天地任我行 – 國際美食 • 名菜

從前去旅行，資訊有限又冇銀用，最叻都只係攞住本Lonely Planet，靠書內簡單的地圖，只要能成功坐車坐船去到特定景點影張到此一遊相，已經好開心，算係成功地達標，一般只有行行企企食個包又一Day，甚少有特色活動，對食同住只有一項要求 ----- 平。時至今日，資訊發達，對旅程的要求亦自然高了，單係到此一遊已滿足唔到小太熊，一定要食得招積、住得特色、玩得夠激，才算是過到自己過到人的完美旅程。近年網上不斷地有人介紹世界各地的特色食物和飲食文化，使旅程生色不少，每次都識揾啲好味或有特色的當地美食。這章「天地任我行」就分享一吓我在世界各地食過的鄉土名菜和頂級美食。

<大洋洲 Oceania>

斐濟 Fiji

Nadi「陳氏海鮮酒樓」– 淸蒸野生椰子蟹(1.54kg)

蟹肉較爽脆實，味道甜中帶濁，蟹肉味獨特，蟹膏味道特濃，入口先苦後回甘，加些少伴蟹肉一起吃十分美味，味道和在聖誕島捉的野生椰子蟹一樣。


Nadi「Sentai Seafood Restaurant」– 生焗海鰻煲

非常之冶味的海鰻煲，魚皮和魚肉十分之厚，皮和肉夾著一齊食，簡直入口甘香，魚香噗鼻，是滿足100分的一碟餸。第一次食這種魚，看來以後很難有機會再食到了。



Nadi「Pan World Restaurant」– 椒剁蘇眉魚頭(足1kg)

雖然是冰鮮貨，但是和新鮮的蘇眉魚頭完全沒有分別。魚油極之香口，帶有蘇眉獨特的魚香味，魚頭肉質脆嫩，滑肉魚味濃厚無比甘香，剁椒十分香口，蘇眉的魚皮又厚又香口，食材和廚功都無懈可擊，見到都流口水。我比這碟餸又係100分。

澳洲 Australia

塔斯曼尼亞 Launceston – 塔斯曼尼亞生蠔

塔斯曼尼亞生蠔新鮮爽甜蠔味濃郁價錢又平，去到點會唔日日食。



袋鼠島(Kangaroo Island)「Clifford’s Honey Farm」– 蜂蜜雪糕

在Clifford’s Honey Farm，你可以找到最純正潔凈的野生蜂蜜，澳洲政府為了保持這裡蜂蜜的品質，禁止從所有地方(包括澳洲大陸)帶蜂蜜及其製品進入袋鼠島，可想而知這裡的蜂蜜有幾珍貴。蜂蜜雪糕用島上的Free Range雞蛋和園內的野生蜂蜜製成，蜜味清香，質感軟滑，是我吃過世界上最好食的雪糕，味道令人感動。

<亞洲 Asia>

日本 Japan

北海道 利尻島「神居海岸パーク」– 即開即食馬糞海膽

馬糞海膽食用的部份是牠的生殖線，呈深橙紅色，自己把海膽撬開、舀出來再用海水洗淨，入口即化，味道甘香醇厚，甘苦中帶甘甜味，味道可留在舌頭和喉嚨歴久不散，餘韻悠長，醇厚且濃郁，是世上完美的食物。



關西 神户市「ビフテキのカワムラ(Beef Steak Kawamura)」 – 神户牛西冷鐵板燒

肉質鮮嫩，牛味香濃，油香充足，是人間最完美的食品，亦係我到現時食過最好味的牛肉。配上日本清酒，更加把牛味和牛油香發揮至極限，好食到不能形容。。。。。實在唔捨得一口一件，呢件牛我分了兩啖細味品嘗。

 關西 神户市「Beef Steak Kawamura」– 神户牛刺身

話佢神級美味真係完全冇誇大，完美的一片牛刺身，那種刺激全身細胞的味覺感受，未試過真係好難明白，值得專程由香港飛過來食。



沖繩‧石垣島「石垣屋」– 炭燒美崎牛西冷

用天然炭火燒至半熟再加些石垣海盬，平衡了牛味與炭火牛油香，配合鮮嫩肉質，神一般美味，是吃牛的最高境界。只比神户牛西冷差一點點，係我到現時食過第二最好味的牛肉。


九州 宮崎市「大淀河畔みやちく」 – 宮崎牛西冷鐵板燒

要數日本最頂級的冠軍和牛，除了老牌的神戶牛，近年大熱的飛驒牛之外，便要數上年2008年摘冠的宮崎牛了。食完這件A5宮崎牛西冷 鐵板燒之後，覺得佢和神户牛實在各有千秋難分高下。硬要分名次的話，必需要睇埋廚師的廚功和制法，還有最重要係自己當時的狀態(例如有幾肚餓) 和心情。

綜合所有條件，我食過世上最好的牛是 Beef Steak Kawamura的 神戶牛，第二就係石垣屋的 石垣牛，大淀河畔みやちく的 宮崎牛排第三。

這件宮崎牛肉質幼嫩，牛肉味香濃，外脆內嫩，人口即化，稱佢為神級和牛絕對不過份，一生人必要最少吃一口，才稱得上無憾。



九州 熊本市「たなか畜産」 – 熊本牛西冷放題

「たなか畜産」有自家牧場，這裡最出名食熊本牛放題， 2hr內任食特選熊本牛西冷和肉眼，每位￥4212。這裡供應的熊本牛屬最頂級的和牛，肉質細嫩，牛肉味和油香均等，味道和口感完全比得上宮崎牛神户牛和石垣牛，只可惜不是炭火燒，始終差了一皮。



沖繩‧石垣島「石垣屋」– 半熟美崎牛壽司

入口即溶，帶有炭火的牛香味由舌頭經全身細胞直達腦神經，感覺完美出塵。



本州‧高山市「丸明」– 鐡板飛驒牛西冷

五成熟廚功到家，牛香肉嫩頂級貨。



九州 高千穗「高千穗市場」 – 高千穗牛炭火燒

完美的肉質和油脂分佈，像藝術品一樣，有些唔捨得食。炭火網燒 我覺得最能烤出和牛的美味，比鐵板燒更優勝。高千穗牛的肉質鮮嫩，味道香濃，和貴價宮崎牛唔係差好多啫，但價錢平一倍有多。



本州‧富山市「リバーリトリート雅樂倶」– 富山牛の昆布燒き

牛味香濃油份甘美，味道沒有給毗鄰出產的飛驒牛比下去，一樣咁好食，只是略嫌太油，送清酒一流。



本州‧能登半島「葭ヶ浦温泉 ランプの宿」– 野菜蒸能登牛肉

非常冶味的一道主食，牛肉味道十分濃厚，牛油香味入口迴甘，味道滿分，只嫌肉質略欠細嫩，但已經非常滿意，喜出望外的一味菜。



本州‧淡路島「あわじ和牛亭」– 炭火烤淡路牛

淡路牛是神戶牛的祖宗，價錢卻比神戶牛平一倍以上，牛肉味豐盈，非常好食，肉味絕對比得上神戶牛，只是油脂分佈沒有神戶牛的完美，以及肉質細嫩度給比了下去，儘管如此，淡路牛整體上的質素還是非常之好，而且性價比高。



本州‧淡路島「淡路島洋蔥廚房」– 淡路島洋蔥牛肉漢堡

淡路島人氣No.1的食物，也是日本No.1的漢堡包。餡料有炸淡路島洋蔥圈和混了秘製醬汁的淡路島牛肉片，牛肉味道香濃，配上鬆脆清甜的洋蔥圈和香軟的麵包，令口感更加豐富，味道比預期更好的漢堡包，下次再食。



本州‧奧飛驒「槍見館」– 新鮮飛驒牛奶

新鮮香濃，牛奶中的極品。



九州 鹿兒島「鹿兒島市」 – 阿蘇牛奶

阿蘇牛奶香濃幼滑，牛奶香味濃濃不散，牛奶中的XO。



關西 勝浦「桂成金槍魚」– KamaToro卡媽拖羅

是大拖羅以上的下巴肉，每條吞拿魚只有少量，唔係日日有貨。呢五片吞拿魚油香樸鼻，齒甲留香，係上等貨。



九州 福岡「鮨割烹やま中」 – 中托羅壽司

中托羅魚味濃香特出，魚、油甘香，入口即化，完全冇根，難怪身價這麽高。



箱根 河口湖「不動しえうとう」– 馬肉刺身

超高水準，肉味香濃又有油香，味道極佳，同和牛刺身有得揮，但價錢平一倍，必試。



關西 和歌山市「井出商店」– 豬骨湯拉麵

湯底的豬骨味又濃又香，麵質上成，豬肉夠唸，味道無械可擊的一碗麵，話佢係全世界最好食的拉麵，我到今日都唔會反對。我成日想返去再食。



本州‧富山市「麺家いろは」– 富山黑拉麵

富山市名物，义燒很腍肉味很香，麵質和黑湯的味道也OK，那些黑湯好像是墨魚墨汁，整體上都唔錯。



關西 大阪「道樂」– 松葉蟹套餐

有齊 松葉蟹刺身、蒸松葉蟹脚、燒松葉蟹脚、松葉蟹天婦羅、蟹肉壽司等等，全部都鮮甜好味，我分別在2009和2013年食過，完全冇跌Watt，難得。



關西 大阪 – 大阪燒餅 

關西特色食品，有豬肉有椰菜有麵粉槳一同煎起，幾有特色值得一試，但我試過幾間，有些一煎得大乾唔好食的。



沖繩 那霸市「第一牧志公設市場」– 巨型刺身琵琶蝦

甚少見這麽大隻的 琵琶蝦，肉質爽口彈牙鮮甜，比同Size的青龍蝦或澳洲龍蝦好食。



關西 貴志市「士多啤梨園」– 新鮮士多啤梨

士多啤梨又大又甜又多汁又新鮮，真係人間極品，比在塔斯曼尼亞果園摘的更好吃。



九州 原田「筑紫野いちご農園」– 新鮮士多啤梨

因為九州的士多啤梨園採用溫室種植，所出產的士多啤梨又大又甜又多汁，我試過其中一款品種還帶有一點牛奶香味。在 筑紫野いちご農園，每人只需¥1900便可任摘任食園內的新鮮士多啤梨一小時，吃到的都係世界上最頂級的士多啤梨，令人回味無窮。比和歌山和澳洲塔斯曼尼亞摘的士多啤梨更清甜多汁，從未吃過這樣好吃的士多啤梨。



九州 鹿兒島市「うなぎの末よし」– 備長炭燒鰻魚

鰻魚用炭火燒得很香，外脆內軟，一口咬下便覺鰻魚油香充滿口腔，好好食，比得上名古屋的篷萊軒和京都的松乃。



四國 高知縣「四万十屋」– 蒲燒天然鰻魚飯

四國四万十川名物，是從四万十川直接捕獲的野生鰻魚。十分之期待地大啖咬下，預期魚肉豐厚脆嫩彈牙，魚油豐盈甘香，人間之極品....誰知鰻魚肉「出人意表地」不算肥美，口感可以用「有點硬實」來形容，味道亦不算十分鮮甜香口，看來又被網上的吹水人士揾笨了。



九州 鹿兒島縣「唐船峽」– 流水麵

唐船峽是流水麵的發源地，每天湧出10萬噸甘泉般的清水，被泉水泡過的麵，清涼甘香。先把麵條放在流水中行幾個圈，再用筷子挾起佢。蘸上葱和醬油一齊食，一啖咬落去，麵條真係清涼彈牙，從未吃過如此彈牙的涼麵，值得專程去一試。

四國 小豆島「なかぶ庵」– 小豆島手造冷素麵

小豆島出產的素麵是全日本最好食的，島上處處可見家庭式的小型製麵工場，なかぶ庵 是小豆島人氣冧巴溫的手製作素麺館，冷素麺的麵質非常爽口彈牙，麵味清香，配上小豆島醬油和薑蔥碎更加美味。

九州 指宿「青葉」– 鹿兒島黑豚鍋

鹿兒島黑豚肉係極品，豬肉味極濃，美味程度絕不讓鹿兒島的和牛比下去，下次一定再食。飲食男女話，這裡的黑豚被飼養時都會讓牠們浸温泉的，唔知堅定流呢。



九州 櫻島「無人睇檔的小販」– 櫻島產桔仔

櫻島上有很多檔無人攤檔售賣櫻島產的桔仔，￥100一袋有8個，自己入錢落錢箱便可以攞走。櫻島產的桔仔又甜又多汁，非常好食。其後試過很多其它地區出產的桔仔，全部唔得，有些貴3倍都一樣咁差，只有櫻島產的桔仔好味道。



九州 由布院「B-speak」– 原味蛋糕卷

B-speak出品的蛋糕是九州最受歡迎的蛋糕之一。經常排長龍，而且經常賣晒，我13:00去到時見佢剩返好少咋。原味蛋糕卷未吃已蛋香樸鼻，入口鬆軟但質感密度甚高，像是高密度的海綿，每一啖均充滿雞蛋香味，最難得是中間的忌廉充滿日本牛奶的甘香濃郁奶味，和海綿蛋糕異常配合，整體上不太甜，是一件完美的蛋糕，亦是我吃過世上最好食的蛋糕。



九州 由布院「山のホテル夢想園」– 招牌雞蛋布典

蛋味香濃，質感完美，甜度適中的布典，是我食過最好食的布典，食完唔覺得滯。每日限賣40杯，要食就要趁早。



本州‧金沢市「幸せのパンケーキ」– 蜂蜜原味Pancake

蜂蜜原味Pancake(幸せのパンケーキ)能食出那份濃濃的蛋香味，質感軟綿綿，香草雪糕也是幼滑香濃，好好味。



本州‧金沢市「カズナカシマ」– 鮮橙大福加冰綠茶

カズナカシマ(Kazu Nakashima)是鮮果大福專門店，鮮橙大福賣相一流睇見都令人開心，鮮橙多汁又甜，大福皮煙韌帶糯米香，綠茶套很濃帶點甘苦可以消滯。



四國 香川県「いちご屋スカイファーム」– 新鮮士多啤梨

這果園的士多啤梨很大粒而且非常飽滿多汁，比香港買到的四國士多啤梨更清甜，像飲士多啤梨汁一樣。士多啤梨園唔算巧大，每位¥1550可以進內任食40min。整體上的味道比不上九州 原田「筑紫野いちご農園」，比和歌山產的士多啤梨就差不多，一樣係世界頂級的士多啤梨。又甜又大粒的士多啤梨，園外都有得賣，但每盒15粒要¥1650，比入場任食貴巧多牙。



四國 香川県「蒲生うどん」– 讚岐烏冬

小太熊話喎，以前四國的讚岐就係今日的香川県，縣內有成900間國立烏冬店架，因為這裡就係烏冬麵的起源地，所有烏冬都煙韌彈牙，出品全日本最美味的烏冬，來四國旅行個個都會食巧多烏冬架，去完一間又去第二間，一碗又一碗地不停食。「蒲生うどん」的贊歧烏冬响香川県排名第3架，這碗 紫菜天婦羅烏冬的湯底很鮮甜，麵質真係巧彈牙，夠咬口又夠腍，紫菜天婦羅都很巧味，滿分的一碗烏冬麵。



 北海道 夕張「土門農園」– 夕張蜜瓜

日本的蜜瓜是世界上最好食的蜜瓜，而 夕張蜜瓜就是最頂級的日本蜜瓜。土門農園是夕張有名的蜜瓜培植場，園內的蜜瓜全是頂級貨，蜜瓜全部皮薄夠腍勁甜又多汁，非常好食。



北海道 富良野「くまげら(Kumagera)」– 生牛肉飯

餐廳くまげら(Kumagera)位於 富良野駅附近，最著名係 生牛肉飯。那是將新鮮的A5富良野和牛切成片片牛肉刺身，再覆蓋在以富良野產的大米煮成的飯上面，牛肉片上的油脂分佈適中，片片都有雪花，入口嫩滑肉質軟綿無筋，牛味香濃，牛脂香而不膩，混合頂級的米飯，令我一試難忘，好想再食。



北海道 十勝「ウエモンズ ハート」– 牛奶軟雪糕

香甜軟滑牛奶味濃郁，是北海道最好味的軟雪糕。



本州‧金沢市「見城亭茶屋」– 金箔軟雪糕

賣相有點浮誇，食完之後可能消化唔到要痾金金，又可能中金毒，不過都唔理了，學古人吞金自盡。



北海道 十勝「ウエモンズ ハート」– 鮮牛奶

每日在牧場新鮮製造，牛奶味清新濃滑，牛奶的香羶味由舌頭直湧上鼻，令人一試難忘，而且冇盒裝牛奶咁滯，是世界上最頂級的 鮮牛奶，只限於店內飲用。



北海道 羅臼「濱田商店」– 新鮮北海道毛蟹

「濱田商店」是北海道羅臼著名的海產店，內有最新鮮的地道時令海產，新鮮北海道毛蟹的蟹肉很鮮甜，而且蟹膏非常甘香，和大閘蟹膏有得揮，很好味的一隻蟹，沒有令我失望。



北海道 禮文島「炉ばたちどり」– 二重馬糞海膽丼

馬糞海膽又大又厚身又夠新鮮，而且分有兩層，第一層有90g，第二層有 40g，完全足夠餸晒碗飯，那種獨有的甘苦味和即開的一樣咁濃，正到冇朋友，一人一碗，食完非常滿足。

東京 築地「壽司大」– 活赤貝壽司

即劏即製，上枱時赤貝還會郁的，赤貝肉質非常爽脆，鮮甜度是我對赤貝的認知以外，原來赤貝可以這樣鮮甜味美，極品。香港吃的赤貝即使生劏亦必帶㸃腥味。



東京 築地「壽司大」– 藍鰭吞拿魚腩(大拖羅)壽司

外觀完美，吞拿魚腩的油脂分布平均，色澤鮮明，是完全冇根的極品部位，像一件藝術品。整件壽司一口吃下的第一個感覺係，啲飯好好食呀，飯粒微暖軟綿綿兼且極有飯香，跟著才覺得大拖羅魚油甘香入口即融，完全融合了飯的質感和味道，是一件100分的壽司，如果把飯和魚分開吃必定沒有這效果。雖然以前也有吃過同樣質素的大拖羅，但肯定未食過這麼好食的壽司，可能因為魚和飯之間的味覺配合得太完美而出現的化學反應吧，這肯定是我這生人吃過最美味的一件壽司。



東京 築地「壽司大」– 金目鯛壽司

魚肉鮮嫩魚味清香淳厚，能吃到金目鯛的獨有魚鮮味，從未食過這麽好食的金目鯛，配上被魚生覆蓋着的飯糰，是大拖羅之後另一件完美壽司。



東京 築地「壽司大」– 池魚壽司

好好食，魚生夠厚魚油豐足口感一流，深海池魚味道鮮美濃郁獨特，和金目鯛一樣咁好食。



九州 鹿兒島市「廻る寿司めつけもん」– 石鯛壽司

肉質鮮嫩魚油充足，頂級的壽司，和大拖羅一樣咁香口好食，食食吓會以為自己食緊大拖羅。



本州‧金沢市「回転寿司もりもり寿し」– 黑喉魚(のど黒)壽司

金沢名物，魚油不覺比一般白身魚甘香，肉質亦不是特別鮮嫩，無啦啦燒吓塊魚皮唔知博乜，得個名。整體上唔差的，只是期望過高和性價比低。



關西 松阪市「寿し萬」– 松阪牛とろ壽司

使用了特上霜降松阪牛肉做成的牛肉拖羅壽司，像一件藝術品，滿布雪花紋的牛肉看來有如拖羅，簡單微微炙燒松阪牛肉再加鹽調味，牛脂的香味滲入了香軟的米飯中，令人反覆回味，極品。



關西 紀伊長島「季の座」– 伊勢活黒鮑姿ステーキ

伊勢的地道名菜，大大隻的四頭伊勢黒鮑魚，口感一流，昆布汁底鮮美，有誠意的一道料理。



關西 鳥羽市「海鮮店 太平洋」– 鹽燒伊勢龍蝦

龍蝦的蝦膏又多又Creamy，甘香美味差點比得上大閘蟹膏，龍蝦肉爽口彈牙，可惜鮮甜到只屬一般，整體上是滿意的。



四國 高知「明神丸」– 稻草燒鰹魚


四國高知最著名的地道名菜是「半熟鰹魚燒(鰹のタタキ)」，當地人在捕獲鰹魚之後，喜歡用乾稻草起火，再將切成厚片的鰹魚塊插在鐵叉上燒，鰹魚肉充滿了稻草香氣，魚味不太濃，肉質有點兒湖口，拌些葱花和蒜頭同吃，更能凸顯本土風味。



福井縣 三國港「望洋樓」– 清蒸越前蟹

日本北陸地區(即福井縣、兵庫縣、鳥取縣和京都府的北陸海岸)毎年的冬天是松葉蟹的當造盛產期，這時候各地魚民都會到自己地區的海淢補捉松葉蟹。日本不同地區捕獲的松葉蟹有着不一樣的名字和身價，在福井縣 越前港捕獲的「越前蟹」，身價全日本第二高。松葉蟹身上的黑色點點是寄生在蟹殼上的吸血蟲，又稱為「蟹蛭」，牠們是松葉蟹品質的保證，蟹殼上長滿越多蟹蛭的松葉蟹顯示牠離上一次換殼的時間越久，殼愈越堅硬，蟹肉更肥美紮實。這隻 越前蟹鮮甜美味，肉質鮮嫩滿滿，蟹膏亦充足，和 間人蟹一樣咁好食。

京都府 間人港「間人温泉 炭平」– 白灼 間人蟹

在京都府間人港捕獲的松葉蟹叫做「間人蟹」，產量非常之少，必須到當地才可以吃到，日本人又稱牠為「幻の蟹」，身價全日本最高。先把刺身蟹膏放到炭火上煮，再把灼完的蟹腳也放上去，令間人蟹肉嗦滿蟹膏同吃，非常之鮮甜甘香味美，味道令人神往。



福井縣 越前海岸「越前 ふるさとの宿こばせ」– 開高丼

位於 福井縣越前海岸的百年民宿「越前ふるさとの宿こばせ」有一碗驚世名物「開高丼」，以4隻越前蟹乸起膏拆肉後加上「越光米」製成，賣相令人見到都流口水，只從每年11月起供應到12月尾。民宿老闆表示，他父親多年前曾經用8隻越前蟹乸為日本旅行飲食作家「開高健」特製了這碗蟹飯，他吃過之後不斷寫文章盛讚此丼味道出眾ロ感豐富，令民宿聲名大噪，最後老闆便把蟹飯命名為「開高丼」，蔡瀾也說這是他吃過最好的蟹飯。我懷着期待的心情享受這碗飯，一啖入口就是結實的蟹膏，和食開的膏蟹紅膏差不多，撈埋煙韌的飯和少量的蟹肉，原本是碗上佳的飯，可惜清脆的蟹籽帶了點點腥味，破壞了整碗飯的鮮美，令人失望的一碗飯。

本州‧能登半島「能登食祭市場」– 加能蟹


加能蟹賣相腳相當吸引，味道亦鮮甜，和越前蟹差不多。把蟹腳肉伴蟹膏一同吃，更能吃出蟹膏的甘香和蟹肉的鮮甜。



九州 屋久島「寿しいその香り」– カメノテ(龜爪貝)

屋久島的名物，生長於屋久島上岩礁的群生海貝，外貌極似龜爪。白灼至八成熟，殻內的肉質有點像花甲，但沒有那麼鮮甜，偏咸，味道雖然只是一般，但這是遊屋久島必食的鄉土菜。



中國 China

北京 王府井大街 – 冰糖葫蘆

中國古代街頭小食，有山楂冰糖葫蘆和提子冰糖葫蘆，在果物外加上層脆冰糖制成，我食了串兩溝，清甜醒胃。



北京 王府井大街 – 生炸蝎子

明玩嘢的街頭小食，我試了一串，咸咸脆脆，核核凸凸，食左都唔知會唔會中毒。



北京 王府井大街 – 炸药膳大蜈蚣

望了一大輪，克服了反胃和起雞皮的感覺. . . . . . . . . 小喇吧. . . . . 死就死啦，買了一條。仲記得「神雕俠侶」有一段講洪七公和楊過在華山頂上一齊食炸大蜈蚣，洪七公講到係人間極品一樣，楊過初時唔敢食，但受唔住洪七公笑Q佢同睇佢唔起而試了一啖，點知一試上癮，覺得鮮味無窮，最後同洪七公一起爭食那幾十條大蜈蚣。我十幾年前已知道有呢味嘢，今次難得機會，決定一試。老細把大蜈蚣炸了半分鐘，交到我手上，我深呼吸一吓，在隔離的老外歡呼下，一口咬落個蜈蚣頭，卜一聲咬斷個蜈蚣身，然後試D味道. . . . . . 比洪七公老點呀，完全唔鮮味，只係咸咸腥腥. . . . . . . . . . .



上海 徐家滙「上海老站」 –白汁野生鮰魚

餐廳話 鮰魚係長江四大名魚之一，現在產量已很少。這味 白汁野生鮰魚味道有D似未制成的咸魚，魚肉上留有一塊很滑的魚皮，幾特別，都值得一試。



上海 新天地「新吉士食飯」 –清炒蟹粉

用料十足，蟹糕味道香濃，價錢公道，值得再幫襯。



上海 新天地「夜上海」 –清蒸鰣魚半條

中國四大名魚之一，貴到爆但只係普通貨式，肉少又多骨，魚味係濃但帶有微腥，第一次試食，相信亦係最後一次。



上海 七寶古鎮 – 乞兒雞

用春雞制成，細細隻肉質嫩口，有雞味。



上海 靜安寺站「鷺鷺酒家」 – 花鵰醉蟹鉗

蟹是生的，花鵰味濃蟹肉甜甜哋，味道幾特別，價錢平平哋值得一試。



上海 人民廣場旁「舒蔡記」 – 生煎包

外脆內香，包皮厚薄適中，食時小心肉汁射到隔離枱(像九龍城清真牛肉館的牛肉餅)，味道絕頂，不可不試。



杭州 「天香樓」 – 東坡肉

杭州名菜，細細件半肥半瘦肉味幾香，幾好味。

杭州 「天香樓」 – 龍井河蝦仁

杭州名菜，但蝦味太淡，蝦肉唔夠彈牙，而且冇乜龍井味，完全唔掂。



杭州 「天香樓」 – 西湖醋魚

杭州名菜，用桂花魚加糖醋煑成，酸酸甜甜味道都OK。



新彊 鳥魯木齊 – 烤羊串

非常好吃的新彊街頭小食，羊味濃郁、香料獨特冶味、肉質鮮嫩，在香港試過多間新彊菜都吃不到這種風味。



新彊 達阪城 – 羊肉伴麵

新彊極普通但又極好食的主糧，麵是即叫即人手拉成的，有咬口又夠飽肚，伴菜有羊肉粒和大量蔬菜，味道調較得好好，唔夠飽可免費加麵。

台灣 Taiwan

日月潭「涵碧樓」 – 紅茶愛玉凍

我最鐘意食台灣的愛玉，由台灣野生的愛玉子制成，像喱哩但比喱哩更爽滑和有質感，凍食十分消暑，食完個胃仲好舒服添，這碗愛玉唔太甜兼有陣陣茶香，好嘢。



十分「小販檔」 – 大腸包小腸

台灣獨有的街頭小食，來了台灣4次但小太熊死都唔肯試的<大腸包小腸>，我決定自己買一條食哂佢。原來好好味架，大腸係糯米腸，小腸係山豬肉腸，爽些酸菜一起吃好正架。



花蓮市「鵝肉先生」 – 鹵水鵝肉

<鵝肉先生>是花蓮市的名食店，經常人山人海，鹵水鵝肉 超級抵食，價錢係香港的25%，肉質嫩口，皮下脂肪很薄，少許鵝油脂分佈在肉中，鵝肉味濃中帶㸃油香，比九龍城創發優勝許多，是我食過最好味的鵝肉，亦是我在台灣吃過最好食的食物。



花蓮市「五霸焦糖包心粉圓」 – 五霸包心粉圓焦糖煉奶刨冰

花蓮市最人氣的甜品店，排隊足50min才有位，最人氣熱爆的獨創甜品就係“五霸包心粉圓焦糖煉奶刨冰”， 包心粉圓即係小湯圓，有紅豆、芋頭、黑糖等味道；底層有豆花、涼粉、紅豆和綠豆，面層壓上刨冰再加焦糖和煉奶，足2人份量，是很有特色的地道甜品，必試。



台北「老董牛肉麵」 – 冠軍牛肉麵(番茄半筋半肉麵)

勁好食，牛筋腩牛味非常香濃且夠淋又完全冇渣，湯底和麵條都一絕，下次一定再食。

韓國 Korea

濟州島 濟州市「濟州市海鮮街」 – 魚王 三刀剌身

曾經係香港最高身價的 三刀魚，一度貴過蘇眉同老鼠斑。清蒸我在香港食過幾次，魚味香濃油味充足。三刀刺身還是第一次食咋，味道清新鮮美，別有一番風味。



濟州島 濟州市「濟州市海鮮街」 – 生擋 鮑魚刺身

正囉，是6兩重的新鮮游水大鮑魚，鮮甜爽口帶些少硬硬哋，口感像生吃螺片。



濟州島 濟州市「豚舍豚(돈사돈)」 – 炭燒極黑豬

豚舍豚(돈사돈) 是濟州市最有人氣的黑豚肉店，炭燒極黑豬很高品質，豬肉味濃並帶炭火香，肉質鮮嫩，令人十分回味。



濟州島 濟州市「張家蔘雞湯」 – 石鍋鮑魚蔘雞湯

韓國必試的菜式，蔘味和雞味都幾香，反而鮑魚太淡口就顯得有點無謂，雞身內釀了糯米，幾好味。



慶州 慶州市「地道韓式餐館」 – 蠔葱煎餅

不可不試的韓式小食，大葱爽甜，蠔仔肉夠蠔味，魷魚又夠味，煎成一份又好味又有韓國特色的小菜，想再反頭食。但話時話，唔係間間舖都咁好味的，慶州市呢間最得，位置响天馬塚入口附近。



慶州 佛國寺外「地道韓式餐館」 – 韓式米酒

很特別的 韓式米酒，酸酸哋杰杰哋少少酒香，酒精度低。



慶州 普門湖「炭燒韓牛店(前 巨龜庒)」 – 炭燒韓牛肉

我一向極鐘意食韓牛，香濃味美油份沒有和牛那麽多，用炭火燒最好味，睇返都好想再食，每次到韓國都必食。但韓牛只供內消，唔出口的，香港少有的有錢都食唔到，更顯得珍貴。



釜山「扎嘎其市場」– 鮮海膽刺身

有騖喜，好鮮甜，完全冇腥味，高水準，每包只三十幾港紙，只係有小小腸挑唔乾淨。



釜山 海雲臺 – 韓式味醬生炒盲鰻

這碟制成品 韓式味醬生炒盲鰻，在你面前生炒，炒時那些盲鰻仲會郁郁吓，味道唔错，最襯韓國清酒。食完盲鰻後，可order碗白飯，並叫伙記把白飯加紫菜和剩下的盲鰻汁炒到燶燶哋食，很香口好吃的



首爾「醬油蟹專門店ProsoyCrab」 – 大醬油蟹

蟹膏爆滿蟹身和蟹蓋，甘香軟滑醇厚味道濃，生蟹肉爽囗鮮美，唔怪得千頌姨和蕂原紀香咁鐘意食。最驚喜還有蟹蓋撈飯，把飯撈埋蟹蓋上的膏一齊食，真係估佢唔到咁好味，小太熊都贊好呀。



束草「大浦港海鮮市場」 – 松葉蟹

松葉蟹爆膏甘香又鮮甜，蟹腿又甜又好肉，冇得頂。



束草「大浦港海鮮市場」 – 櫻花蝦

這櫻花蝦香港冇得食，肉質彈牙且極度鮮甜，從未吃過這麼甜的灼蝦，雖然貴但值得。

馬來西亞 Malaysia

吉隆坡「大樹頭蘇記炒粉」 – 滑蛋炒牛河

濕炒牛河吃得多，但這碟 大樹頭蘇記的名菜 – 滑蛋炒牛河，“飲食男女”話“這炒粉，吃一次會永遠記住”，雖然跨了少少，但話時話，佢賣相雖然麻麻，好似太多汁，但食落完全不覺油淋淋，河粉煙韌彈牙又香又滑，牛肉只有牛味沒有梳打味，有咬口又不覺韌，最正還是那充滿肉汁香味的汁底，在香港從未吃過這麽好味的牛河，“飲食男女”話連頂頂大名的 岳少食過都贊好，真係來到吉隆坡都唔食就笨。

Remark : 2017年11月再專程來幫襯，已經變了普通貨式，可惜。



吉隆坡「大樹頭蘇記炒粉」 – 中蝦炒麵

大樹頭蘇記的另一名物 – 中蝦炒麵，老實講，麵底不是頂級，炒得脆脆的唔覺油口，但香港也有這水準，一隻約4兩的中蝦味道也普通，不過，一撈埋D汁一齊食就不得了，那汁底充滿鮮蝦香味，明顯是用了大量蝦頭熬出來的，令人回味無窮。

Remark : 2017年11月再專程來幫襯，中蝦變了雪藏貨，完全冇味肉質亦硬實，麵底又硬又斷碎又油口完全冇味，那無敵的蝦汁底也沒有了，已經完全變了垃圾一碟，可惜。



吉隆坡 JinAlor「黄亞華小食店」 – 炭火燒雞全翼

黄亞華小食店的燒雞全翼，那皮脆肉嫩的程度實屬頂級，而且完全冇皮下脂肪，第一口咬下去那種 “卜”一聲的感覺令人難忘，賣相100分，如果加多些蜜糖會更加完美。



吉隆坡 Batu Cave「北海飯店」 – 清蒸 海蔘斑

魚肉有質感，鮮味不太出眾，但全身魚皮也像海蔘一樣厚，而且充滿膠質和魚油，非常香口有特色，第一次吃這種魚，有機會一定再來吃一次。

吉隆坡「海外天大飯店」 – 义燒

少年食形容這义燒是死前必吃，我就話佢係來吉隆坡必食，外皮非常香口而且肉質很腍，味道有點像臘肉，很冶味，是另類的極品义燒，下次一定再來食。



吉隆坡「新峰肉骨茶」 – 榴槤 竹脚王

今季榴槤滯銷，連新峰肉骨茶都要賣埋榴槤。老細介紹我食個最靚的1kg重竹脚王，佢話今朝至樹上跌落泥，肯定正過貓山王。老細果然冇吹水，呢個係極品榴槤，那種新鮮口感騙不了人的，超值。後悔冇買多三個返香港。



吉隆坡Jalan SS2 – 榴槤 黑刺

帶有點 紅蝦榴槤的花香，比紅蝦甜，好正。



吉隆坡Jalan SS2 – 榴槤 XO

味道不太甜、非常香口且甘苦味濃。



吉隆坡 JinAlor – 榴槤 蘇丹皇

肉較少只有三舊，可能因此營養更豐富，味道比常吃的「貓山王」更甘苦口感更佳。。。Wuuuuuu。。。香港都可以吃到這水準的榴槤便好了，可惜多多錢都食唔到。



勞勿「榴槤園Raub Raub Durian Orchard」 – 貓山王

世界上最美味的貓山王，今天才從樹上掉下來的，外皮乾爽皺紋並清晰，果肉的黏度極高，味道濃烈且層次感分明，甘苦濃甜奶酥等味道分別或是混合地遍佈極個榴槤的不同部位，入口啖啖都唔同味，是我吃過最好食的貓山王，比得上檳城的最頂級榴槤。



勞勿「永泰餅家對面的茶粿店」 – 茶粿和糯米滋

茶粿和糯米滋全部都好好食，糯米粉外皮的厚度適中，糯米味清香咬口十足，饀料有甜的南瓜和椰絲花生，也有咸的白蘿蔔絲，味道均十分出色，是頂級的 茶粿，香港的名店出品絕對冇咁好食。



馬六甲 雞場街 – 馬六甲土產榴槤

老細話係馬六甲土產榴槤，唔知個名，但係新鮮樹上熟的，這個榴槤1.2kg重，只係RM 6，味道仲. . . . . . . 好過「貓山王」和「蘇丹皇」呀，那種甘苦帶少甜的榴槤香味和皮爽肉黏的口感，令我想特登再來馬六甲吃這檔榴槤。，勢估不到食平價榴槤可以食到如此境界，實在不枉此行呀。。。。。



馬六甲 成果園(Sim Koa Yen) – 榴槤 甲必利

果肉純白口感細膩非常多肉，中甜微苦且部分帶有桂花香味，很特別的一種榴槤，很值得試。



馬六甲 雞場街「古城雞飯粒」– 古城雞飯粒

馬六甲名物，雞幾滑算係有雞味，但飯粒就. . . . . . 好古怪，不過值得一試的。



怡保 白咖啡街“Jalan Bandar Timah”「新源隆茶室」– 怡保白咖啡

香、滑、濃郁，怡保人喜歡加煉奶，甜甜哋吊出D白咖啡味更香，不可不試。我平時唔飲咖啡的，但超鐘意怡保白咖啡。



怡保 怡保市「老黃芽菜雞沙河粉」– 怡保 芽菜‧雞‧河粉

大馬怡保的名菜有三寶，就係 芽菜、雞和沙河粉，未食過等於未到過怡保。怡保芽菜和香港食到的完全兩樣，怡保芽菜條條肥大爽甜，食落嗦嗦聲且冇草青味，白切雞加了豉油，都有點雞味，如果期望不高的話，味道係OK嘅，但唔明佢點解甘出名。沙河粉口感幼滑，好常好食，可惜呢碗湯底較差。



怡保 白咖啡街“Jalan Bandar Timah”「天津飲冰室」– 雞絲沙河粉

天津飲冰室的 雞絲沙河粉 是極品中的極品，湯底相信用了大量蝦頭熬成，鮮甜濃郁，沙河粉亦滑不溜口，是整個怡保行程吃到最好的東西，可惜香港食唔到。下次去大馬，可能會為這碗河粉專程到怡保走一躺。

金馬崙高原「BOH Tea Centre」– 芝士蛋糕Nasi Lamak Cheese Cake

金馬崙高原的特色美食，芝士蛋糕很有質感和芝士香味，唔太甜又唔滯，最古怪是鋪了辣椒碎、咸魚乾和咸脆花生在頂，咸咸甜甜味道混雜一起又幾過癮，是遊金馬崙高原必試之選。



檳城 喬治城「興發茶室」– 鮮蝦炒粿條

即係炒貴刁，細細碟，鑊氣十足，蝦肉鮮甜中帶少許爽口，味道極佳，上上之選，每人最少要一碟至夠。



檳城 No.126 Jalan Perak的茶室 – 福建蝦麵

正到暈，湯底帶有鮮甜的蝦頭鮮味，又濃又鮮，聽講話個湯底係用蝦頭和豬骨熬足三個鍾的真材實料，實在超值，不枉此行。



檳城 「金城咖啡店」– 亞参叻沙(Asam Laksa)

「金城咖啡店」位於“No.20 Jalan Sungai Air Putih, Bandar Baru Air Putih, Botanica CT11000, Balik Palau” 。亞参叻沙 湯底的沙典魚味香濃帶㸃微酸，瀨粉很滑，而且有大量沙典魚肉，加埋蝦醬一同吃，味道一絶，比愉園茶室更加好味，應該是檳城最好味的叻沙，可惜地點太唔方便。



檳城 喬治城「松花江餐室」– 炭燒雞翼

皮脆肉嫩夠入味，比得上吉隆坡的黃亞崋，是檳城必吃小食。

Remark : 2016年06月再專程來幫襯，已經變了普通貨式，可惜。



檳城 Batu Feringgi「Golden Thai」– 忘不了

<忘不了Empurau>是鯉魚的一種，野生於大石頭急流河域一帶，馬來西亞主要分布地區包括吡叻州、登嘉樓、彭亨、吉蘭丹、沙巴及砂勞越。<忘不了Empurau>的肉質脆嫩魚味鮮甜油味回甘，近年才開始被重視，現在屬大馬最高身價的魚，價格比起其他名貴海魚類如老鼠班、蘇眉還要高，每 1kg賣RM 588，每條最細都 1.3kg重。

試一口魚腩，魚油味回甘好香口啊！再試一口魚身肉，肉質真係脆嫩魚味勁鮮甜，味道完全冇令我失望，已是我想像中最美味的河魚味道了。。。只係。。。真的好貴。



檳城 榴槤山「寶盛園」– 榴槤 青皮十五

外皮乾爽肉質creamy，入口即溶，濃甜中帶點點牛奶香，極品果皇，但我只嘗到輕微酒味，不如老闆講的濃烈。



 檳城 榴槤山「寶盛園」– 榴槤 D604

質感無械可擊，甜苦奶味均濃烈，爽脆外皮包着軟滑如綿的果肉，大啖地吃一口後含在口腔感受品嘗. . . . . . 你亞爺吖. . . . 真係有陣“麻”的感覺呀，食榴槤食到這種境介，實在覺得人生很美好。



 檳城 榴槤山「寶盛園」– 榴槤 蜈蚣

甜苦味道均最濃的一個，齒甲留香餘韻悠長，雖然不“麻”，但吃完3個榴槤從舌頭還可感到她的香味，證明她的味道是衆多品種最強的一個，10個Like。



檳城 榴槤山「寶盛園」– 榴槤 葫蘆

第一次在果園吃榴槤，這葫蘆榴槤早上在樹上掉下，中午前吃，較大核，D書話“葫蘆榴槤”有酒香和朱古力味，我真係食唔到有。但冇所謂，因為那種外皮乾爽內肉黏喉的新鮮口感是從未感受過的，而且那種帶輕微甘苦又不太甜(金枕頭太甜)的濃烈果味確係極品，大口咬下再慢慢細味，歯甲留香，千里而來也是值得的。

檳城 榴槤山「寶盛園」– 榴槤 紅蝦

飲食男女”和“美女廚神KIT”都話“紅蝦榴槤”帶有點蝦膏味，我又真係食唔到有喎。這個 紅蝦比剛才的 葫蘆更黏喉和濃味，但濃味中卻帶有強烈的鮮花香味，勢估不到食榴槤可以食到如此境界，實在不枉此行呀。。。。。



檳城 喬治城「榴槤德」– 榴槤 豬油膏

老細介紹我食這個叫“豬油膏”的榴槤，果肉純白，一吃之下更見驚喜，那種口感、甘苦的層次、奶油的香味帶點微甜，是我吃過最好食的榴槤。



沙巴 Semporna「阿龍飲食店」– 清蒸游水 蘇眉(足1kg)

每1kg只賣RM 280 (2012年4月價，香港3份1價錢)，平到笑，廚功了得火喉啱啱好，豉油咸度適中，有蘇眉獨有的魚味(近年試過三次吃到冇味的貴價蘇眉，包括 九龍城街市、深水埗街市和檳城的東方海鮮樓)，我係咁攻死呢條，成個魚頭隊晒，個魚咀更正到無論，抵食。



沙巴 Semporna「阿龍飲食店」– 清蒸游水 石頭魚(足1kg)

每1kg只賣RM 65 (2012年4月價，香港3份1價錢)，平到冇朋友，魚肉鮮甜脆口，味道及口感都絕對不比蘇眉弱，但價錢平幾倍，同枱的潛友都勁贊呢味。



沙巴 Semporna「阿龍飲食店」– 椒鹽游水斑馬賴尿蝦

每1kg只賣RM 100 (2012年4月價，香港3份1價錢)，每隻約10兩重共3隻，啖啖蝦肉鮮甜彈牙香口到爆燈，人間極品。

新加坡 Singapore

新加坡 新加坡河伴「富興海鮮」– 黑椒炒斯里蘭卡肉蟹

每1kg只賣S$35 (2011年6月價)，這隻重2.7kg，兩隻鉗像食雞髀一樣大到得人驚，肉質又爽又鮮甜又彈牙，黑椒味濃但只帶點微辣，沒有奪走蟹肉的甜味，在星州食過幾次最好味係呢檔，正呀……下次再幫襯這間舖。



新加坡 FarrerPark站「黃亞細肉骨茶餐室」– 星州肉骨茶

在星馬試過十幾檔肉骨茶，最鐘意食黃亞細，湯底夠香濃肉骨最香豬骨味。



新加坡 牛車水「亞坤咖央多士」– 全餐(咖央多士、半熟蛋加熱奶茶)

只食名氣，我不喜歡這件咖央多的味道，奶茶唔夠茶味奶又唔香仲加埋太甜，蛋就普通啦。



新加坡 牛車水「天天海南雞飯」– 海南雞飯

雞肉嫩油飯香口，幾好味，只係雞味唔夠濃，值得去試。



新加坡 Geylang Road – 榴槤 老樹貓山王

1.4kg的老樹貓山王，一開. . . . . 得二粒肉，但品質高，甘苦中帶濃甜，口感好好，外皮夠乾身，抵食。



新加坡 Geylang Road – 榴槤 D101

老細見個1.4kg的老樹貓山王得二粒肉，話唔好意思，所以免費送個D101比我地。榴槤「D101」口感夠cream，極重奶酥味，味道都好正好好食，而且好多肉。



新加坡 Geylang Road – 榴槤 貓山王

這個“貓山王”重 3.2kg，樹上熟，香濃中帶少少甘苦味，食完一啖後個口腔同D牙都留香好耐，確係正嘢，雪凍食相信更正。

泰國 Thailand

曼谷 唐人街「興來飯店」– 大蟹鉗水餃麵

用料靚，係新鮮肉蟹鉗，啖啖蟹肉又甜又爽口，水餃和麵就合格，但賣成THB 500(2013年5月價)，貴到儍。



蘇梅島 蘇梅Banyan Tree「SaffronRestaurant」– 燒安格斯牛肉沙律

真係估唔到响蘇梅島可以食到D牛味咁濃嘅燒牛肉，配上酸酸哋的沙律醋和新鮮蔬菜，又好味又有驚喜。



蘇梅島 蘇梅Banyan Tree「SaffronRestaurant」– 泰式烤鴨

單看賣相真係估唔到咁好味。這片烤鴨胸肉，全瘦唔肥，但鴨味濃郁，鴨皮烤得鬆化但又有咬口，完全沒有皮下脂肪，泰式 BBQ汁的味道調較得天衣無縫，再配上 House Wine，實在是完美的一道菜，GOOD。



布吉島 布吉市「Kunjeed Radnayodpak」– 椰汁布典

這小店的招牌甜品，椰汁味濃又帶糯米香，有咬口，非常好味抵食。



布吉島 布吉市「Natural Restaurant」– 芒果糯米飯

布吉島最美味的芒果糯米飯，芒果很香甜，糯米飯相當軟熟又有糯米香，加埋椰汁一同吃非常好食。



布吉島 芭東海灘 – 椰子雪糕

真係很好味，雪糕軟滑椰子味香濃，啖啖有椰子肉，再送一杯清甜冰凍椰子水，好正。

越南 Vietnam

胡志明市「鳳偉海鮮餐廳」– 炭火烤 越南大頭蝦

第一次食越南大頭蝦，冇乜期望，只係抱住人試我試的心態，心諗只不過係一隻大頭蝦，會有幾好食呀?? 香港乜靚嘢未食過呀。誰知，一吃那蝦鉗，嘩!!!!!!!! 鮮甜到彈起，再掰開蝦頭，D膏多到漏出來，試一試，無比甘香，再吃蝦身，鮮甜又彈牙，全隻蝦充滿炭火獨有的香味，香港絕對吃不到。



胡志明市「Pho Le」– 越式三味牛河

有齊生牛肉、牛展肉和牛丸，全都有水準，加上伴碟的配菜，十分美味，河粉幼滑湯底鮮美，是越南最好吃的牛河，到現在還常常想返去食。



胡志明市「Tib Restaurant」– 越式蒸餅

餅底夠韌有米香，伴上蝦亁碎非常香脆有蝦味，加上魚露同吃，美味可口，不可不吃。



胡志明市「雪糕店Kem Bach Dang」– 椰子雪糕和榴槤雪糕

椰子雪糕 – 香、滑、椰子味濃、奶味和甜度較低(更能食到椰子的鮮味)，每種味度均異常地配合，是一客完美的 椰子雪糕(假如冇晒D伴碟既Cream和水果就更完美)，一客我食過最好食的 椰子雪糕。

榴槤雪糕 – 單看外貌已知絕非凡品，品質之高已完全不能用價錢衡量，能附出這麽少便能吃到這人間極品，開始感受到 胡志明 在天之靈是如何照顧他的人民。為了這 椰子雪糕和榴槤雪糕，我會再來 胡志明市。



河內 河內市法國區「PHOThin」– 燒牛肉湯河

湯底清甜，牛肉有炭火香，河粉超滑，上佳之選。但始終及不上在 胡志明市“PHO Le”吃到的極品湯牛河。



河內 古城36街「PHO Gia Trungu」– 清湯牛腩河

2012年12月第一次吃，湯底清香鮮美牛腩味又香濃，同九記有得揮。2013年10月再吃，加幅驚人，而且味道明顯跌Watt了，味道比從前淡口了，但仍然好好味。



河內 古城36街「Bun Cha Dac Kim」– 炭燒豬肉春卷檬粉

有炭燒豬肉丸和炭燒豬扒，有炭火香，肉味亦夠，好好味。越式 豬肉春卷非常鬆脆，夠肉汁，豬肉味濃，係我在越南食過最好的春卷。



河內 古城36街街邊檔 – 冰貓屎咖啡+越南榴槤

這榴槤一食就知係今早樹上熟的正貨，外皮乾脆肉又香又cream，完全比得上檳城和怡保食到的好野，當然正過新加坡和吉隆坡啦。
這檔咖啡是在河內飲過最平和最靚的咖啡，香滑濃郁，飲完齒甲留香。2013年10第二次飲依然咁好味。

帛琉 Palau

帛琉 帛琉市中心「Seven Eat Restaurant」– 炒紅樹林肉蟹

斤半重，帛琉的特色菜，味道中庸(沒有嘩….好正的感覺)，肉質唔夠脆，不及新加玻吃的斯里蘭卡大肉蟹。

帛琉 帛琉市中心「SevenEat Restaurant」– 水果蝙蝠湯

絕對驚嚇，湯底冇乜特別，飲完湯後，餐廳會把那隻 水果蝙蝠拆肉上碟。水果蝙蝠的肉像豬又像雞，肉味濃郁。

香港 Hong Kong

香港 旺角「康年餐廳」– 熱奶茶

港式奶茶絕對可列作世界文化遺產，在香港衆多的老牌茶餐廳之中，我最喜歡 康年餐廳(只限旺角通菜街分店，其餘分店唔係好掂) 的熱奶茶，奶味適中茶味清香不是十分濃，嘆完都唔會頂住個胃，比金華、翠華、檀島….. 等等更好味。



香港 旺角「康年餐廳」– 蛋撻

香港實在有很多高水準的蛋撻店，其中 康年餐廳(只限旺角通菜街分店) 出品的蛋撻肯定係全地最好味的蛋撻之一，酥皮鬆化蛋層豐厚甜度和凝固度均適中，極品好嘢。



香港 旺角「康年餐廳」– 鮮牛油菠蘿包

康年餐廳(只限旺角通菜街分店) 自制的出爐麵包有質感，而且不像金華的麵包太甜太黏牙。這鮮牛油菠蘿包甘香脆軟，見到都流口水。



香港 旺角「富記粥品」– 炸兩

真的很難找到好味炸兩，又要即制油炸鬼又要夠脆腸粉又要夠軟醬又要好味。旺角「富記粥品」的一般食物質素只係中下，唯獨早市供應的炸兩非常得，即叫即制，油炸鬼夠脆之餘不失咬口，腸粉夠新鮮又軟滑唔駛講啦，連甜醬辣醬和豉油都十分冶味，我成日都想食。



香港 旺角「大家樂」– 焗豬扒飯

近年「大家樂」的 焗豬扒飯實在好味，不論塊豬扒、炒飯底和茄汁底都好正，所有老牌餐室或中高檔食店的 焗豬扒飯都給比下去，真係抵佢發。



香港 深水埗「合益泰小食」– 豬腸粉

誰說在香港家住深水埗劏房做窮人很慘，簡直胡說八道，以偏蓋全。天天都可以吃到世上最好吃的 豬腸粉很慘嗎？咪玩啦！只有唔欣賞自擁有的美好東西的人才會話自己慘，即係百萬富翁都慘啦，一千萬都冇。
深水埗「合益泰小食」的 豬腸粉我由細食到大，味道從冇踩Watt，那些甜醬辣醬麻醬豉油芝麻真係好味滿分，腸粉口感一流，我覺得佢好味過阿一鮑魚，是人類史上最美味的食物之一。

香港 深水埗「劉森記麵家」– 蝦子雲吞撈麵

什麽富豪懵太麵店麥奀記雲吞麵，又貴又細碗，都唔緊要，最衰係味道普通過响強國撑東瓜，懵太都未食過好嘢，麥奀都當實。
深水埗「劉森記麵家」的 蝦子雲吞撈麵，鴨蛋麵香口彈牙，雲吞好食，斗門蝦子夠份量味又濃，加埋冶味的大地魚湯，絕對係雲吞麵的Number One。又一證明家住深水埗劏房可以窮有窮風流。



九龍 深水埗「椰汁大王」– 椰子汁

從前常常在街邊小販飲到的 椰子汁，今日要在舖頭至飲到了，幸好味道一樣咁好，椰子味夠濃，淡奶亦夠香，唔怕肥的話真係一流。



香港 紅堪「時新快餐店」– 港式芝士漢堡包

這港式芝士漢堡包味道雖稱不上出衆(和連鎖店的漢堡包各有各好味)，只稱得上好味道，但制法卻甚有本土特色，用洋葱牛肉餅加沙律醬配片卡夫芝士，以前通街快餐店都有得食，末有老麥就有佢，現在變成本土遺產了，只有紅堪「時新快餐店」和個別舊區三數間快餐店仲有得賣。



香港 鯉魚門「致利海鮮」– 盬煱奄仔蟹

奄仔蟹爆膏肉嫩，黃膏的香口度比得上黃油蟹，而且蟹肉很鮮甜，只係幾十蚊一隻，正式好食又抵食。

香港 尖沙咀「東海海鮮酒家」– 蟹粉小籠包

每到秋季差不多間間酒樓都有 蟹粉小籠包食，但最香最正仍是尖沙咀的「東海海鮮酒家」(分店就差少少)，比起鼎泰豐、利園、上海的鼎興摟等等更好食。

香港 佐敦「亞龍咖哩」– 咖哩魚飯

很特別的咖哩汁底，用大量洋葱碎煮成，重口味但唔滯，魚係鷹鯧魚塊，很香口冶味，但要成舊水一碟都非常貴。

九龍 佐敦「澳洲牛奶公司」– 早餐

非單出色的地道港式早餐，牛油多士又厚又有質感，煎蛋很厚身而且十分有蛋味，全熟蛋白配流心蛋黃完全係perfect match，蛋邊燶燶哋很香口，唔似翠華揾油浸熟唔又燶邊咁樣衰，更加唔會像太興一係鼻涕蛋白一係煎蛋乾隻蛋又冇味咁不知所謂。通粉又滑又腍，湯底有雞殼味，火腿亦係上等貨，好食。這份早餐日日食都唔會厭。

九龍 九龍城「清真牛肉館」– 咖哩羊腩飯

真的非常好食，而且價錢大衆化，咖哩夠香又夠辣，羊腩又香口又淋，薯仔都好正，但很滯，每次食完個胃都唔多舒服。

香港 上水「廣成冰室」– 紅豆冰

紅豆香甜起沙又夠淋，配上黑白淡奶和手抱冰底，是世上最好味的港式紅豆冰，可惜快要失傳了。

 新界 上水「明記腸粉」– 腸粉

腸粉很滑，芝麻和甜醬辣醬都好正，比合益泰唔會輸好多，我路過一定會食。



新界 元郎   – 砵仔糕

是最有米香的砵仔糕，而且糕很煙韌又少甜，可惜紅豆普通，但整體上好好食。至少比深水埗坤記好得多，而且價錢唔駛一半。



香港 布袋澳「海鮮島海鮮酒家」– 咕嚕肉

布袋澳「海鮮島海鮮酒家」的海鮮就一般，反而咕嚕肉就一流，用半肥廋腩肉勁香口，脆粉薄薄唔會得啖炸粉，汁底不論酸甜度、濃度和份量都啱啱好，屬最頂級的港式咕嚕肉。



香港 布袋澳「發記海鮮酒家」– 海胆炒飯

吃過很多檔海胆炒飯，包括布袋澳「海鮮島海鮮酒家」，但只有布袋澳的「發記海鮮酒家」一檔令我回頭再幫襯，由佢賣HK$120一碟食到上次HK$220一碟都係一樣咁好味，海胆份量十足，啖啖都咁香口，而且季節限定經常有貨，所以一有得賣我一定會叫。



香港 沙田「楓林小館」– 荔芋香酥鴨

唔同平時在酒摟吃的三流貨，佢係香港最好食的 荔芋香酥鴨，酥皮鬆化，芋泥香口起沙，而且啖啖有鴨肉，配上秘制咸醬汁，好想再食呀，但試過一次過節人多時去，會大Watt的，建議平日中午去，次次都咁正架。

新界 沙田「坤記腸粉」– 腸粉

又係勁正的腸粉，軟滑得來韌韌哋，口感特別，醬和豉油都好得，見到都想食。



新界沙田「义燒大皇」– 蜜汁义燒

飲食男女評為全香港最好食的叉燒，我試完都覺得係，肥瘦比例完美，燶燶地十分香口而且肉香樸鼻，肉質夠腍，加上蜜汁夠多唔會乾爭爭，不論味道和口感都滿分，可惜第二次食便Watt了。



新界 將軍澳「翠園」– 燒腩肉

燒腩皮香脆鬆化，水晶腩肉肥瘦層次分明，非常香口美味，比利苑好食而且平一半，可惜又係水準唔夠穩定。



新界 將軍澳「晋薈」– 酒釀蛋白蟹鉗

其實只係普通的新鮮肉蟹鉗，鮮甜度一般，不過賣相實在太完美和吸引，見親廣告的相片都想食。到這酒釀蛋白蟹鉗真正放在面前時，真係唔捨得食，最從要狠下心，分很多細啖才把它慢幔吃完。



新界 大埔「亞婆豆腐花」– 豆腐花

香滑又夠豆香的 豆腐花，是香港小食的代表，每次去大埔唔食一碗便周身唔舒服。



新界 大澳「水鄉茶餐廳」– 蝦羔炒飯

聽個名已經估到有幾好味，事實上味道亦和估計一樣咁好味。第一啖已經感覺到濃濃的蝦羔混和在炒飯內，香口到冇朋友，飯底、蝦和叉燒都有水準，差點比得上「富林飯店」的「阿一炒飯」，越食越想食。



香港 銅鑼灣「富林飯店」– 阿一鮑魚

阿一鮑魚在中外也極有名氣，點貴都要試一次。這隻只係40頭吉品鮑，都有唐心的，汁底味道幾好啦，鵝掌都好味，有衝動吃第二次。



香港 銅鑼灣「富林飯店」– 阿一炒飯

估唔到「富林飯店」最好吃的不是鮑魚，而是 阿一炒飯，這碟炒飯真係好得，由飯粒蛋碎义燒至蝦仁都炒得極有功架，味道無得頂，亦唔會太滯，我時常想再食，我覺得好抵，好過去食啲二流自助餐啦。


香港 灣仔「福臨門」– 蝦餃

中式點心是香港的名菜，而蝦餃肯定是點心之王。福臨門的蝦餃皮薄餡靚夠新鮮，是香港最好食的蝦餃之一，食到啲老外都咀lam lam。


香港 上環「九記牛腩」– 清湯牛腩河

天下無敵的 清湯牛腩河，是香港之寶。湯底牛味濃郁啖啖精華，河粉滑不溜口，比得上在越南吃到的最頂級河粉，牛腩超腍而且牛味香濃，簡直同神户牛各有千秋，難怪長期都大排長龍。



 香港 中環「麥奀記」– 雲吞麵

大地魚湯底、蝦子麵和雲吞都有水準，雖然唔係香港最好食的雲吞麵，但名氣上是香港麵食的代表。



香港 中環「公利真料竹蔗水」– 蔗汁糕

蔗汁味濃但又唔係太甜，口感煙韌完美，是我最喜歡的甜品，睇見就想食。但除了中環「公利真料竹蔗水」，我唔知仲可以响邊度買到了。



香港 西環「源記甜品」– 清蛋糕

港式清蒸蛋糕，很有糕的完美口感，唔會太鬆又唔會太實，麵粉味和雞蛋味比例平均味道亦很清新，買到的地方已經越來越少了。

<歐洲 Europe>

奧地利 Austria

Hallstatt「ZAUNER」– 鱒魚肝伴牛油多士(Liver of Trout on buttered toast)

鱒魚肝有濃烈肝味，先苦後甘香，令人迴味無窮，同支Sparkling Wine味道好夾，我勁鐘意食，但小太熊話大苦唔多肯食，仲好，我食晒都唔夠。



Hallstatt「ZAUNER」– 土產魚子醬(Caviar of the Hallstatter fish “Babypillen”)

又係好嘢，只賣€8.2(2012年10月價)，真係同响莫斯科食的幾舊水港紙貨式差唔多，甘香彈牙，抵食又好食。



Hallstatt「ZAUNER」– 燒鱒魚

魚味鮮甜，皮脆肉嫩，品質極高的一條鮮魚，睇返張相諗起都流口水。

德國 Germany

黑森林區 巴登巴登(Baden-Baden) – 正宗 黑森林蛋糕

在黑森林蛋糕的起源地吃正宗 黑森林蛋糕，感覺特別醒神。這件蛋糕朱古力味濃，中間加入大量酒釀櫻桃，酸酸哋勁多汁，外面灑了不少RUM酒，所以企唔直，一定要打橫上碟，全件蛋糕酒含量甚高，食完即刻揸車可能會醉駕啊。



慕尼黑「Haxnbauerim Scholastikahaus」 – 炭燒德國成豬手

慕尼黑出名食咸豬手的人氣店，德國的名國菜，飲食男女贊到佢上天，又話“炭火烤到外皮脆卜卜，肉質不乾不嚡不硬，吃了一塊後，休想停口. . . . . 下冊三百字”。

期望極高的一度國菜，可惜名不符實，外皮被烤過了火，硬得差點刀也切不開，只有約五分一的外皮硬硬脆脆咬得開 (見附近每枱人都係食剩晒D皮)；肉就烤得太乾，有一半肉像吃豬肉乾，味道只係一般，攪乜呀？？？？飲食男女老點囉。

慕尼黑「Haxnbauer im Scholastikahaus」– 牛肝清湯 (Beef Consomme with liver dumplings)

飲食男女强烈推介，將牛肝打碎搓成球狀，加上牛骨清湯，肝味極濃郁，味道係OK，值得一試，但吃了半粒已好滯。



黑森林區 杜賓根(Tübingen) – 黑生啤(Dunkel)

德國的黑生啤麥味夠重，新鮮易入口，唔覺唔覺好易飲大。



杜賓根(Tübingen)「Gaststättezum Gutenberg」 – 德國牛肉餃子 (Geschmälzte Maultaschen)

我最鐘意食的德國菜，非常好味，皮和餡料都靚，最騖喜還有那湯底，是正宗法式洋葱湯，和在高檔法國餐廳飲到的同樣高質素，我成碟食清連湯都飲晒。



Garmisch Partenkirchen楚格峰(Zugspitze) – 即煎熱狗

德國人氣食物，煎得香脆，個包都脆軟新鮮。

意大利 Italy

Bologna「La Sorbetteria」 – 開心果味+忌廉味Gelato

La Sorbetteria是Bologna全城最出名的 Gelato店，這杯Gelato是我食過最好食的一杯，香濃幼滑，只應天上有。

Puglia省 Martina Franca「Caseificio Pioggia」– 新鮮水牛芝士球Burrata

“新假期”介紹的隱世水牛芝士店Caseificio Pioggia，位於Martina Franca的舊城附近，店內最好味的 新鮮水牛芝士球 Burrata，每日自家鮮制，制成後需浸在鹽水內，外層是水牛芝士，內層是半凝固的水牛芝士，一咬下便爆汁，充滿芝士和鮮牛奶的香味。這相信是全世界最好食的芝士球，太好食了，在大餐廳食唔返，真後悔冇買多幾舊當飯食。



Puglia省 Gallipoli的碼頭旁邊 – 新鮮即開即食海貝

Gallipoli最出名係海產，呢碟即開海貝乜都有，每隻都新鮮及帶有海水，再配一杯自家制白酒，別有一番風味。但講真新鮮味很夠，甜味不足，不過很值得試。



Puglia省 Altamura「Forno Antico S.Chiara」– 麵包

Altamura是南意大利註名的 麵包之城，「Forno Antico S.Chiara」是城內最古老的麵包店，所有麵包都用個幾百歲的磚爐柴火烤焗而成。這是最原始的麵包，亦是世上最好食的麵包；麵包身密度高，質感軟熟，完全沒有添加麵粉以外的味道，入口時麵香樸鼻，第一次食到麵包的真味，即使隔了一晚第二日再拿來食，麵包身仍然軟熟無比(只係外皮硬得像石頭)，是一個真正和完美的麵包。可以吃得出麵包師傅一份對麵包的一種專重。可惜，我們到埗時已是下午，早上出爐的麵包已凍了。但凍了的麵包仍然好食。

現時香港的麵包店只會不斷攪花款，永遠都把麵包弄致變了其他味道，完全不專重麵包的原味與精神，要在香港吃一個有麵包香和質感的麵包，比找到一碗有飯香的白飯更難。



Puglia省 Altamura –意大利無花果

在街邊水果店買的無花果(每個€0.1)，掰開來吃，又甜又香，果肉脆脆的，非常特別，又平又正啊。。。香港賣的貴價無花果同佢無得比

西班牙 Spain

龍達(Ronda)「Casa Ortega Restaurant」– 黑毛豬火腿Iberico Bellota

西班牙南部出產世界最Top的火腿，上面呢碟150g只賣€18 (2009年11月價)，好味到難以形容的神級味道，我第一次食，從始上了黑毛豬火腿癮，但在西班牙南部以外的地區如馬德里或Cordoba已吃不到這種神級味道，即使在香港買HK$400 – 100g的貨式都不外如是。



馬德里 Plaza Mayor「RestaurantSobrino de Botin」– 燒乳豬

Restaurant Sobrino de Botin的燒乳豬外皮鬆化又少皮下脂肪，肉質鮮嫩冶味又有肉汁，味道頂呱呱，是我食過最好食的燒乳豬。



巴塞隆拿「Xiringuito Escribà」– 西班牙海鮮飯(Escribà special Paella)

西班牙海鮮飯是西班牙的國菜，呢碟由青口、大蝦和蜆煮成的上湯海鮮飯，飯的味道很好，但略嫌濃味了一點，青口和大蜆鮮甜，但大蝦係流嘢，唔掂。整體上這味海鮮飯是合格的，比禾以前吃過的好食，難得係2個人Order一人份量都肯落單(很多都要最少2人份量才肯落單的)，值得一試，但就冇再吃的衝動了。

俄羅斯 Russia

莫斯科 Tverskaya「Café Pushkin」– 正宗 俄羅斯羅宋湯

終於嘗到正宗的俄羅斯羅宋湯了，雖然稱不上是人間美食，但仍有一份莫名的感動從心內湧出來。俄羅斯的羅宋湯，沒有番茄及西芹，只有大量紅菜和小小牛肉，加點香草和sour cream，味道比想像中好飲，起碼一定比香港太平館的羅宋湯好好多。



莫斯科 Barrikadnaya「CentralHouse of Writers」– 三文魚子

Central House of Writers是我到過最靚的餐廳(但很平)，這三文魚子的賣相亦非常完美，只賣HK$140(2010年09月價)，這杯三文魚子外皮脆彈牙，內裡充滿油香及口感豐富，甘香味美，咸度適中，配上頂級環境氣氛，確係極品



聖彼得堡Belmond Grand Hotel Europe「Caviar Bar」– 鱘魚子醬Sevruga Caviar

鱘魚子醬是名貴的食材，入口沒有脆卜卜爆開，而是慢慢溶化，魚油慢慢滲出，魚油香味濃厚幼滑，咸度適中，香味獨特，和香檳的味道非常相配。

葡萄牙Portugal

里斯本「Pastéis de Belém」– 元祖葡撻(Pastel de Belém)

元祖葡撻熱辣辣，酥皮香脆鬆化有層次，蛋漿香濃味美甜度適中，比得上澳門安德魯餅店的出品，好味。Pastéis de Belém是葡撻的起源地，來到葡萄牙，亦只有在Pastéis de Belém才可吃到澳門安德魯餅店水準的葡撻，其餘地方吃到的全是Rubbish，不管是高檔地方還是地道café。



里斯本「Resturant Vale do Rio」– 白灼蝸牛

好變態，在葡萄牙四處都有得食，細細隻咸咸哋有少少咬口，最arm送啤酒。睇落去仲以為係生食添，嚇得禾吖。



Negrais「OCaneria」– 葡式木炭燒乳豬

皮脆肉嫩，有豬肉香味，送薯片一同吃，美味的一道葡國菜，但比不上在馬德里吃的那碟乳豬。



波圖「Casa Aleixo」– 炸馬介休球(Bolinhos de Bacalhau)

炸得甘香鬆化，咬落啖啖係綿密的鱈魚肉，咸度適中，為葡國菜爭回一口氣。唔似得澳門常用薯仔球充馬介休球咁鬼衰格。



波圖「Conga」– 葡式豬扒包“Bifana em Pao”

飲食男女話，Conga制的葡式豬扒包全城最好味，一定要試咁話喎。豬扒其實係豬成肉片，以啤酒和辣椒煮成的醬汁熬煮，香辣味美，豬仔包索滿味汁非常好味，算是禾在葡萄牙吃過數一數二的美食。

波圖「Cafetaria Marbella」– 葡式三文治“Francesinha”

波圖獨創的葡式三文治，厚厚的麵包上鋪滿芝士片，再淋上大量以洋葱、番茄和白酒煮成的醬汁，內裡夾滿火腿、雞蛋、牛扒和香腸，充滿本土特色。味道就……完全食得出上述種種材料的味道。



波圖「Café Piolho D'ouro」– 波圖椰菜湯(Caldo Verde)

波圖4大名物之一Caldo Verde只係普通菜湯一碗，湯底加了薯容，椰菜切得很幼細，加上一片風乾肉腸，味道其實唔錯的，作為地道名物，值得一試。



波圖「酒莊Sandeman」– 砵酒(Port)

砵酒(Port)源於葡萄牙航海時代，一般葡萄酒放在船上不停搖晃會容易變質，較高的酒精及糖份能防止餐酒在船上變質，葡萄牙便研發出砵酒這種比紅白酒較烈而偏甜的餐酒。釀砵酒的葡萄產自波圖以北的 斗羅河谷(Douro Valley)，只有在波圖生產的葡萄酒，才可叫做砵酒。釀造砵酒時，會加入白蘭地增加酒精濃度並殺死酵母菌停止發酵，因此酒內保留了大量未被分解的果糖，令砵酒味道特別濃甜。



波圖「Restaurante Rei Da Sardinha Assada」– 炭燒沙甸魚

特色葡國菜，係當日捕獲的好嘢，沙甸魚味道很濃，肉厚有肉汁，火候到家，好正。



Freixo de Numao – Mos do Douro「Petiscaria Preguiça」– 炭烤馬介休(Bacalhau gerPhado)

半風乾的咸鱈魚，是特色葡國菜，香口且肉質細密，但偏咸。

瑞士 Switzerland

Gruyères「Restaurant Le Chalet」– 芝士火鍋(Fondue)

Fondue是起源於瑞士山區農村的本土菜式，從前節儉的農夫將日常吃剩的芝士放於鍋中加上白酒煮溶，再將吃剩的麵包切成小塊沾來吃，便演變成今日的芝士火鍋。瑞士小鎮Gruyères出產的芝士煮成火鍋，咸度適中芝士味道十分濃郁，見到都流口水。




<非洲 Africa>

摩洛哥 Morocco

馬拉喀什 大廣場 – 羊肉雜菜Tajine

非洲菜其實冇乜好食，最特色是這味羊肉雜菜Tajine了，Tajine是摩絡哥傳统的煮食器皿，像中國煲仔菜，把肉和雜菜放在Tajine內燉幾小時才上枱，來摩絡哥必試。味道不見驚喜。

南非 South Africa

開普敦Market on the Wharf「Africa Best Food」 – 非洲雞飯

由非洲黑人煮理，夠晒Local味道啦。雞肉和飯都唔錯，可以成碟清晒。



開普敦「陶苑酒家」 – 南非野生大鮑魚

嘩！隻大鮑魚巧似禾個頭咁大，第一次食亦係第一次見這樣大的鮑魚，重1.375kg，每1kg – R2200，即係呢隻要R3025(成1500蚊港紙架)，不過牡計啦，小太熊都未吃過。伙記話最好煮2味喎，分別有白灼鮮鮑片和油泡鮮鮑片，感和味道同禾以前吃過的巨型澳洲鮑魚一樣，唔講得話巧鮮甜，亦講唔出很有口感，只能話佢唔錯，但咁貴一定唔會試第二次囉。

<天地任我行 – 國際美食•名菜@April 2020>