馬來西亞怡保 新江河魚酒樓 ～ 野生巴丁魚
馬來西亞境內有大量河川，盛產鮮甜肥美的野生河魚，包括全世界身價最高的河魚「忘不了」。除此之外，野生「巴丁魚」也是其中一款性價比高的河魚，品質不在忘不了之下但價錢親民得多。馬來西亞怡保的「新江河魚酒樓」是一間有70多年歷史的酒樓，專門提供野生河魚和各類新鮮水產，並以廣東菜形式烹調，絕對能煮出每款河魚的鮮味。除非不喜歡食魚，否則一定要試。
森山 • 尋味 馬來西亞– Day 05
行程：北海(天晴) → 怡保(天晴)
<<檳城>>
今日會坐火車去怡保，早上06:00起身執行李，叫Grab往北海火車站，2km距離車費RM 7.2。
北海火車站
去到剛剛開始日出，今日天色好靚。
在車站大堂坐一個鐘，真係夠鐘開車才准入閘的。
KTM火車票要一早上網買，即場買會冇位，每位RM 34。
07:50 - 09:45乘這列快車往怡保，比從前快了一個鐘左右。
<<怡保>>
09:45準時到達怡保，首先順路去附近的 怡保舊街場食早餐，沿途穿過 怡保歷史遺產步道(Heritage
Trail Ipoh)，都有些小景點。
怡保火車站 – 於1917年正式啟用的火車站，由英國建築師設計，有馬來西亞泰姬陵的稱號，車站大樓從前是酒店，但已經摺埋很多年，荒廢到現在。
怡保市禮堂(Ipoh
Town Hall) – 禮堂建於1916年，與怡保火車站均由同一位英國建築師設計，是怡保市的地標建築之一。
怡保畢治紀念大鐘樓(Birch Memorial Clock Tower) – 1909年建成的鐘樓，為了紀念霹靂州第一位英國居民而建造。
Sultan Idris Shah II
Mosque – 於1968年落成的馬來西亞霹靂州立清真寺。
怡保歷史遺產步道(Heritage Trail Ipoh) – 集中展示怡保殖民時期建築的一條徒步路線，從火車站一直連接到舊街場，沿途有許多保存良好的歷史老屋和街巷。
天津茶室(Restoran
Thean Chun) – 始創於1944年，是怡保舊街場最有人氣的茶室之一，這裡的 雞絲沙河粉最美味，每次來怡保也一定食一碗，雖然上次的味道跌了Watt，仍然未放棄佢。門口檔河粉檔要08:30才準備好。
室內裝修50年不變，充滿人情味，門口檔 雞絲河粉是必食之選。
雖然裝修50年不變，但價錢牌每次到來也在變啊，講錢就冇乜人情味。
想食河粉要自己到檔口落Order，怡保最好就係主要用廣東話，溝通完全冇問題。
凍白咖啡(RM
3)；熱白咖啡(RM
2.8) – 只是普通好飲，香滑濃味比不上街內其他老牌茶室。
雞絲沙河粉(RM
11) – 河粉是用怡保獨有的地下水製造，超級異常軟滑，湯底用了蝦頭和雞殼熬製而成，但今次欠了以前入口鮮美的感覺，又再次失色了，每次來的水準也是升升跌跌很不穩定，下次可能唔再來食了。
怡保芽菜(RM
3) – 用怡保獨有的地下水種植，肥大清甜爽口，令人食到唔停得口，保持水準。
新源隆茶室(Kedai
Kopi Sin Yoon Loong) – 自1937年已經開業，是怡保著名的老字號茶室，店內仍然保留數十年前的古老裝飾，馳名的 怡保白咖啡就是在這間茶室誕生。今日大把Quota，入去歎返杯真正的怡保白咖啡。
今日唔算多人，有一兩張吉枱。
凍白咖啡(RM
3)；熱白咖啡(RM
2.8) – 味道仍然甘香濃郁口感順滑，一場來到怡保都唔去呢間飲杯咖啡實在說不過去。
咖央多士(RM
3) – 麵包烤得很鬆化卻又保留了麵包原有的軟韌質感，口感一流，咖央醬就欠了點椰香，但也好好食。
南香茶餐室(Dai
Makanan Nam Heong) – 位於舊街場最尾位置的南香茶室創辦於1958年，也是1999年創立的大型咖啡連鎖店 舊街場白咖啡(Oldtown
White Coffee)的發源店。今次食唔落了，要下次。
慢慢行2km去酒店Check in。
ICC Suites Hotel – 建於2024年的新酒店，大廈有一半是酒店，另一半是服務式住宅，所有住客共用同一會所，所以健身室和泳池也非常大。
雙人房(不包括早餐)每晚HK$346
– 房間非常之大，有齊家俬電器和小廚房，不過廁所漏水，唔多掂。
露台超級大，有落地玻璃勁開揚。
健身室比較一般酒店大得多。
泳池旁邊有住客餐廳
由酒店乘Grab到三媽芽菜滑雞飯，5km距離車費RM
8.2。
三媽芽菜滑雞飯 – 2017年才開業的怡保人氣店，近年被網上大合唱吹到上天咁好食，主打怡保名物芽菜和菜園雞，曾獲得本地美食獎AsiaTop 80 Award 2020，本地人對她的評價也非常高，推崇她是怡保芽菜雞的代表之一。
凍烏龍茶(RM
0.7) – 很清淡茶味不夠。
菜園雞半隻(RM
39.2) – 烹調火候恰到好處，雞皮滑溜雞肉鮮嫩帶有彈性，雞味比較淡，靠特製醬油撐起味道，入口有少許麻油香，整體上好食，但和其他老店「老黃芽菜雞」或「高温街芽菜雞」比較肯定不是更好。
招牌三媽雞腳(RM
9.6) – 勁正。雞腳燉得入口即化充滿骨膠原，滑不溜口，滷水汁滿滿藥材香味，好食過菜園雞。不過這種質素的雞腳其他老店也一樣有。
「三媽芽菜滑雞飯」沒有給我任何驚喜，不過都預咗。
乘Grab去「啊耀榴槤專賣店」，8km距離車費RM
10.3。
啊耀榴槤專賣店 – 怡保較有名氣的榴槤檔，主要做街坊生意，由耀哥 周良耀主理，與霹靂州和彭亨州的果園合作，每天直送當日從樹上掉落的新鮮榴槤，售賣的榴槤主要包括貓山王、黒刺、D24、竹腳、紅蝦、五指果等等名種榴槤。上次食了一個超靚的「苦王」，所以今次再來幫襯。
今日唔係太多貨，我們幫襯期間有很多街坊揸車來買，一買就幾個。
價錢其實唔算平喎，可能因為質素穩定，所以咁多街坊幫襯。
揀返個即開即食先，耀哥一眼就認得我上年幫襯過佢，同檳城阿姐一樣咁好記性。
揀了個第一次食的「石頭榴槤」，每1kg - RM 26，屬於平價榴槤。
一刀破開有點失望呀，冇乜皺紋，一定唔係頂級貨。
石頭榴槤(RM
38) – 重1.5kg，外皮光滑乾爽脆口，果肉的黏稠度75%口感算滑，甜味中等苦味均衡，奶香一般層次感較單薄，值80分。
隔離枱是一枱移了民的怡保人，今次回來特登來吃怡保特產榴槤「五指果」。佢哋開了幾個，大家交換來試試。佢請我哋食了「辣椒仔」，覺得很普通，只值70分 。另外再請我哋2件「五指果」，都係80分左右。
多奶王(RM
38) – 賣RM
30/kg，這個重1.3kg。 外皮乾爽皺紋清晰，果肉的黏度達85%，味道濃烈大苦小甜層次感分明，口感甚佳餘韻一般，屬85分的高質貨。
今日食唔返上年的頂級榴槤，小太熊有點失望，我就冇乜所謂，因為都知道最頂級的榴槤可遇不可求，也不是買最貴價的榴槤便可以食到。
乘Grab回到舊城區，4km距離車費RM
9.3。
山水豆腐花(Sansui
Tau Fu Far) – 頗受本地人喜愛的老字號豆腐花店。
薑糖豆腐花(RM
2.8) – 豆腐花用怡保地下礦泉水製造，不加石膏粉便能凝固，口感幼滑豆味也夠，好食 ; 豆漿(RM 2.9) - 夠豆味但太甜，唔啱飲。
乘Grab去 新江河魚酒樓食晚飯，7km距離車費RM8。
新江河魚酒樓 – 市內一間食河魚的中式酒樓，以廣東技術烹調，餸菜很啱胃口。
我們早到，做第一枱客，不過食完都係得好少人。
河魚的價錢唔平架，不過值得的，因為真係覺得好食。
大嘉士佰啤酒(RM
22.8)
黃飛鴻踢沙豆腐(RM
19.1) – 名字古靈精怪，豆腐味淡，口感外脆內滑，鋪滿炸脆了的辣椒，入口相當刺激，值得一試。
溫泉蛋蒸河蝦(RM
93.5) – 每100g/RM
17，即係每兩HK$13左右，唔貴。這隻河蝦重550g，酒樓的特色菜之一。這道菜是用日本雞蛋製作的溫泉蛋，配上香味濃郁的清酒和秘製醬油，配上龍蝦般大的怡保河蝦蒸製。溫泉蛋口感滑嫩，河蝦爽口彈牙但欠了鮮甜，蝦肉味比較淡，而且沒有了以往最欣賞的甘香河蝦膏，整體上只算普通，如果可以再選擇我會唔叫。
清蒸野生巴丁魚(RM
151.5) – 每100g/RM
23.3，這份魚重650g，伙記話是從3kg重的大魚分切出來的，是酒樓的招牌菜之一。魚肉口感脆嫩鮮美，沒有細巴丁魚的超級嫩滑，肉味鮮美魚油超甘香，魚皮爆厚質感軟滑帶韌性，超級好食的100分河魚，比「忘不了」更好食，性價比高，下次再食。
西瓜 – 免費的飯後果，又甜又多汁又夠凍，有誠意。
乘Grab回酒店，4km距離車費RM
6.2。
ICC Suites Hotel – 日落前在酒店游陣水放鬆一下。
泳池可望見怡保舊城日落，好好環境喎。
補充資料 :
1. 持香港護照可以90天免簽証入境馬來西亞，入境前網上填寫Malaysia
Digital Arrival Card (MDAC)。
2. 在旺角找換店「世一兌換」換現金HK$1.861=RM
1 (尖沙咀永恆貴少少HK$1.888=RM
1)。文章列出的價錢已包括了所有稅項和服務費。
3. 從檳城去怡保可以乘火車，須在 北海火車站上車，最好網上預早一星期買票，否則買不到理想班次。車程約2hr，每位RM
34。
4. 怡保現在市面上已經沒有的士，馬來西亞雖然有幾個叫車Apps，但只有Grab可以真正叫到車，其他Apps次次都話冇車。
5. 在怡保用Grab叫車的價錢不斷升升跌跌，最高和最低價錢可以相差2倍。每1km的價錢RM
1~2。
---待續---
「森山 • 尋味 馬來西亞」旅程，詳細行程可點擊到相關文。
你可以帶團去馬來西亞
回覆刪除唔得架，帶了團自己就冇得玩，唔適合我啊😬
刪除