獲。
Hawkesbury
River Railroad Bridge - 澳洲新南威爾士州的重要鋼結構橋樑，於1889年落成的古老基建。看見很多網上影片也在這裡釣到大魚，所以再落錨釣魚捕蟹，但依然冇收獲。
Brooklyn
– 火車站Hawkesbury River Station所在的小鎮，兩天前的獵人谷一日遊便是在這裡食早餐。見附近有船垂釣中，又停咗下來 釣魚捕蟹，但依然冇收獲。
時間過得很快，停了幾站釣魚，來到今日的終點America Bay已經17:30，泊好船又要開始煮飯，都幾忙碌。
America Bay – 很有大自然美的天然內灣，有多達一百個可使用泊船的浮標，環境清幽，是泊船過夜的熱門地點，今日星期六，附近泊了很多船。
又係歎紅酒的時候，現在才敢飲，唔怕醉駕。
今日晚餐由我和小太熊輪着煮，我煮Pasta佢焗雞髀。
粟米吞拿魚番茄長通粉 – 和昨晚的意大利粉差不多味，雖然算好食不過開始有啲食嫌。
海鹽蜜糖焗雞髀 – 澳洲的雞髀和英國一樣平到唔信，而且品質高，有肉味肉質又鮮嫩，焗得外皮微焦，香脆好味。
今日又係冇魚加餸，大失所望。
天上星星沒有昨晚那麽多，但蟲嗚聲音響片山谷。
澳洲 悠長假期 – Day 10
行程：中海岸(Central Coast)(天晴)
今朝07:30起身，America Bay一片平靜，好好Feel，深呼吸了幾口，感覺空氣都特別清新。
今日預計先北上回到三江並流位置釣魚捉蟹，然後向南行進入幾個峽灣，晚上在Smiths Creek泊船過夜。
首先駕船北上到三江並流，那是一處河川和大海交滙的咸淡水三叉位置，網上資料話比較多大魚。
落好錨之後開始釣魚，估唔到在最多魚的區域依然食白果，問題是河裡真係冇魚，而且這河口十分繁忙，很多大船經過，其中一艘大型飛翼船更加近距離駛過翻起大浪，攪到我差點反船和打爛晒啲碗碟，太危險都係早點離開。
10:35把船駛到Yeomans Bay，在下這裡落錨。
Yeomans
Bay – 是一處風平浪靜的天然峽灣，很有靈氣，在這裡煮早餐食。
早餐雖和昨天一樣，但又完全沒有食嫌的感覺，日日食都好開心。
出前一丁麻油麵仍然是最好食的即食麵。
食完早餐之後想起錨，點知鐵錬收到一半便撠住停了，嘗試修理但都唔成功，只好Call船公司幫手，估唔到佢哋效率很高，這麽遠距離但不用1小時便到。
一位哥哥仔乘着這艘快艇來救駕。
工具只有一個鎚仔，看來佢修理慣了，呢艘船個錨成日都係咁。
今日太陽很猛烈，甲板熱到蛋都煎熟，哥哥仔好辛苦地整了大半粒鐘終於修理好，佢叫我盡量用浮標泊船，盡量唔好再用這錨，一定要用都唔好落到盡喎，我都知今次我放盡了個錨，但我鬼知你隻船咁流咩。
無無聊聊便Hea了半天，船屋的生活就係咁Hea，鐘意煩囂都市的人真係唔啱玩，好彩我係鐘意無聊生活的人。
中午又再起航，原本計畫路過Cottage Point的時候把船泊在公共浮標，划小艇埋岸(因為碼頭是私人，不可以泊船屋)到Cottage Point Kiosk吃點炸魚薯條，不過原來那公共浮標離岸勁遠今日水流又急，我冇信心隻小艇不被沖走，要Pass這節目了。
沒有地方去，於是直往今晚的停泊點Smiths Creek，那裡只有4個浮標，今日是星期日很多Dry
Trip船，所以加埋附近的10個浮標都泊滿船，唯有暫時落錨釣陣魚，不過水真係好深，定唔到隻船，於是又四圍兜吓風。
等到15:15終於有艘船離開，可以泊好隻船。
Smiths
Creek – 位於Ku-ring-gai Chase National Park內的一條隱蔽的小溪，是Hawkesbury River的支流，環境是三晚最好的，有種隱世出塵的感覺。
這裡的水流很怪，不時會轉方向，所以船泊了在浮標後依然轉來轉去，可能自己泊得差啦。泊好船又開支酒Hea吓。
Hidden
Gem Semillon Sauvignon Blanc 2024 (AUD 6) – 在Coles買的白酒，主打檸檬的果香，口感清爽醒神非常易飲，性價比高平過飲汽水。
開包薯片送酒，在Smiths Creek食Smith’s Chips特別有Feel。
附近的鄰居全家出動去釣魚，我哋食完薯片又釣魚先。
不久之後終於有第一條魚上釣了，感動到呢….，上次在珀斯玩船屋呢啲魚多到食唔晒要放生，今次佢唔好彩了。這條海鯛好鮮甜架。
海鯛(Snapper) – 銀色身體帶金屬光澤，體側有藍點，背部略深色，體型側扁。聽講這種魚在Hawkesbury River很常見，是當地受歡迎的食用魚。
小太熊快手快腳便把魚劏左，加點鹽醃吓，佢冇得上訴了。
用焗爐焗一會，原味鹽焗海鯛便製成，勁鮮甜呀，魚肉脆嫩鮮美，好好食。
食完冇耐又一條上釣，是黃鰭鯛。
黃鰭鯛 – 只有200g左右，聽說這種魚常見於澳洲的沿海鹹淡水域。
這條魚的肉質較腍，鮮甜度只係上一條的80%左右，都算好味。
慢慢一口一口試真些，難得有魚食，可惜仍然沒有蟹。
Smiths
Creek的彩雲日落色彩鮮艷簡單，很快又過一天。
今晚有茄汁沙甸魚加出前一丁麻油麵，送白酒好正。
又係鹽焗雞髀，還未食嫌。
番茄火腿芝士焗多士又係正嘢，今晚好豐富。
夜晚星星勁多，攞杯酒上船頂慢慢睇。
很快在船上過了3晚，覺得時間真的很快。
補充資料 :
1. 持有HKSAR護照前往澳洲旅遊，要自行申請網上電子旅遊簽證(Electronic Travel Authority - ETA)，ETA有效期1年，持證者在這段期間能多次使用，但每次停留時間不能超過3個月，費用為AUD
20。Google Search有很多非澳洲官方網站也替人申請ETA，排得很前，收費高出多倍，小心。
2. AUD 1 = HK$5.2
3. 澳洲電壓為220至240伏特，插座設計為三腳斜扁(八字型)，建議在港先買萬用插頭。
4. 尼悉11月的日照時間大約由05:45-19:30。
5. 船屋Mariner Cruisers
(OPA)的 5日4晚租金AUD
1450，另加清潔費AUD
35，租用床單被鋪AUD
50，燃油費AUD
385(每開船摩打1小時收AUD
35，我5天共開了11小時)，即5日4晚總費用共AUD
1920。
6. 釣魚和捕蟹是船上的主要活動，但船上沒有相關用具，必須自備。旅客可以在悉尼魚市場的釣魚用品專門店Net & Tackle Sales買釣魚用品和捕蟹籠，價錢不貴，租船公司Hawkesbury Afloat有魚餌和蟹餌賣。
7. 船上有800升水，二人用了5天也很足夠，不用慳住用。如果用完便要回到船公司補水。
8. 在Hawkesbury River釣魚和捕蟹需要在網上買釣魚許可證，每人AUD
14，有效期7天。
9. Hawkesbury River不宜游水，因為日落和日出時是鯊魚進食的時間，河上也有很多有毒水母。
10. Hawkesbury River沿岸的碼頭全是私人碼頭，Houseboats不可以停泊，只可以泊在河上公用的浮標。
11. 在Hawkesbury River自駕船屋相對珀斯和黃金海岸的船屋都沉悶，因為登岸困難、很少機會上岸用餐、很難釣到魚和捕到蟹。但如果是第一次自駕船屋，相信仍然會覺得非常之有趣好玩。
---待續---
澳洲 悠長假期 33天路線和行程重點(詳細行程可點擊到相關文章)
終於有魚上釣，好在冇食白果😀
回覆刪除係囉，感動到呢～幾驚4日都釣唔到一條
刪除你條魚矜貴過老鼠斑😆
回覆刪除梗係～老鼠斑仔在街市只係賣HK$168，今次套釣魚用具都唔只～
刪除