飛越 紐西蘭(完) – 尋幽探秘 Milford Sound

紐西蘭南島冰川峽灣 Milford Sound

Milford Sound峽灣位於紐西蘭南島西南部，經過數百萬年的冰川化過程而形成，峽灣從Tasman Sea到達戴爾點Dale Point的內陸，被1200m高的陡峭岩壁包圍，在1990年被列為世界自然遺產，TripAdvisor曾把她評為世界最佳旅行目的地。Milford Sound擁有兩條瀑布，分別是Stirling Fall和Bowen Falls。大雨過後，更會形成大量臨時的瀑布，順著峽灣的陡峭岩壁流下。

飛越 紐西蘭 – Day 8

<<皇后鎮>>

今日係農曆年初一，參加了2天團遊覽 紐西蘭南島的峽灣 Milford Sound，乘郵船在Milford Sound過一晚，包船上早晚各一餐，乘巴士去乘小型飛機返，每位NZD 435。

今朝07:15起身，每人食一個昨日在超級市場買的 杯麵(NZD 1.5)，小太熊話啲麵斷開晒，麵質又削，好唔掂。

早上08:30乘這部有天窗的觀光巴士從 皇后鎮出發。

開車不久便見有羊羣封住整條馬路，所有車都過唔到，攪了半個鐘。

羊羣出現了缺口，車才能從側面慢慢過。

有些羊仔都怕車架，佢哋都會往斜坡上避車。

過了羊羣，到達Kingston Station，可以自費乘這部 蒸氣火車。

如果唔坐蒸氣火車，巴士會在火車的中段路停下休息，等火車過了後再駛去下一站會合。

中午到達小鎮Te Anau，放30min午餐，要自費。

可樂(NZD 2.5)；吞拿魚三文治(NZD 3.5)；粟米熱狗(NZD 2)；春卷(NZD 2) – 味道一般啦，快快脆脆食完又要上車。

下午的路段風景非常之壯麗，司機會在一些靚景的地方停車15min給團友們影相。

金黃色稻草田靚得好跨張，面積大之餘，瞓落草上更加軟綿綿充滿草香，在這裡停了15min。

Mirror Lake(鏡湖) – 像終蟈大明湖一樣，只係一條夾岸長滿蘆薈的小河。河伴有條自然徑，5min便行完。

下午14:00左右開始落大雨，慘了。

車子越南行風景越壯麗，也好彩雨勢減弱了不少，偶然還停雨，司機也在一些風景勁靚的地方停車。。

想不到紐西蘭的自然景觀和冰島一樣壯麗，完全是鬼斧神工。

穿過埋這條超級隧道便到達Milford Sound。

<<Milford Sound>>

Milford Sound碼頭，要在這裡先登記，然後才可以上船。

今日會乘郵船Milford Mariner，16:00起航，沿Milford Sound峽灣出大海再回頭，在Milford Sound停一晚，玩 1小時獨木舟，晚餐。早上07:00早餐時再出大海一次後回航，約 09:00返回碼頭。

Milford Mariner – 首先排隊上船，然後到餐廳吃些茶點，等齊人上晒船才開始派房。茶點的曲奇餅好好味，係貴嘢。

房間有海景和獨立浴室廁所，很乾淨整潔。

開船了....大家都走上甲板看風景，幸好沒有再下雨，雖然天氣還是很灰，完全冇陽光，但是Milford Sound的風景依然出塵。

峽灣兩邊全是懸崖，講真其實風景有點似三峽工程進行前的 終蟈長江三峽。

Bowen Falls – Milford Sound兩大瀑布之一，從碼頭行一陣便到，今日大風到吹斷了這條瀑布。

Seal Rock – 野生的海獅們每日例必在這裡休息。

Stirling Fall – Milford Sound最大的瀑布，水量最澎湃。

遊完船河之後，黃昏18:00郵船停泊在峽灣的Harrison Cove內，今晚就在這裡瞓。

停船之後可以在Milford Sound玩1小時獨木舟，或者游水都可以。

涼完涼之後20:00開飯，晚餐是自助餐，食物種類唔多不過都好食。

忌廉湯和牛仔肉都好正，而且很多菜。

飯後鮮雜果和蛋糕甜品都好好食架。

房間晚上又冇冷氣又冇風扇窗又開唔到，十分之焗，要走上甲板乘涼，待深夜之後天氣變冷才瞓得著。

飛越 紐西蘭 – Day 9

年初二，今早大雨，原本回程的小型飛機要取銷，退回機票錢。

早餐都好多水果，坐返昨晚座位，一邊遊船河一邊食。

早上再行一次昨天的路線，接著便要落船。

Milford Sound Underwater Observatory(NZD 25) – Milford Sound的水底世界，其實冇咩睇，魚和珊瑚都少，感覺被呃錢。

由於冇得坐飛機回程，要坐返巴士，今日巴士只停一個景點，全速回程。

The Chasm – 位於Fiordland National Park  內的景點，森林小徑長400m，公園內有條地下瀑布，雖然壯觀但沒有安全的位置可以完全看見瀑布的正面。

<<皇后鎮>>

中午回到皇后鎮，今晚住湖邊Thomas’s Hotel，是3日前到埗時在Agent訂的。

湖景雙人房(不包括早餐)每晚NZD 115 – 房間非常之殘舊，不過窗門十分大，像銀幕一樣，湖景天下無敵。

回到皇后鎮之後又開始陽光普照，想話下午去牧場剪羊毛，但Agent話已經Full了，下午的活動只剩下騎馬1.5hr，每位NZD 60，便參加這個。

牧場在小鎮不遠處，好快便車到去。今次揀了一隻大馬，佢好大隻。

我的馬仔唔係太聽話，場主把乖的馬仔比了小太熊。

出發，先行落一個斜坡，慢慢行落河邊。

在河邊行吓停吓，不過馬仔冇行落水，今次冇咁好玩。

1.5hr的時間過得很快，回到起點時覺得未玩夠。

晚上幫襯湖伴一間出名服務態度甚差的餐廳 ～ Restaurant CAT。落order時只要了主菜和嘢飲，條寸妹Waitress立即寸寸貢地話我哋又唔要湯又唔要沙律，衰得佢.....唔怪得意見薄的評語都話服務態度甚差，有人更説Waitress的態度「Very Terrible」。

西冷牛扒的味道嘛嘛，永遠都唔會再幫襯。

飛越 紐西蘭 – Day 10

今日年初三，仍然厚雲有微雨。在香港買了今日由基督城的內陸機票。由 皇后鎮乘巴士去內陸機場每位NZD 5。

去到內陸機場，寄行李時航空公司表示飛機因為厚雲取銷了，唔知幾時有機。

我們在機場碰到個香港團，他們很快已安排了旅遊巴士返基督城，但要自費。我只好返回 皇后鎮找Agent問今日有冇車返 基督城，佢話只有14:00一班車，不過冇位要waiting list，於是留咗名比佢。心情極差，因為擔心走唔到，後日06:00要乘機返香港了，都唔知點算。

Minami Jujisei – 又返去日本餐廳「南十字星」食刺身定食(NZD 18)。

食完午餐又四圍行一陣又再去Agent處問吓，Agent說有位了，我們即刻比錢，車程14:00～21:00，每位NZD 55。順便同Agent訂埋今晚基督城的酒店Thomas’s Hotel。好彩上到車，心情立即好返晒。

長途巴士準時開車，今日天氣持續地不穩定。

在中途休息站吃了個 雞批加一支朱古力奶，不過係2個人Share。

<<基督城>>

晚上21:00到達 基督城，先去Thomas’s Hotel放下行李。。

雙人房(不包括早餐)每晚NZD 69 – 房間超細，只可以放一張床和小衣櫃，冇浴室冇廁所冇view，而且相當殘舊。

中華大酒樓 – 今日是新年初三，想吃返中菜，附近剛巧有間酒樓，啱晒啦，入去食餐勁嘅。

現在已經是21:30，可能太夜了，只有幾枱客。

二人套餐(NZD 70) – 有雞絲冬菇湯羹、春卷炸雲吞拚叉燒、京都肉排、豉椒炒蝦球我楊州炒飯，味道中上呀，而且很大份，食到有餘有剩，好意頭啊。

食飽又四圍行，看看基督城的夜景。

基督城美術館(Christchurch Art Gallery)

基督城Catherdral Square

今晚夜少少瞓，因為明天冇乜特別節目，只係沿Lonely Planet的Walking Tour行一個圈，所以決定瞓到安樂醒。

飛越 紐西蘭 – Day 11

今日全日在 基督城行街7hr，早上經Agent訂了17:00黃昏熱氣球，深夜便乘巴士去機場。

早上10:00從Thomas’s Hotel出發，今日早上好陽光。

基督城Catherdral Square – 今日從這裡作起點，沿Lonely Planet介紹的路線行街。

今天剛巧是 基督城的花節Flowers & Romance Festival，整個市中心和大教堂內都放滿鮮花，連入教堂都要收入場費，平時免費的。

Catherdral Square大教堂(入場每位NZD 5) – 教堂內放滿了鮮花，原來一陣仲有Show睇。

節目是鮮花時裝Catwalks

離開教堂之後，廣場越來越熱鬧，有很多藝術表演，包括假扮銅像和踩玻璃，真係搵食艱難。

Cafe Stir ~ New Regent Street內的露天茶座，環境滿分啊，便在這裡食個Brunch。

在陽光下食Pasta飲鮮橙汁。

茶座和電車距離好近，很有特色，不過有車經過時好似唔太衞生喎。

Victoria Square – 今日有舞獅表演，華人的勢力都唔細囉。

The Canterbury Provincial Council Buildings – 紐西蘭的舊議會大廈。

議會大廈外是 露天茶座，環境清幽，在這裡飲杯嘢歎吓。

小太態飲 英式茶，我飲 黑啤，越飲天色越灰，好似想落雨，黃昏的熱氣球可能要取消了。

Bridge of Remembrance – 第一日來基督城時已經到過了，還在隔離的露天餐廳食了餐晚飯。

基督城美術館(Christchurch Art Gallery) – 是新西蘭基督城一家公立美術館，由基督城議會資助，裏面唔俾影相。

基督城 藝術中心(Arts Centre)

最後去埋Botanic Gardens之後，到Agent問問熱氣球的情況，果然取消了，又慳返唔少。

Punting On The Avon(雅芳河泛) – 行行重行行，下午在Avon River坐艇仔，20min旅程每位 NZD 12。

冇得玩熱氣球，只好早啲食飯，中午行街時見到有間好嘢。

Boaters Restaurant – 在Christchurch Town Hall旁邊，面向Avon River，環境一流而且仲好平。

因為我們冇訂位，窗口位已經Full了，只能坐中間位，不過這裡的服務態度非常良好。

叫了2份Set Dinner，全張單只係NZD 50，有冇平成咁呀，好抵食，而且味道很好。

餐湯係 蕃茄湯

煎魚扒 – 伴了一碟焗蔬菜，感覺幾健康。

西冷牛扒 – 牛味一般，個汁調校得好好，但呢個價錢我好滿意。

當晚乘最夜的巴士Red Bus (NZD 5)，23:00去到機場，在機場過了7小時。

飛越 紐西蘭 – Day 12(完)

零晨04:00半夢半醒下Check in，乘早上06:00的飛機，經Sydney返回香港。這次旅程非常精彩，但總有些遺憾，因為天氣真係變幻無常，不過，在Sky Dive和 行冰川那2日冇落雨己好好彩了。世事總沒有完美的，要學懂欣賞及享受生活中的點點遺憾，生命才會變得完美。

 

 

-----飛越 紐西蘭(完)-----