縱橫沖繩 • 跨九州(59) – 牛の極品 佐賀牛

九州佐賀牛 季樂本店~佐賀牛午餐

根據日本經濟新聞(NIKKEI)報導，在日本衆多和牛品牌之中，佐賀牛排行第七，排名在 飛驒牛之上。季樂 是九州佐賀一間持續得到高評分而且相當有名氣的佐賀和牛鐵板燒餐廳，基本上去到佐賀想吃佐賀牛的話，連日本人也會推薦 季樂，因為在季樂可以吃到最高品質的佐賀牛，如果想價錢便宜一點，可以選擇中午時段的午餐，只需¥5000左右便可以吃到極高質的佐賀牛套餐。

縱橫沖繩 • 跨九州 – Day 32

行程：福岡→佐賀→福岡(天晴)

繼續上一篇Day 32行程。

<<佐賀>>

從熱氣球節會場乘火車離開，10:30到達 佐賀駅。

沿路行1km去 季樂，佐賀街道上很多這些日本名人的銅像。

佐賀牛燒肉 季樂本店 - 好彩早到，沒有訂位也有枱，只是鐵板燒已經滿座，只能坐普通位。

麒麟啤(¥700) – 價錢和昨晚屋台一樣，所以屋台真係貴得過份。

試了2份不同價錢的午餐，看看有什麼分別。

佐賀牛里脊肉套餐(佐賀牛ロースステーキランチ)(¥5400) – 自己在熱板上煎的套餐，送沙律和前菜，雜菜碟可以食完牛扒之後，用熱板上牛油一起炒。

佐賀牛里脊肉 – 賣相像西冷扒那麽鮮嫩，好靚仔。

上埋白飯、漬物和味噌湯，可以開始煎牛扒了。

初時以為塊板唔多夠熱，想不到效果又煎得幾夠鑊氣，很容易便可以煎濃面。

佐賀牛里脊肉一啖入口…. 精神為之一振，好L好食呀，是最頂級的肉質和味道，今次來了日本成個月，試了石垣屋、琉球の牛、黑5、石田屋、宮崎牛、大東園和很多温泉旅館的和牛，始終吃不到這感覺，今日終於食到了，好開心。

繼續煎多幾塊肉，越食越好味，肉又嫩又香牛味，絕對比得上多年前在宮崎 大淀河畔那宮崎牛鐵板燒的水準，季樂的質素是我在日本吃和牛的Big 4。

炒埋份野菜，唔好浪費了牛油。

甜品普通啦，味道只是中上。

送埋奶茶，Perfect Ending。

佐賀赤身牛排套餐(佐賀牛赤身ステーキランチ)(¥3500) – 另一份餐的牛扒煎完才上枱，味道和肉質真係比貴餐差少少，部份位置有根，不過整體上依然比大東園高質好食，這價錢唔貴。

食完季樂之後個人好開心，今日可以唔食嘢了。

12:27-14:00乘JR慢車由 佐賀回到 福岡，車費¥1130。

<<福岡>>

博多駅 – 又回到這𥚃，中午冇乜節目，可以在商場行街。

il forno del mignon – 博多駅內這小店經常大排長龍，賣的是迷你牛角包，共有三款口味包括原味、朱古力和蕃薯味，試過一次，幾好食的，不過要排長龍又唔係好值得。

Mon Cher – 2003年在大阪創立甜品店，現在單是日本已有超過20間分店，最近連香港的旺角也開了店，但價錢是日本的4倍。

大阪堂島卷(¥861) – 以北海道直送的牛奶製成，生忌廉充滿牛奶的甘香濃滑，蛋糕卷滿滿的蛋香，有由布院B-speak的8成水準，好好食，香港賣HK$138。

和牛非常之抵食，記得有次在東京買了一塊牛扒返香港，都好耐之前了。

中洲屋台 – 黃昏又來這𥚃，今日靜好多啊，原來只是昨天星期六才咁旺，星期日已經很靜。

一蘭 本社總本店 - 今晚去中洲完全是為了到這𥚃打個卡食碗麵， 一蘭拉麵香港都有啦，但來到福岡怎可以不來總店朝聖。

一蘭拉麵 始創於1960年，現時在日本有超過30家分店，許多店舖都依然會出現排長龍的情況，總店當然也不例外了，排了20min。

在售賣機自助落單，沒有溝通問題。

室內設計仍然是自閉位，食完唔好阻住地球轉，即走。

天然豚骨玉子海苔拉麵(¥1240) – 好鬼貴呀，而且份量好細幾啖食完，味道比屋台的拉麵優勝，不過真心覺得佢哋好唔抵食，應該好多年後才會再試了。

夜晚沿河岸睇吓聖誕燈飾，昨晚太多人冇乜心情慢慢睇。

屋台已經開檔了，不過有很多檔今日冇開，人流也只有昨天星期六30%左右。不過現在的屋台掛住搶錢，本地人一定唔會幫襯。

中洲另一端的小食攤位反而很多人，可能因為價錢比較貼地。

沿着 博多運河行返酒店休息。

博多運河城 – 很大型的商場，激光噴水池幾精彩，睇完先至行。

明治牛奶(¥189)；Mon Cher忌廉蛋糕卷(¥861) – 忌廉充滿牛奶的甘香濃滑，蛋糕卷滿滿的蛋香，有由布院B-speak的8成水準，好好食，配上日本牛奶更加甘香。

西鉄ホテルクルーム博多祇園 櫛田神社前 – 回到酒店又浸個靚温泉，消除整日的累氣。

明天要離開九州了，繼續前往山口縣。

 

補充資料 :

1.     日元現金匯率￥100 兌HK$5.9，在這價錢入了不少貨。

2.     日元Visa Card簽賬匯率￥100 約兌HK$5.35。

 

 

---待續---

日本沖繩、九州、山口縣40天行程參考(點連結有詳細遊記)

日數	行程路線	日程重點
Day 01	香港→大阪→石垣島	大阪近郊半日遊 ; 石垣市半日遊
Day 02	石垣島→與那國島	石垣市The Breakfast Hotel超值早餐 ; 與那國島半日遊
Day 03	與那國島	與那國島潛水(Part 1) ; 與那國島潛水(Part 2)+與那國島巴士半日遊
Day 04	與那國島	與那國島潛水(Part 3)
Day 05	與那國島	與那國島1天自駕遊(Part 1) ; 與那國島1天自駕遊(Part 2)
Day 06	與那國島→石垣島	石垣市半日遊 ; 石垣島半日美食遊
Day 07	石垣島	石垣島巴士1日遊(Part 1) ; 石垣島巴士1日遊(Part 2) ; 石垣牛烤肉～石垣屋
Day 08	石垣島→竹富島→石垣島	石垣市酒店超值早餐 ; 竹富島半日遊 ; 石垣島黃昏釣魚團
Day 09	石垣島→波照間島→石垣島	波照間島單車1日遊(Part 1) ; 波照間島單車1日遊(Part 2)
Day 10	石垣島→西表島→石垣島	西表島半日遊 ; 石垣島半日遊+石垣牛烤肉～石田屋
Day 11	石垣島→小浜島	小浜島單車半日遊 ; 小浜島南十字星度假村
Day 12	小浜島→石垣島	小浜島南十字星度假村 ; 石垣島Club Med假期(Part 1)
Day 13	石垣島	石垣島Club Med假期(Part 2) ; 石垣島Club Med假期(Part 3)
Day 14	石垣島	石垣島Club Med假期(Part 4) ; 石垣島Club Med假期(Part 5)
Day 15	石垣島→沖繩那霸	那霸市半日遊
Day 16	沖繩那霸→沖繩南部→恩納	沖繩南部自駕遊(Part 1) ; 沖繩南部自駕遊(Part 2)
Day 17	恩納→讀谷討→大石林山→古宇利島→名護	沖繩讀谷村體驗捕魚 ; 大石林山 • 古宇利島美食
Day 18	名護→沖繩萬座酒店	沖繩美ら海水族館 ; 花人蓬午餐 • 沖繩洲際萬座海濱酒店
Day 19	沖繩萬座酒店→讀谷村→美國村→那霸市	萬座毛 • Trip Café紫薯甜品 • 讀谷村 • 美國村 • 沖繩民瑤居酒屋
Day 20	沖繩那霸	那霸市1日遊(Part 1) ; 那霸市1日遊(Part 2)
Day 21	沖繩那霸→與論島	5小時渡輪往與論島 ; 與論島自駕遊
Day 22	與論島	與論島魚市場 ; 百合ヶ浜 ; 與論島浮潛 ; 與論島鄉土料理
Day 23	與論島	與論島自駕遊 ; 與論島酒店Pricia Resort Yoron
Day 24	與論島→奄美大島	8小時渡輪往奄美大島• 奄美大島鄉土料理
Day 25	奄美大島(通宵渡輪往鹿兒島)	奄美大島自駕遊(Part 1) ; 奄美大島自駕遊(Part 2) • 11小時通宵渡輪往鹿兒島
Day 26	鹿兒島→宮崎	宮崎日南海岸自駕遊 ; 宮崎秘湯旅館ホテル日南北郷リゾート
Day 27	宮崎→霧島	飫肥 • 宮崎牛燒烤午餐 ; 霧島溫泉秘湯~旅行人山莊
Day 28	霧島→熊本	霧島神宮 • 熊本市半日遊
Day 29	熊本→阿蘇	阿蘇火山一日遊 ; 阿蘇火山秘湯~阿蘇廣場飯店
Day 30	阿蘇→黑川温泉	黑川温泉1日遊(Part 1) ; 黑川温泉1日遊(Part 2) ; 黒川温泉旅館いやしの里樹やしき
Day 31	黑川温泉→福岡	篠栗九大之森 • 福岡燒肉店~大東園 ; 福岡中洲屋台
Day 32	福岡→佐賀→福岡	佐賀國際熱氣球節 ; 佐賀牛季樂本店午餐 • 福岡市半日遊
Day 33	福岡→山口縣美禰市→山口縣長門市	山口縣秋芳洞 • 秋吉台 • 秋吉台自然動物公園Safariland ; 長門湯本溫泉～大谷山莊
Day 34	長門市→角島→長門市	長門大寧寺 • 角島大橋 • 元乃隅神社 • 楊貴妃の墓 ; 山口縣絕景温泉ホテル楊貴館
Day 35	長門市→萩城	萩城半日遊 ; 山口縣萩温泉旅館～萩本陣
Day 36	萩城→小倉	小倉1日遊(Part 1) ; 小倉1日遊(Part 2)
Day 37	小倉→門司港→新門司港(通宵渡輪往神戶)	門司港半日遊 ; 門司 • 神戶內海郵輪阪九フェリー
Day 38	神戶→大阪	大阪2日遊(Part 1)
Day 39	大阪	大阪2日遊(Part 2)
Day 40	大阪→香港	大阪2日遊(Part 3)