漂流日本 • 動態移民(25) – 九州別府 絕景棚湯

九州別府溫泉旅館 杉乃井ホテル ~ 絕景風呂 棚湯

九州別府溫泉旅館 杉乃井ホテル 位於別府半山上的 鶴見山靈泉寺旁，面積非常之大，分成數幢大樓，房間數量超過600間，是區內人氣溫泉飯店。館內設有大型購物中心，兒童遊樂場，泳池和天然温泉絕景風呂，旅館更為住客供應高質素自助早晚餐，價格合理性價比高，是今次旅程的重點住宿之一。

漂流日本 • 動態移民 – Day 11

繼續上一篇Day 11行程。

早上在耶馬溪踩完單車，中午用JR Pass乘14:12-14:52  JR從 中津去 別府，如果買單程票￥2310。

<<別府>>

準時到達 別府駅，剛好趕上酒店15:00的免費接駁巴士。

從火車站到酒店大約4km路程，途中望見今日住的半山酒店 別府温泉杉乃井ホテル。

先在大堂Check in，大堂真係好大，人流亦多得不像日本温泉旅館。

雙人洋室(包括自助早晚餐)每晚¥23500 – 這間高層房超級平呀，因為近升降機所以會不斷聽到升升降降時轟隆轟隆的聲響才會咁平，不過冇所謂啦，慳返萬幾円，深夜時很少人用升降機所以瞓覺時還可以。

窗外景觀好好啊，望見地熱區噴晒蒸氣。

中午房間太嘈不宜久留，放下行李便去浸溫泉。絕景風呂 棚湯位於另一座大樓天台，由本館往返要乘旅館的接駁巴士，旅館實在太大了，從房間去溫泉要15min以上，因為落車之後還要走一大段路穿過商場和遊樂場。

乘接駁巴士到達旅館商場，落車之後便穿過這大型禮品商店。

再走過兒童遊樂場。

天台泳池沒有開，有點可惜。

大展望露天風呂 棚湯 – 風呂像梯田一樣鋪設5層浴池，可以俯瞰整個別府灣甚至可遠眺四國，浸泡在這裡令人所有憂慮一掃而空。

在棚湯浸了成個鐘，再在商場行吓街，好快又到18:00晚餐時間，所以房間嘈些都冇所謂啦。

自助餐廳非常之大，不過全店爆滿，真係跨張。

自助餐提供的料理是多國特色菜，大部分食物也比一般自助餐高質，整體上好好食很滿意。

酸甜爽脆的開胃 蕎頭，好味。

三文魚和油甘魚壽司 – 比壽司郎更好食。

刺身共有4款，包括吞拿魚赤身、魷魚、鯛魚和油甘魚，全部新鮮美味。

檸檬醬油拉麵，一口份量清新醒胃。

炸蝦天婦羅 – 鬆脆香口比預期好食。

呢幾款味道普通，早知唔攞食多幾碟刺身。

鐵板和牛也算肉質鮮嫩味道唔錯，自助餐而言是好食美味的。

鰻魚飯好好食，食完再攞多一碗；三文魚飯、咖哩牛腩和關東煮也好味，樣樣食少少好正。

水果新鮮又甜又多汁，吃了好多。

雖然已經好飽，但見甜品真係好靚，忍唔住每樣攞少少，好好食又好飽呀。

點飽都要食埋雪糕，唔係就唔完美囉。

食飽返房鬆一鬆立即又去浸，首先浸自己座本館的温泉 みどり湯，原來冇乜特別，唔去也冇所謂。

絕景風呂 棚湯 – 浴池視野遼闊，晚上看着別府灣夜景,，白天看着遼闊的海景，始終係這𥚃最舒服，浸到唔想走。

回到房間已經22:00，升降機開始冇咁嘈了，瞓覺也不太困難。

漂流日本 • 動態移民 – Day 12

晨早05:00便起床執行李，05:30乘第一班接駁巴士往  棚湯。

晨早氣温很冷，更適合浸溫泉。先沖完身再焗一焗汗。

早上的 棚湯比下午寧靜舒適得多。

浸完温泉要飲支香濃牛奶( ¥130)。

07:15去食自助早餐，豐富到呢，食咁多太有罪惡感了。

牛肉飯好鬼好食，牛肉味又濃飯又有口感，連洋蔥紅蘿蔔等配菜也甜到爆。

每餐也吃大量水果。

奄列和水果忌廉三文治好正，蛋糕都好想食多件。

紅豆黑糖糯米丸子勁煙韌美味。

早餐又係食到超晒標，「食咗至減」確係警世箴言。

退房後乘08:15接駁巴士到別府駅，把行李放在Locker( ¥600)，然後上午遊遍別府地獄，下午乘JR往油布院。

補充資料 :

1.     ￥100兌HK$5.9 (HSBC網上兌換價，2022年5月在英國兌換)。

2.     ￥100兌HK$5.3 (當地信用卡簽賬)

3.     「JapanTransit」和「日本鐵路通」這2個App可用來搜尋火車和巴士班次，十分之好用。另外可以用網站https://www.eki-net.com/Personal/Top/Index 附助核對火車班次，防止出錯。

4.     九州鐵路周遊券(Kyushu Rail Pass)(全九州-7日)每位￥20000，在Klook購買有九折￥18000。

5.     乘JR由中津去 別府需40min。

 

---待續---

日本九州、山陰山陽、山口縣22天行程參考(點連結有詳細遊記)

日數	行程路線	日程重點
Day 01	香港→福岡	博多1番街–牛腸鍋•馬肉刺身
Day 02	福岡	博多1番街牛舌早餐•太宰府天滿宮 ; 太宰府天滿宮表參道•博多一幸社•福岡城跡•福岡塔•天神屋台
Day 03	福岡→島根 玉造温泉	博多1番街牛舌早餐•玉造温泉 ; 玉造温泉混浴風呂 長樂園
Day 04	玉造温泉→松江→出雲大社→松江	松江城•出雲そば処八雲庵•松江歷史館喫茶 ; 出雲大社 ; 島根結緣電車•松江和ら紅楚蟹餐
Day 05	松江→三徳山→三朝温泉→倉吉市→鳥取	三徳山三佛寺登山 ; 混浴風呂三朝温泉•鳥取二十世紀梨 ; 倉吉白壁土藏群•鳥取爐端燒
Day 06	鳥取	白兔神社•鳥取砂丘 ; 岩井溫泉•炭火烤鳥取牛
Day 07	鳥取→恋山形→岡山	鳥取城跡•賀露市場 ; 恋山形駅•岡山Dormy Inn天然温泉
Day 08	岡山→宮島→岩國市→岡山	宮島口上野商店烤星鰻 ; 岩國市錦帶橋 ; 岩國城•錦帶橋•岡山市廣島牡蠣燒餅
Day 09	岡山→倉敷→下關	岡山後樂園•倉敷 ; 倉敷美觀 ; 下關Dormy In天然溫泉
Day 10	下關→門司港→下關	單車漫遊下關(1) ; 單車漫遊下關(2) •河豚之鄉唐戶市場 ; 單車漫遊門司港
Day 11	下關→中津→別府	單車漫遊耶馬溪 ; 別府絕景秘湯杉乃井ホテル
Day 12	別府→由布院	別府地獄•葫蘆溫泉 ; 由布院紅葉
Day 13	由布院→鹿兒島	由布院 ; 鹿兒島黑豚肉涮涮鍋
Day 14	鹿兒島→櫻島→鹿兒島	單車漫遊櫻島火山•廻る寿司めっけもん
Day 15	鹿兒島→武雄温泉→長崎	武雄温泉 ; 長崎市半日遊 ; 長崎平和公園
Day 16	長崎→嬉野温泉	長崎軍艦島•長崎牛鐵板燒 ; 嬉野温泉
Day 17	嬉野温泉→唐津	唐津半日遊 ; 唐津温泉旅館 網元の宿 汐湯凪の音
Day 18	唐津→佐賀	呼子朝市•河太郎呼子魷魚刺身 ; 佐賀市半日遊•佐賀牛晚餐
Day 19	佐賀→福岡	佐賀自駕遊(1)祐德稻荷神社 ;  佐賀自駕遊(2)大魚神社の海中鳥居•炭烤海鮮 ; 佐賀自駕遊(3)水果巴士站•肥前浜宿酒蔵通り
Day 20	福岡	葫蘆壽司•住吉神社•樂水園 ; 福岡海購城瑪麗諾亞•天神屋台
Day 21	福岡	迴轉壽司富士丸•壽司郎 ; 福岡三越天神店•炭火燒肉店にく屋肉いち
Day 22	福岡→香港	il FORNO del MIGNON迷你牛角包•長浜屋台拉麵