森山 • 尋味 馬來西亞(完) – 怡保 • 吉隆坡 年度約會

馬來西亞怡保 東泰茶舖(Dong Tai Kopitiam Pasir Pinji) 娘惹糕點

馬來西亞怡保的 東泰茶舖(Dong Tai Kopitiam Pasir Pinji)於2021年由2位年輕人創立，是一間相當受歡迎的茶室，主打傳統南洋美食。他們均來自有數十年飲食業背景的家庭，製作出非常出色的怡保地道美食，尤其以白咖啡、牛油咖央多士和娘惹糕點的水準超高，絕不比舊街場的老店遜色，令人驚喜。

森山 • 尋味 馬來西亞– Day 07

行程：怡保(天晴) → 吉隆坡(天晴)

<<怡保>>

今朝瞓到安樂醒，攞埋行李早上食多兩餐便離開怡保。在酒店Grab去餐廳，3km距離車費RM 5。

同樂軒肉骨茶餐室 – 很受本地人歡迎的肉骨茶店，見很多街坊也揸車來買外賣走。

點了肉骨茶之後立即加湯加料加熱。

羅漢果涼茶(RM 2.2) – 真材實料甘甜好味，十分之清熱，估唔到咁好飲；油炸鬼(RM 1.5) – 肉骨茶的靈魂，索滿肉骨茶之後非常好食，淨食或送飯都係一流。

瓦煲肉骨茶(RM 18) – 豬骨燉煮於濃鬱藥材湯中，湯底藥材味濃郁，豬骨的肉味香濃，搭配了豆腐卜，好食。

細油菜(RM 4) – 拚了秋葵、唐生菜和菜心苗，鮮嫩非常，加埋肉骨茶湯更好食。

芋頭飯(RM 3) – 淨食已經很好食，送埋肉骨茶更加正。

行1km去另一間網紅介紹的人氣食店 永發小炒飯店，小太熊睇完之後好想試吓。

永發小炒飯店 – 是一間賣小炒的大排檔，早上有雞絲河粉供應，話好正喎。

坐低之後立即叫一碗雞絲河粉，小太熊話佢哋會好早賣晒就收工。

薏米水(RM 2.6) – 好飲啊，用料十足勁多薏米，味道又濃又唔係太甜，夠冰凍消暑解渴。

雞絲河粉(RM 8) – 河粉超滑雞絲又嫩口，湯底的蝦味濃郁，但不知為何加了味精，多了很強的濃鹹味，食完勁口乾，破壞了碗粉，如果唔加味精一定好好食，白白浪費了美食。

10:15剛剛食完，見檔主真係買晒收檔了，想食味精河一定要10:00之前到。再行500m去最後一間食店。

東泰茶舖(Dong Tai Kopitiam Pasir Pinji) – 上年來過一次覺得好正，今次再來。

店舖裝修設計古式古鄉，工作人員全是年輕人，快手快腳充滿活力。

上次只看餐牌叫嘢食，錯過了門口餐牌沒有寫的鮮製娘惹糕點，今次補返。

凍東泰白咖啡(RM 6.4)；熱東泰黑咖啡(RM 4.1) – 咖啡香滑濃郁味道醇厚，冷熱同樣高質，但怡保天氣太濕熱，我喜歡凍咖啡多些。香蘭咖央蛋糕(RM 4.4)；蛋撻(RM 2)；藍花糯米飯(RM 2.8)；斑蘭糕(RM 2.1) – 蛋撻脆香；香蘭咖央蛋糕像海綿般軟綿綿，小小甜班蘭味芳香；其他糕點也超班，軟靱甜度適中，非常之好食。

牛油咖央多士(RM 6.9) – 麵包烤得香脆鬆化又能保留原有的軟韌質感，口感正到冇朋友，咖椰醬和雪牛油份量十足味道甘香椰味濃郁，是必點之選。

乘Grab去火車站，3km距離車費RM 6。轉乘12:05 - 14:40火車往 吉隆坡中央車站(KL Sentral)，車費每位RM 42。

<<吉隆坡>>

KL Sentral是吉隆坡所有鐵路和巴士的交滙處，十分之複雜但指示牌設計甚差，叫Grab很難夾到司機位置，要問人才知道Monorail的位置，馬拉人做事確實比較求其是但。

KL Sentral Monorail 8號(綠色)線 – 沒有指示路牌，問了職員之後要上扶手電梯再穿過商場才能找到，首先在售票機買車票去Bukit Bintang。

Bukit Bintang – 吉隆坡市中心的輕鐵站，附近是時代廣場和亞羅街(Jalan Alor)，這區來過無數次，唔睇地圖都認得路。

Sleeping Lion Suites – 從火車站行10min來到酒店，上年住過覺得ok，不過今次有很差經歴，下次一定唔再住。

Check in大堂唔知點解長期都坐滿人，又唔係等Check in，個個on99看手機，古古怪怪的由早到晚都係咁多人。

雙人房(RM 217) – 頂，今次派了尾房，個窗比上次細了幾倍。

窗外的景色依然開揚。

酒店的空中住客休息室，因為是開放式設計沒有冷氣，天氣又熱又焗勁唔舒服根本唔會有人休息。

空中健身室又大又冇人，住客們都幾懶惰。

天空之橋連通酒店大樓和服務式住宅大樓，部分會所設施是共用的。

上天台泳池游水，很多人但勉強可以游到，其實這麼多住客泳池又細，今日已經唔算人多了。

行去附近按摩，順便看看四圍有冇變。

十號胡同 – 位於 樂天廣場(Lot 10)地牢的美食廣場，匯聚了很多馬來西亞極具歷史和傳統的過氣街頭美食攤位，如 金蓮記福建炒麵、何榮記雲吞麵、大樹頭蘇記炒牛河等等，就算去總店食都已經變晒質，睇佢幾時摺埋。

亞羅街(Jalan Alor) – 吉隆坡最旺的食街，食店營業至三更半夜，每晚也人山人海，這𥚃的 黃亞華燒雞翼質素多年來也很穩定，不過今次趕時間唔食了，下次還會考慮再食。

街上的海產個樣幾靚，不過打死我都唔信會好食。

點心五顏綠色每次見也覺得好靚，不過要放入口就真係冇乜興趣。

終於在亞羅街尾找到小太熊個朋友Selina介紹的RM 100 – 3個貓山王，又細粒形狀又怪根本唔吸引，那有Selina講到咁抵食，條友都係呃人的。

亞羅街條後巷以前又濕又臭，現在改為暗渠，雖然仍有渠臭味但已經衞生很多。

亞羅街後巷也有大的榴槤檔，價錢唔貴喎，唔知老唔老實，下次可以一試。不過小太熊以前在附近買貓山王被馬拉佬呃過錢，戒心好重。

按摩店位於亞羅街附近，這座Starus Hotel Bukit Bintang的1/F。

Health World Spa and Message – 訂了2hr全身按摩，可以俾ApplyPay，這店幾乾淨，師傅是男對男女對女的。

首先坐低飲杯薑茶，等師傅準備。

今次做2hr全身按摩，兩位特價共收RM 252。師傅們首先替我們洗腳。

今次男女師傅的手勢也合格，不是頂級也不算差，可以再來幫襯。

按摩完之後行去食晚飯，小太熊找了一間近年大熱的海鮮店，話網上很高評價。

海腳人TRX店 – 真正非常受歡迎的海鮮餐廳，獲得了米芝蓮推薦，營業時間至凌晨兩點。去到時已經大排長龍，等位的大部份是本地華人。

雖然店內很多座位吞吐量大，仍然排了40min才有位，而且今日不是假期。

廚房是開放式，清潔衞生，食客一目了然。

店內設有大型海鮮水槽，活海鮮選擇多，但價錢絕對不抵食。馬來西亞的海鮮近年加價得十分利害，加到唔捨得食。

冰枱也有不少選擇，看樣子ok喎。

細生啤(RM 21) – 馬來西亞的酒真係非常貴。

混合海鮮粥(RM 33.7) – 小太熊話係這店的名菜。上枱時睇樣已覺唔掂，試一啖湯…妖…又係味精，垃L圾，海鮮粥內的全部海鮮包括魚肉、蝦肉、花蟹、蜆肉和魷魚全部肉質唔新鮮又唔鮮甜，最好食係飯和芫荽。

混合魚頭奶湯米粉(RM 30.2) – 又係人氣食品。河粉不是很滑更完全比不上怡保，奶湯味道尚算ok，至少味精不像剛才多，但魚頭很弱，少肉不特只還有點腥味，整體上算是難食，這店完全不值得試。吉隆坡人真係慘，這些食物也要排長龍。

回到酒店房間，發現出門口時我開了的「請勿打擾」燈被關上，心中一寒，即係有人在我亮了「請勿打擾燈」下還強行入房，有賊？？

房間的防盜扣被倒轉攝住房門令門不能自動關上，真係有人入了房，而且離開時沒有把房門關上。

立即檢查行李和夾萬內的貴重物品，唔似被攪過也沒有唔見嘢，但穩陣起見，立即停了所有信用卡先。相信是酒店員工入過房，但原因不明，是否想偷嘢的機會是一半半。

心情很差，瞓得也很差，肯定永遠也不會再住這酒店。

森山 • 尋味 馬來西亞– Day 08(完)

行程：吉隆坡(天晴) → 峇里島(陰晴不定間中微雨)

今日乘07:35 - 10:45 AirAsia航機去峇里島。晨早03:00起身，03:30 - 04:15 乘Grab往機場KLIA2，57km距離車費RM 67另加RM 7公路費，Grab在24:00至06:00不收現金。 

頂泰豐 – 在機場Check in之後還有時間，見新開了頂泰豐，價錢又比香港和台灣平，便入去食早餐。

未夠05:00已經好多人，呢間餐廳特別好生意。

兩個人分別要了 套餐A (RM 53.2) – 包括 紅燒牛肉湯麵、辣味黃瓜(半份)和 豆漿；套餐B (RM 54.4) – 包括 蝦肉餛飩湯、雞肉小籠包和 豆漿。

凍豆漿 – 不算太甜比較稀，有點兒似盒裝豆漿味，馬拉人做嘢咁L求其我相信真係盒裝豆漿，味道中下。

辣味黃瓜(半份) – 黃瓜清甜爽脆，少少辣幾好味。

蝦肉餛飩湯 – 湯底欠雞香，蝦肉唔新鮮，普通餛飩皮，味道中等偏下，影衰頂泰豐個名。

雞肉小籠包 – 很一般的小籠包，因為大部分馬拉佬唔食豬肉所以改用雞肉，最賤係連雞肉都唔L新鮮，不單止包皮過厚，肉的味道也欠水準，加埋啲醋勉強只係中等水平。

紅燒牛肉湯麵 – 牛筋肉很香很腍，麵也好食，但作為靈魂的湯底完全沒有台灣和香港的冶味，整體上只是中等，頂泰豐這馬拉分店絕對失敗。

食完早餐便入禁區等上機，繼續峇里島的潛水旅程。

 

 

 

1.     補充資料 :

2.     持香港護照可以90天免簽証入境馬來西亞，入境前網上填寫Malaysia Digital Arrival Card (MDAC)。

3.     在旺角找換店「世一兌換」換現金HK$1.861=RM 1 (尖沙咀永恆貴少少HK$1.888=RM 1)。文章列出的價錢已包括了所有稅項和服務費。

4.     怡保現在市面上已經沒有的士，馬來西亞雖然有幾個叫車Apps，但只有Grab可以真正叫到車，其他Apps次次都話冇車。

5.     在怡保和吉隆坡用Grab叫車的價錢不斷升升跌跌，最高和最低價錢可以相差3倍。怡保每1km的價錢RM 1~2。吉隆坡每1km的價錢RM 1.5~3.5

6.     從怡保去吉隆坡可以乘火車，最好網上預早一星期買票，否則買不到理想班次。車程約2.5hr，每位RM 42。

7.     AirAsia航機由吉隆坡往峇里島，不包括大行李(只可帶7kg手提行李)，單程每位HK$502，機程3hr10min。

 

 

 

-----森山 • 尋味 馬來西亞(完)-----

「森山 • 尋味 馬來西亞」旅程，詳細行程可點擊到相關文。

日數	行程路線	日程重點
Day 01	香港→檳城	夜機飛往馬來西亞檳城，零晨到達。入住喬治市的新酒店Citadines Connect Cecil Georgetown Penang，連續住2晚。
Day 02	檳城	早上在喬治市四圍食；下午乘巴士往 浮羅山背(Balik Palau)食榴槤，黃昏回到喬治市繼續四圍食。
Day 03	檳城	早上繼續在喬治市四圍食，下午乘Grab去浮羅山背果園Bahang Terraces Durian Farm參加 榴槤放題，下午回到喬治市，搬到另一位於市郊的酒店Hompton by the Beach Penang住一晚。
Day 04	檳城→北海	早上繼續在喬治市四圍揾食，再順道看看壁畫。下午乘Grab到對岸 北海，入住Crowne Plaza Penang，在 北海四圍揾食。
Day 05	北海→怡保	晨早乘火車往 怡保，入住舊城區ICC Suites Hotel，連續住2晚。早上開始在怡保揾食，芽菜雞、野生河魚、白咖啡、土產榴槤…食不停。
Day 06	怡保	早上在怡保舊城區食完早餐之後，參加了 森林尋找萊佛士花(Rafflesia)一日遊，下午回怡保舊城區食榴槤、豆腐花、燒鴨、拖地叉燒…
Day 07	怡保→吉隆坡	早上在怡保舊城區食多三間老店，下午乘火車往吉隆坡，入住Sleeping Lion Suites。夜晚試了一間近期非常受歡迎的海鮮餐廳「海腳人TRX店」。
Day 08	吉隆坡→峇里島	零晨03:30乘Grab往機場，乘飛機往 峇里島，展開 潛水旅程。