飛越 紐西蘭(1) – Grey Mouth • 黑水漂流(Black Water Rafting)

紐西蘭南島 基督城(Christchurch) – Catherdral Square

紐西蘭(New Zealand)位於太平洋西南部，主要由兩大島嶼 北島和南島組成，首都 威靈頓(Wellington)位於北島南端，南島第一大城市是 基督城(Christchurch)。紐西蘭的自然風景優美，地形多變，國內擁有不少冰川、火山、峽灣和地下岩洞，氣候宜人，遍布著旅遊勝地。

飛越 紐西蘭 – Day 1

今年的農歴年會在 紐西蘭南島過12日，今次會參加很多驚險活動。Quantas Airline經 澳洲Sydney飛到紐西蘭南島 基督城，來回機票HK$8300。NZD 1 = HK$ 5.6

放工後到機場食晚飯，先去 大家樂食臘腸鮑魚雞煲仔飯，再去Burger King食芝士皇牌餐。

晚上起機直飛 澳洲Sydney，航空公司把大行李直接寄到 基督城。

飛越 紐西蘭 – Day 2

早上到澳洲Sydney機場，停留2hr之後排隊上另一隻往 基督城的飛機。

<<基督城>>

下午15:00到達 基督城，點知在禁區等極都唔見大背囊出現，等到冇晒人了。航空公司寄失了我的行李，在機場攪了足足2hr，航空公司話搵到行李之後會直接送去我的酒店，但我今次冇Book酒店架，而且明天一早要乘火車到Grey Mouth，於是只好在機場的Agent訂埋今晚 基督城和明晚 Grey Mouth的酒店，再通知航空公司。

基督城機場的Agent，在這裡訂了今明兩晚的酒店，但要全數比晒錢。

航空公司送了兩包日用品給我們頂住先，內有清潔用品，毛巾和T-shirt等等，之後乘機場巴士(NZD 5)到市中心的酒店Check in。

 Camelot Hotel – 位於大教堂旁邊，今晚住在這𥚃。

雙人房(連早餐)每晚NZD 130

勁無心機，Check in 之後便坐觀光電車在 基督城四圍遊，成日掛住啲行李，因為冇晒义電器，拍Video和影相都有問題，而且小太陽和行李一齊寄失了，好担心唔見咗佢。

基督城觀光電車 – 票價NZD 12.5，可於買票當日和翼日無限次任坐，不過今日只係兜了一轉，雖然唔抵，不過趕時間冇辦法啦。

基督城 藝術中心(Arts Centre)

Avon River ~ Bridge of Remembrance

在Bridge of Remembrance附近一間露天餐廳草草吃點東西便回到酒店休息，因為真係勁冇心情。

晚上完全瞓唔著，整晚不斷打電話去航空公司的24hr熱線想問行李的情況，但永遠是電話留言。。。。。

飛越 紐西蘭 – Day 3

晨早航空公司把行李送到酒店Reception，見返 小太陽啦。

在Camelot Hotel地下餐廳食早餐

早餐後乘觀光火車TranzAlpine Train由基督城去Grey Mouth(每位 NZD 102)，由08:15至13:30。旅遊書話這火車係世界上海拔最高的火車，又話會經過很多冰川，沿途風景絕佳。

TranzAlpine Train的外觀和內部其實又冇咩特別。

車尾位置係觀光車卡，冇玻璃的。

沿路風景都唔錯，不過冰川就冇乜。

中途站Arthurs Pass，可以落車鬆一鬆。

繼續TranzAlpine Train火車旅程。

旅程上的風景雖唔錯，但啲書吹得太大了，令我有失望的感覺，因為那些風景不及英國蘇格蘭，和冰島更加冇得比。

<<Grey Mouth>>

火車遲利了30min，14:00才埋站，弊傢火，我Book了14:00 在Grey Mouth出發的 黑水漂流(Black Water Rafting)團，原本時間足夠我Check in酒店後再去旅行社的，現在不能去酒店了，只可以揹住背包，落火車後立即快跑去間舖，好彩仲未出發。

黑水漂流(Black Water Rafting)是進入天然地下河洞的探險活動，需要穿上潛水Wetsuit穿漆黑的河洞內游走，全程約需3.5小時，視乎隊員的體力，每位NZD 125。由於時間緊迫，小太熊把相機放進潛水盒時不小心整爛了個潛水相機盒，好慘呀，好彩導遊會替我們影相。

入洞前來張大合照，全團11人只有2個是亞洲人。

先要行過一段獨木橋

進入地下天然河洞Dragons Cave，所有人都必需穿上厚身的潛水衣保暖。

團友們都小心翼翼地一步一步行，避免跌倒。

在河洞內需要手腳並用爬上爬落，有時要穿過一些非常窄的位置，見那些大肥佬都過得有點困難。

濕身是必需要的，這次是要從約1m高插落這個冰水池，好激架。

其中一段旅程要坐水泡沿地下河浮到河洞的另一邊。

這個洞很窄，肥啲都過唔到。

玩完後來個大合照

安全從河洞上回地面

由於今日下午時間太趕，我一落火車便跑到Agent處，出發玩 黑水漂流，來不及check-in已Book了的酒店Golden Coast Bed & Breakfast，回到Grey Mouth後已是19:00，我行到那間已在基督城機場Full Paid了NTS 90的酒店

Golden Coast Bed & Breakfast

想話check-in時，酒店個老虔婆老細話因為我太遲來，房已全部出租了，冇房比我。喂! 阿老虔婆，我比晒錢啦，你理得我幾時到呀，真估唔到 紐西蘭人會咁冇信用，影衰晒紐西籣。我問佢攞返錢，佢就辨聽唔到，話幫我check吓附近的酒店有冇房。

就係呢個老虔婆，正賤精。

老虔婆最後找了一間酒店Sanford's Guest Lodge給我，但那間房只需NZD 80，我卻比了NZD 90。死臭賤婆屈了我NZD 10，賤格到爆。

Sanford's Guest Lodge – 是一座舒適的小平房，酒店的老闆好好人，親自揸車車我們來，明天又車我們到巴士站。

雙人房(連早餐)每晚NZD 80 – 房間細小但十分之整潔，都好舒服。Golden Coast Bed & Breakfast的老虔婆屈了我NZD 10冇refund比我。

忙碌了一整日，午飯都未食，已經20:00了，不過好彩天色還未黑，趕快出外找些東西吃。

Greymouth Clocktower – 行到這河邊位置，街上像死城一樣，人都唔多個，餐廳更加少。

Café 124 on Mackay – 在Clocktower附近有間很好的餐廳，晚餐每人只係約NZD 40，就食呢間。

剛剛有露天座位，正。

牛扒又大份又夠牛肉味，好好食，加埋杯黑啤實在一流。

今天需然好好玩，但不太順利，還整爛了個潛水相機盒，都幾黑，點知原來仲未黑完.......... 

 

 

---待續---