泰國蘇梅的天空(完) – 帕岸島 狂野Full Moon Party

Imperial Boat House – 位於泰國蘇梅島沙灘Choeng Mon Beach旁邊，酒店內有多艘木船改建的覆式房間，很有特色。

Full Moon Party是泰國帕岸島東南端海灘Haad Rin每月的月圓之夜舉辦的通宵派對，起源於1987年的時候，三個分別來自意大利、瑞士和英國的朋友為了幫其中一人慶祝生日而在沙灘辦了一個派對。自此之後，他們想繼續在沙灘上辦這樣的派對，不過找不到理由，碰巧那天是滿月，於是他們就約定每逢月圓之夜便來舉辦Full Moon Party。在Full Moon Party玩完通宵之後回到蘇梅島的Imperial Boat House休息，既精彩又悠閑。

泰國蘇梅的天空 – Day 6

繼續上一篇Day 6行程。

<<帕岸島(Koh Phangan)>>

Full Moon Party在 21:00開始熱鬧，沙灘上的坐位開始坐滿遊客，但等睇嘢的人多過落場玩的人。

很多酒吧請人在沙灘玩火靶攪氣氛。

沙灘上有很多熟食小販，啲炸雞髀個樣都好正。

我們趁仲有位也霸了張沙灘枱，不過要叫嘢飲的。

約22:00開始有人跳舞了，在沙灘越玩越狂野，啲麻甩仔見啲女生咁狂野都行埋去抽吓水。

今晚係中秋節，老遠帶了個月餅來做節，溝埋剛才買的一桶Vodka+可樂+紅牛，味道沒有想像中咁梗啊。

女生們也開始穿上三點式跳熱舞了。

呢個女生比人又磨又揸.......呢個Party真係如傳聞一樣咁淫亂喎。

很多超載的大型木船老遠從 蘇梅島不斷駛過來，令沙灘由 22:00開始不斷迫上加迫。到零晨時候人數到達最高峰了，沙灘上企滿人，向前行都要不斷左閃右避。

Party雖然又多人又淫亂，但就不見有人吸毒，因為沙灘上警察的數目都唔少。

撞鬼，玩到零晨01:00已經開始眼瞓，而且想睇的都已經見到了，剛剛有艘Boat Taxi往Haad Tien，便上船返酒店，同船都有十幾人好似我哋一樣咁早走。

回到房間沖完涼上床瞓都差唔多03:00，這時才發現床頭原來有一個電製是24hr供電的，今晚有風扇歎，涼爽舒服好多啊。早2晚冇風扇真On9。

泰國蘇梅的天空 – Day 7

早上會坐船返 蘇梅島(Koh Samui)，艘船會經過Haad Tien，可以直接在酒店上船，都好方便，船票在酒店買便可以。

今日瞓到安樂醒，不過其實都係未夠09:00。

早餐只吃鮮果乳酪，食完便上船。

<<蘇梅島>>

大約1hr船便返回 蘇梅島(Koh Samui)的Haad Rin Mae Nam Pier，上船都係要澗水。

剛下船便被一架兩排車兜了上車，今日目的地係Choeng Mon Beach的酒店Imperial Boat House，12km路程收每位Baht 100，都好貴。

同車的老外又係去Choeng Mon Beach，不過佢哋話只係住平嘢，但都係一齊用同一個沙灘，仲話今晚在沙灘再見喎。

好快去到Imperial Boat House，會連續住2晚，開始歎世界。

雙人船屋(包括早餐)每晚Baht 5450 – 上層是大客廳和露台，下層是睡房和浴室，屋內的氣味和濕度溫度都令人很舒服。

船屋的上層客廳

船屋的下層休息室和睡房

Imperial Boat House泳池設計像一艘船

住客都很Open

Imperial Boat House外的海灘Choeng Mon Beach，日間就很多人游水曬太陽，晚上時餐廳會在沙灘上擺滿座位，氣氛浪漫到冇朋友。

沙灘上的旅客都係咁Open

Imperial Boat House除了船泳池之外，仲有個按摩泳池。首先逐個池游吓水玩個夠。

下午乘酒店Shuttle Bus去蘇梅最旺的沙灘Chaweng Beach。

出到Chaweng Beach竟然落大雨，天氣真係無常。

Häagen-Dazs – 為了避雨，入去食抔雪糕先，價錢比香港平好多。

三色雪糕球(THB 250)

五球雪糕(THB 250) – 雖然雪糕球細好多，不過都係呢杯抵食啲。

停雨之後天色依然很灰，氣溫亦很涼，那些無上裝日光浴都消失了。

沙灘上已經擺滿坐位，氣氛很好。

Chaweng Beach比較悶，唔飲嘢唔游水冇乜好做，於是早點回酒店沖涼。沖完涼攰攰哋，本來想恰1hr之後起身食晚飯，點知間房和張床太舒服，2個人一恰便由18:00瞓到23:30。彈起身時見個鐘23:30，仲以為自己睇錯時間。起身後酒店的餐廳已經全部關門，於是行出沙灘碰碰運氣。

沙灘上大部份餐廳已經關門，好彩仲有這間氣氛很好的餐廳依然營業，不過已經冇客了。

叫了4味菜 ： 冬陰海鮮湯；雜菜河粉；咖喱雞；蠔油炒洋蔥蘑菇，味道唔錯，很滿意。

正式瞓覺已經02:30，好彩明天冇特定節目，又可以安樂醒。

泰國蘇梅的天空 – Day 8

今天整日冇離開酒店，早上玩獨木舟和水上電單車，下午遊水和做3hr SPA。

自助早餐好豐富又好味

早上在酒店借Kayak，從Choeng Mon Beach出發，先扒去中間那個島Ko Fan Noi。

再穿過大海扒去對面的Tongsai Beach，要一個人扒雙人艇，扒埋小太熊果份，好吃力架。

玩完獨木舟，租了水上電30min(THB 900)，可以飛去好遠那個小島，獨木舟唔敢去的。

午餐都唔食了，14:30回到泳池游水。

跟住返房食埋酒店送的水果和昨天買的抔麵。

17:00～20:00做3hr SPA，每位THB2500，包晒按摩礳沙和花瓣浴，手勢一流，不過冇按背脊，扣晒分。

死火，在南幽島潛水時被蛙鞋整損左腳背的皮，因為冇做護理又穿涼鞋四圍去，現在終於開始發炎腫脹，剛剛做SPA時覺得幾痛，大大鑊。

20:00出沙灘食晚飯，揀了一張沙灘上點油燈的枱，和海浪聲十分之近，超級好情調。

要了一條死了的 紅𩶘魚(THB 200)和一件雞胸肉，用炭火燒烤，再加碗冬陰公湯和一個Pizza，味道一般啦，不過環境真係唔錯。

泰國蘇梅的天空 – Day 9

今日早上隻腳腫得更嚴重，要行到一拐一拐。

在酒店食完早餐之後便乘的士去機場，再乘內陸機回曼谷。

<<曼谷>>

Marriott Royal Garden Riverside Hotel – 今晚住呢間曼谷的河伴酒店，好靚架。

雙人河景房(連早餐)每晚Baht 4000 – 有個小露台加側面河景，勉強可以。

安頓後便和小太熊去Siam濕平。

下午去 曼谷文華東方酒店 High Tea，酒店的大堂已經很有氣派了，不愧係貴野。

The Authors' Lounge – 像是中古時代的歐洲茶室，今日好Full啊，等了15min才有位。

High Tea Set(每位Baht 1100) – 其實2個人叫一份加多杯茶都足夠食，現在飽到上心口仲食唔晒。味道唔錯的。

黃昏到State Tower 64/F的Sky Bar飲嘢，睇埋夜景至走。

Sky Bar 旁的餐廳，價錢幾貴，所以冇食晚飯。

在這裡可以睇晒曼谷的夜景

晚上在Marriott Hotel 做2hr SPA。

隻腳發炎得越來越嚴重，而且傷口位置持續發滾，最衰冇消炎止痛藥，於是吃了些必理痛頂住先，但功效不大，只係好似惡化得冇咁快。

泰國蘇梅的天空 – Day 10(完)

Marriott Hotel的早餐乜都有得食，而且好好味添，不過缺點係太多廣東話。

早餐後乘酒店的免費Shuttle Boat去Silom，順便遊吓船河。Shuttle Boat每15min一班，穿梭Marriott、文華東方、半島等三間酒店和Silom。

最後回到Marriott Hotel玩埋個泳池，便要回房執行李。

下午乘機返香港，隻腳發炎得好緊要，立即睇醫生，醫生替我連續3日打了3支抗生素針，再口服抗生素多4日才完全消腫，幸好早回香港，否則行程都唔可以繼續，今次學到野，下次旅程必定好好護理任何傷口。

泰國原來還有很多真正的隱世天堂，可完全接近大自然，而且價錢很平民，不像馬爾代夫，只是 有錢人的天堂。

 

-----泰國蘇梅的天空(完)-----