印尼搜奇(完) – 佛羅烈斯島(Flores) • 峇里島(Bali)

Wawumuda – 位於印尼Flores的火山，火山口有數個橙色的火山湖，很壯觀，差不多完全沒有遊客。

佛羅烈斯島(Flores)是印尼Nusa Tenggara群島之中的一個長型島嶼，人口接近二百萬，Flores這個名字是葡萄牙語中<花>的意思。島上有很多活火山、睡火山和溫泉，其中最著名的景點有 克里穆圖火山(Mt. Kelimutu)，上一次爆發時間是1968年，山頂有三個火山湖，顏色會隨時間不斷改變。

印尼搜奇 – Day 6

<<Flores>>

今日的活動會圍繞在Bajawa附近，早上跟一位當地村民行上火山Wawumuda觀賞橙色火山湖，接着到訪印尼傳统村莊Nagada，下午去天然活水温泉Soa，晚上在Bajawa住多一晩。。

昨晚在Bintang Wisata Hotel瞓得幾舒服，酒店亦包了早餐，有烚雞蛋和多士奶茶。

早餐之後開始火山之旅，需要行山4.5km急上250m高。 

跟著這位村民，急步1hr 穿過山林，極快便上到山頂。

沿途鬼影都冇隻，只有那村民和我們2個，司機冇跟來。

到山頂了，看到幾個分別是橙、紅和啡色的火山湖，好壯觀啊。

行到山頂的盡頭，前方冇路了，但村民要帶我們行落下面的火山湖。

火山表面的泥很鬆，又斜又跣碎石又尖，我連站着唔郁都有困難，要坐住落去，村民卻可以要赤腳站着行，利害。

很困難地落了一半，火山湖近了好多，好靚。

回望一下，都唔相信自己可以由山頂坐住跣落嚟。

火山湖已經近到不得了，感覺很震撼。

由於火山泥實在太跣太鬆散，村民要先用腳踏實地下的鬆泥，再捉住我隻手拖我落去，過程非常危險，因為佢一失足，我同佢都會跌落湖內，湖邊全是浮泥，四野又無人，死梗。

最後當然成功安全行落湖啦，湖水原來是冰凍的，湖內全是浮泥，完全唔受力，只可以免強行到水位邊。

回程時回望，方發覺剛才隨時冇命，現在諗起都仲驚。

跟著段路只係沿湖頂行平路，冇咁難行和危險了，可以自己行。

原來火山湖是因為深淺不一，所以出現深由淺橙黃色至深橙紅色不同的層次。

村民哥哥全程都好照顧我們，仲幫我揹埋背囊添，一陣要比多些Tips佢。

行完了，回程的山坡冇咁斜，而且上山比咁容易，可以自己行上去。

完成早上第一個的行程，接着往附近到訪一條叫Ngada的傳统村莊。

Ngada傳统村莊 – 村內全是本土建築，整條村都係世界遺產啊。

村內的男人都外出工作，剩下些婦女、小孩和老人家。

有位老人家正在吃檳榔，見佢啲牙大部份已經爛晒了。

又要留低Tips和簽名，當然係冇香港人啦。

返回Bajawa途中的山勢好壯觀。

Camellia Restaurant – 中午回Bajawa食飯，這間餐廳比較中國口味，味道唔錯的。

Hotel Ariesta – 今日轉過來Bajawa這酒店，貪佢夠平。

大廳是公用的，不過未見過其他客人。

雙人房(包括早餐)每晚Rp 60,000 – 有風扇，清潔度比不上昨晚，但尚可接受，沒有熱水，沖涼都係用傳統印尼水缸。

下午到附近一條天然活水温泉Soa浸浸。

這是泉眼，水温很熱。

泉水從泉眼不斷湧出型成溫泉河，可以在河流上泡溫泉。

温泉水由泉眼湧出溫水河之後，和另一條冷河流交後滙變成微暖水，可以在這裡再浸。

晚上在Bajawa鎮內食店食雞飯和牛肉飯，多飯少餸味道一般，求其一餐因為冇乜選擇。

在Flores玩了2天都冇碰到其他遊客，島上的居民都用奇異的眼光看我們，真係從未去過一處完全冇遊客的地方。

印尼搜奇 – Day 7

早餐有烚雞蛋、多士多奶茶，比預期豐富。

今日冇乜特別活動，只係驅車180km前往山上小村Moni，沿途在景點停車影相。

火山Ebulobo – 是Flores島上較大型的活火山。

Pantai Batu Biru (Blue Stone Beach) – 石灘上的石頭大部分含有藍色的礦物，很特別。

當地村民都在執藍色的石頭，一大包一大包賣出去，後來在峇里島上的酒店泳池也見到這裡的藍色石頭。

中午去到海邊小鎮Ende，在這裡午餐之後便駕車52km前往山上小村Moni。

Istana Bambu Restaurant – 在這裡午餐，因為發現原來換唔夠印尼盾，今日又係星期日冇得換錢，所以只能夠慳住食，沙嗲都唔敢叫。

炒飯(Rp 7500)；炒麵(Rp 7500)；可樂(Rp 3500) – 味道好架，不過冇肉食有點Dry，如果有錢一定食埋沙嗲。

下午14:00到達Mt. Kelimutu山下的Moni村，村內只有一間像樣的旅店Hotel Arwanti Homestay，其他真係完全住唔到。

Arwanty Homestay – 只有一間小型餐廳和三間獨立屋的旅店，好彩遊客唔多，還有一間房。

今次住這間獨立屋，外觀唔錯。

獨立屋(不包早餐)每晚Rp 75,000 – 有一房一廳，大廳內有一張單人房，唾房有2張單人床，冇蚊帳但超級勁多蚊，冲涼水是黃泥水。

Moni村內只有些村屋，全無景點，下午冇嘢做，整條村都勁多蚊，時間過得很慢。

晚上因為冇現金所以去唔到餐廳食飯，只能吃帶來的乾糧 麥維他消化餅，慘情。晚上睡得很差。

印尼搜奇 – Day 8

早上03:15起床，天上滿佈星星，仲見到銀河添。立即執埋行李上車，因為唔會再回旅館了。04:00出發上Mt. Kelimutu山頂等日出和看三色火山湖。Mt. Kelimutu山頂有三個唔同顏色的火山湖，最奇怪是湖水的顏色會隨時間而變，時深時淺。

05:00開始日出了，今朝加埋我們共有5位遊客等日出。

Mt. Kelimutu三色火山湖日出，前面這個淺錄湖，十多年前是白色的人。

另一個湖被濃霧完全遮住，睇唔到。

後面這個黑湖，十多年前是錄色的。

1996年在峇里島買的Postcard，三色湖的顏色和今日有很大分別。

日出之後離開三色湖，車子直接駛95km到Flores島的Maumere市機場，途中經過銀行換了足夠現金，買下一班內陸機回峇里島。

09:45去到Maumere，即場買4機票(單程票價 Rp 475,000)中午12:00回去峇里島。

因為有錢，食餐豐富Brunch先，叫了雞奄列、水牛肉和雞飯，因為今早未食嘢，太肚餓所以覺得好好食。

飛機12:00準時起飛，終於完成6日Flores艱苦之旅了，回峇里島要好好休息一下。

在飛機上鳥瞰Flores，依然覺得佢原始和潔淨，希望未來不會被大量遊人破壞便好了。

飛機餐有 牛肉飯，居然覺得好食，可能昨晚餓親呀。

<<峇里島>>

終於回到峇里島，在機場的Agent搵了間位於Nusa Dua區的酒店Putri Bali Hotel，租住2晚歎返吓。在機場乘Coupon Taxi去Nusa Dua收費RP 55,000。

Putri Bali Hotel – 外觀有印尼特色，性價比較高的酒店。

雙人房(連早餐)每晚US$85 – 房間整潔舒適私隱度100%，大露台面向草地遠望海景，抵住。

Putri Bali Hotel的泳池 – 泳池中間有個酒吧，可以一邊游水一邊飲嘢，下午就在這裡飲杯啤酒，曬太陽Hea吓。

Putri Bali Hotel毗鄰有很多酒店，可以沿公用沙灘進入並在泳池游水，黃昏時去了隔離Grand Hyatt泳池游水，內有Flores的藍色石頭。

日落前出沙灘行吓，在岸邊觀看退潮後的海洋生物。

晚上乘的士往 金峇蘭(Jimbaran Bay)的沙灘Kedonganan Beach食BBQ。

Kedonganan Beach有大量海鮮餐廳，晚上會在沙灘放滿餐枱，熱鬧又好氣氛。

行了好多檔，選擇了在Armindo Café食 BBQ海鮮晚餐，老闆話包酒店接送的，一陣可以送我們回酒店，下次可以打電話去訂位時叫佢安排免費接送。

今餐很豐富兼抵食，叫了燒大蜆、燒細石斑魚和燒大魷魚，送白飯和一碟菜，共收Rp150,000，好味道，加支大啤酒(Rp 15,000)。

食到一半有隊Band過嚟唱Live，氣氛好到不得了，點了2首歌，給了Rp 20,000。

印尼搜奇 – Day 9

今天冇特別節目，全日在Nusa Dua區遊蕩和參觀其他酒店，志在休息。黃昏再到昨晚的餐廳Armindo Café食飯，今次早啲到，要睇埋日落先至開餐。

早上安樂醒，在酒店食完早餐之後出發，先去附近的Galeria Shopping Centre行街。在Galeria Shopping Centre有免費Shuttle Bus往來Nusa Dua各大酒店，便乘車往Melissa Bali Resort參觀一下順便做個SPA。

Melissa Bali Resort – 這酒店有很多住客免費活動，又係位於沙灘旁邊。這班住客正在上烹飪班。

去到Melissa Bali SPA居然話Full了，可惜呀，有點兒失望。於是去附近的四季 酒店SPA問吓，點知仲絕，直程唔做非住客添，最後再去Hotel Ritz Carlton問，SPA都係Full，真係黑仔，唯有返自己酒幫襯。

先去泳池游陣水降降溫先。

Putri Bali SPA – 選了1hr按摩療程，送15min蒸氣浴和按摩池。

先在按摩池鬆15min，然後再按摩，勁舒服。

做完SPA便乘餐廳免費車再去 金峇蘭。

Armindo Café – 又坐返昨日張枱。現在時間尚早，先飲支啤酒，吃些花生等日落。

很快便日落，最衰最後太陽都比雲遮住。

日落之後便去揀海鮮，今次選了1kg生猛龍蝦，1kg新鮮肉蟹和冰鮮𩶘魚，埋單共Rp 400,000。

印尼搜奇 – Day 10(完)

今日是最後一天，早上在酒店食早餐，然後做2.5hr SPA。

Putri Bali SPA – 雙人2.5hr SPA Package收費US$80。

下午乘機回港，完結了一個新奇且危險的旅程。

 

-----印尼搜奇(完)-----